Ub 14
14
1Taw at leleg wa ngaba ay ngayu at fagidapun.
2Kata waymi sik barugwak at kinrafad, takalangke way vtv, ay kata yangay mi sik aninu takalyam way vtv.
3Nu katanya, Dius, wain am fakaylatun yay gulit emi, ay am fakaylatun yay namaurianan emi sa am fagfawabiluganan.
4Sinu at malong te, sik tagasalanan fag taw di e kalong? Duan, nusdi sadi we mafafalong takatanya.
5Siginans fagsigadan nafalganan wo sik taw at leleg te, kaduge way nya, ay wa glangfe kata am nafalganan.
6Nu katanya, fabayani way lang anya, laman gtungkud tua kata sik tagfakamulun nu gfiangalay siginan at fagfakamulunan.
7Nu e nafuan sik kayu, e fagsegun yay te, gtugbung yay ban gdog.
8At lalid dewa madanama wan, ay at nagtudan anyango wan,
9nu nke mamam ro, umrugme, ay gdog yay gtugbung kata nu bagu katanum.
10Dewa katanya, sik taw nu nbul wan, nalyam yangay anggan at fagmabitsugun, ay nu dway gengasan ya, kanya wan at fakatabuan.
11Nu setain sik lino nu garimanan kalanggang, ay sik ngay liskung nu kagong,
12katanya yangay sik taw tagakabulun wan, wa makatu ya kalunggung, ay wa kafulo ya yakmay ban banwa ankalyam.
13Dius, suksuki angku sa sangay kinbul at talun, yakmay o nafalyam am dotama sa angku, ay falganani yap sik buknga sabaliwa nu nangamatang o angku.
14O nunda sik taw at kinbul, gdog yay ban gleleg? Dewa katanya, gagwanta kwan ku ngay fagidapun yakmay au anlangfe sas fagmanabayanun.
15Dius, gina o guro angku, gbalus au, ay kesug tuo am nawat fag taw.
16Ginanya ban fag ngay menit saful o ku ngay nafakamulun, ay di ban o gamatangan ya ku ngay asalanan.
17Ay gfalyam ban o ku fagmauriun kata nu masuadan si sik fagsuadan, ay natabun laman wo glag ya.
18Dewa katanya, nu setain ngay buksul nu kagubang ay ngay gang nu kabaras siginan at fagtungkudan,
19ay nu setain ngay gang nu kayangfis familugan nu gdalan gugat, ay lutuk nu kagubang aroro maksvn nu karak, katanya yangay nu gfalyam o ngay taw at fagsegun.
20Kabavn gbabo o ay gfabul ngay taw, ay kanya nu nbul wan namabali o at kamatan.
21Kanya wa nasaful ya te, o e kesug yay at ngay sisian, ay o mannga gafaplan wan.
22Ay kanya at fagamatanganun sa way lang baliwa at fagidapun ay at fakabaluun.”
Currently Selected:
Ub 14: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
