Ub 13
13
1Nalag kwan ay nadungug, ay natogdungug kwan fagayu ay nalong.
2Ay saful kyangay ay fagsafulun fag fagsafulun, nu katanya, wam mafamatungudun ya sa angku.
3Dewa katanya, kwa namabadbaboan ayu sabaliwa ku kayaunanan, nu bunway nu namadasug au ku kayaunanan sa tua at mabalyanan fag Dius.
4Ay fagayu am, kamuag wayam. Fagayu am kata way am sik ngay tagfafia at yud makatu gfafia.
5Nu masine, lag am garingang. Fakatanyai tua at masine ay fakamulun.
6Glong au ayu te, dungugani ku longan.
7O nanggubuk ro am Dius siginan ay fakamuaganun?
8O gfadiuganan am anya? O ay ggubuk am anya?
9O ay Dius ro manga nu nainsaful ayu, o e lagan tua ro ay fagmasineun? Lag am gamatangan te, madaya way ro am anya kata nu gdaya am ngay taw.
10Matuyan Dius maiyan way ayu dewa am gfadiuganan anya.
11O nunda wam kalimu at fagmabalyananun?
12Ay ngay longan fagayu we fagmasineun nu bunway kata way sik dafug, ay fagayu ay ngay fagmasineun kata way sik tikung takarufa.
13Kaduge au garingang, am dungugani way lang, ay fabayani way lang ro angku nusnga setaw ro at kumdasug.
14Mafalganan au gfon ku leleg.
15Dius dewa gfabul wan angku e fagsegun kyay gugat si anya, ay e famalus kway gugat sa anya.
16Tibaginan ro, siginan takatanya kalangfe ktua, aroro we taw mauri at manangakbang anya.
17Dungugani fia ku longan.
18Katsi mafalganan au gfoyung sabaliwa ku sadili, nasaful kwa te, kdi e asalanan.
19Sinu at mafatuyan te, e asalanan au? Ay nu e asalanan kway, ang kway lang maragangan yakmay au anbul.
20Dius, ku fagetun sa emu dua. Nu nafon tua ro wo angku, kwa gsuksuan ya emu.
21Faragangi wan nu gfaurianan o angku, ay lag gfadasug sa angku ngay faurianan at malimu.
22Fakamatoani angku ay gbalus au emu, ay mannga au tagaringang sa emu ay balusi ro angku.
23Nataw ku nasalan ay ku asalanan? Falagi angku ku fakamaboun ay ku ngay nasalan.
24Wain am fagsaruyanun angku ay am fagtuyanun angku te, am fawayan?
25Wain am fagfalimuun ay am fagfafaloun angku? Kata kway lalab at fagfalayugun fag don ay fag naglayapan.
26Ay griruk o at nafamalingun tagfauri angku, ay gfataip yay o fagayu ku asalanan ebi gina au masisian
27Kata nu nasiuk o salambitan sa ku bitis. Galay au nasiklang gulit o angku, ay galo o ku nagdarafan.
28Nu katanya, kata kway sik fagagbilugun takarasras ay sik ngay fatung nu kon sik lanbung.
Currently Selected:
Ub 13: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
