Ub 12
12
Ub Naringang
1Ay Ub nabalus te,
2“O nu glong am, am way lang ke fagsafulun? O gamatangan am te, nu nbul ban am wa ban e sawad ya tibak taw at ke fagsafulun?
3Au, e fagsafulun kyangay kata ayu, ay wam malong te, gtungud tuam angku. Saful kyangay fagayu ay nalong.
4Dewa katanya, ku ngay fagadgalangan gfalingun kase angku, dewa au matuyan ay deyud au malong, ay Dius dewa nabalus ku ngay darangin.
5Ngay taw tagbanwan manabayan gfalingun tagidapan fag ngay taw.
6Dewa katanya, takamabul fag ngay taw manabayan nu gbanwan, ay ngay taw takauri Dius maseganama tua, dewa katanya, kanya fagayu at fagsegan at sadili way lang fagmakatuun.
7-8Atoglagi tua ngay mangilafang taglao, taglayug, tagalafang, ay tagfioan.
9Aroro kanya fagayu nasaful te, Yawi wan at nawat anya fagayu.
10Fagayu at awatan at ngay leleg siwa at daluap, ay anggan taw at engasan.
11Taw at talinga fanginsaful te, inday at masine ay at mauri fag longan kata at leplep nu gfaskud fakonun.
12At mafufuama, ngayu tua at fagsafulun. Aroro nu kaaduge wan at leleg, kaugat yay at fagsafulun nu kayu.
13Dius way lang at kinsak at fagsafulun ay ke fagmabalyananun, kasakan yangay at fagtogdungugun, ay matuyan at ngay famalun.
14Dius at narasras, we mafasine ya, ay nu naubung, we mafalfas ya.
15Kanya ro nu nafasiwang way arak, lutuk ro kagong wan, ay nu nafarak way ngap ro, maksvn nu grasras fagdaul daga.
16Kanya e fagmabalyananun ay e fagsafulun, ay magbilug tagfandaya ay at nadayan.
17Kanya gfayud e masuad ngay tagfangatulun at fagsafulun, ay gfayud mamatanganan ngay tagwabilug.
18Kanya gaiyan ngay fun siginan at mesa faglunggungan, ay gfafagsuguan sa tibak fun.
19Kanya gfayud e masuad ngay tagfon fanggalangun at ngay fanambagun ay tiba yak taw at ke fagsafulun.
20Kanya gfaragang at fagfatigwanan fag ngay tagfoyung ay gbul ngay mafagtainan at fagsafulun.
21Kanya gfauri ngay fun, ay gbul ngay taw at mabalyanan at fagmakatuun.
22Ay kanya gfasure at ngay masuksuk, ay kanya gfasik mayamag dulum.
23Kanya gfabitsug tibak talun at ngay taw ay giklas tibak talun, ay gfabia tibak talun ay sanya ginan gfarapyag anya fagayu.
24Kanya gfayud e amatanganan fagayu fun, ay nanamalyam kanya fagayu sas talun at yud e taw.
25Nu katanya, kanya fagayu gyakapan sad dulum, ay granranugan kata sik tagalangu.
Currently Selected:
Ub 12: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
