Ub 11
11
Sufar Naringang
1Sanya ginan, Sufar tagsiginans talun Naama nalong te,
2“Wa masine gfalangfean tuy am ngay nalong. O masine gtap te, sik taw at mabarisan we asalanan?
3O nu glong o, am ngay nalong yud e fanambagun mafafaragang emi, o ay nunda nu glong o wami masalag nu kamalingun o?
4Nalong oma o te, matuyan am foyungan, ay di o e malong sis Dius at daga salubangan.
5Dius ganangaringangun wama sa emu,
6ay gfasure sa emu am yud yay nasaful fag fagsafulun, aroro at matuyan fag fagsafulun e duak masuad. Sumaful o nangus te, Dius nafalyam tua tiba am asalanan.
7O makatu way o kayamag sabaliwas Dius? O mananginsaful o at Mabalyanan fag Dius at fagyudun e kurang?
8Kanya abat yap sbanwa ay abasad yap tua sfagfolian ngay kinbul.
9Gtungud yap tua fagdaul daga ay labi yap tua dagat. O nunda mafaladlabian ro wo am fagsafulun sas Dius?
10Dius ro nu nagamat emu ay nu nataban sa sangay taginsaful ay nafaubung, o nunda ro e masalag anya?
11Dius saful way nu sinu tagfanuksuk ay kanya we fagyudun saful ngay taw at fagmauriun.
12Madulo way yud e fagsafulun nu nke fagsafulun ay madulo yangay sik asnu talun nu griangan sik taw.
13Ay nu matuyan tua ban o sas Dius, ay nu kakbang tua ban o sa anya,
14ay nu gubun tuo am asalanan, ay anggan am ngay kalongan nu gubun tua at ngay asalanan,
15anud di ban o e fakaplaun ya, ay umkaksvn ban nu gbanwan o manabayan, ay di ban o e fakalimuun ya.
16Wa ban o gamatang ya am nadalan fag fagidapun, ay kalyam way lang ban kata tagfamilugan fag mamam.
17Am leleg ban amayamag yap menit nu gdamlag gina sis buknga menit. Ay am dan fag ugali tagsisad dulum, umtubus sik bagu fag ugali kata yamag gina bagu kamenit.
18Ummanabayan ban am leleg, aroro e fagsegun wo. Dius gdiri emu ay mafiangalay tua ban o manabayan.
19Gina ban o gtiug, di e namalimu emu, ay ngayu ban at nanget gubuk sa emu.
20Dewa katanya, at mauri fag ngay taw umbalu ban ay we fagnantungulan ya. Ay fakabulun way lang at fagsegun.”
Currently Selected:
Ub 11: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
