Tagfangguna 3
3
At Kinsawad fag ngay Taw sis Kanaan
1Yawi nafasawad tibak taw sis Kanaan laman at famaskud ngay taw Israel at yud batang namawayan. 2Yawi nafakamulun takatanya laman gfoyung sa sangay taw Israel at kasugfunanan at yud batang namawayan. 3Kayu tuy Yawi at nafasawad: ngay taw Filistia tagbanwan sis limak furuan anggan at mesa tagfangguna, fagayu taw Kanaan, taw Sidun, taw Kib ay tagbanwan sis Lebanun fag ngay buksul siginans buksul Baal-Ermun sitsigons Lebu-Kamat. 4Yawi nafasawad kafag ngay taw laman gfaskud ngay taw Israel te, o gfaning tua at ngay suguan at nafon sat ngay mangaguyang siginans Muisis. 5Nu katanya, ngay taw Israel magamut gbanwan ngay taw Kanaan, taw Ket, taw Amur, taw Peres, taw Kib, ay ngay taw Ebus. 6Ngay taw Israel naylat at ngay baguama nu kamubay tagsanya fag ngay taw at baguina, ay nafon yangay at ngay baguina sanya fag ngay taw laman at mangena, ay ngay taw Israel naseg kanya fagayu at ngay fagsegan.
Utniel
7Ngay taw Israel nafakamulun at mauri sis Yawi at daga salubangan, ay nalyam nu gseg at Dius Yawi, ay naseg Baal ay Asera. 8Nu katanya, Yawi ankaksvn nu kadotama ngay taw Israel, ay nafabayan talun Aram-Naaraim at fun Kusan-Resataim nu gbabo anya fagayu. Nu katanya, ngay taw Israel nafagsuguanan ngay taw Kusan-Risataim kaduge waluk banwa.
9Sanya ginan, ngay taw Israel naet gubuk sas Yawi. Ay Yawi nasugu sik taw at ngayan Utniel, Kenas at baguama, laman namalangfe ngay taw Israel. Kenas, Kaleb at arian. 10Ay siginan Yawi at Falad at gubuk, Utniel nafangguna ngay taw Israel laman namawayan. Ay Yawi nafababo Utniel sas Kusan-Risataim, Aram at fun. 11Nu katanya, ngay taw Israel manabayan tua kaduge ufatk safuluk banwa. Ay Utniel anbul wan.
Eud
12Ngay taw Israel nadog yay nafakamulun at mauri sas Yawi at daga salubangan. Nu katanya, Yawi nafababawan ngay taw Israel sas Eglun, talun Muab at fun. 13Ay taw Amun ay taw Amalek nagubuk fun Eglun laman namawayan taw Israel, ay kanya fagayu nababo. Nu katanya, fun Eglun nagbilug furuan Eriku.#3:13 furuan Eriku: sas Ebreu, furuan ke ngayuk fun kayu takata layag. 14Ngay taw Israel nafagsuguanan fun Eglun kaduge labi waluk banwa.
15Ngay taw Israel nadog yay naet gubuk sas Yawi. Ay Yawi nasugu sik taw laman namalangfe ngay taw Israel. Kanya at ngayan Eud, Gera at baguama siginans Benamin at kasugfunanan. Kanya sik taw at mawala. Ngay taw Israel nasugu Eud laman namon at ngay famayad sas Eglun, Muab at fun. 16Gina Eud galoun, nawat sik fiso tagsumbalian at uyup, at kabaan gwabilug sangbada. Ay nataud sit siun baliwa fag balangbang sit daga lanbung. 17Ay Eud nu ndasug nafon at ba famayad sas fun Eglun, kanya sik taw mataglu. 18Sanya ginan, Eud nu nafon wan at ba famayad, nafauli wan at ngay fadgaloan, ay Eud nanangufud yay. 19Ay nu ndasug sat fagsegan fag ngay gang sis Gilgal, kanya anfoli sas fun Eglun, ay nalong te, “Mesug fag fun, e fagyalongun au sa emu sik masuksuk.”
Ay fun Eglun nalong sat ngay fagsuguan te, “Duksuni yap.” Ay fagayu at ngay fagsuguan naduksun wan, 20ay Eud ankakbang sas fun Eglun. Ginanya fun Eglun malunggung gfiangalay sit tiba tungud fag suluk at marios. Ay Eud glong te, “E nalong kyay sa emu.” Ay fun nu nlindug, 21Eud at wala fag take naranggut at fiso tagsit siun fag balangbang, ay naurus fun Eglun at ungdan, 22ay natalfus sat guyuy. Aroro fun Eglun mataglu, anggan at angkap anfalyu wan, ay kanya wa naranggut ya at fiso.
23Sanya ginan, Eud naduksun wan ay nafaksvn sakbawan nu madingdingan. 24Ay nu nalo wan, fun at ngay fagsuguan anfoli wan ay manlag di at ngay dingding sakbawan maksvn nu madingdingan. Nu katanya, namatangan te, at fun sas alangan way. 25Ay kanya fag ngay fagsuguan gfanya sis day sakbawan. Ay nu ngaduge wan, wa kabayan, aroro at fun wa gluang sakbawan. Sanya ginan, kanya fagayu nanamul fanluang, ay nananluang sakbawan, ay manlag di at fun anbul wan matangda sad salug.
26Kaduge kafag ngay fagsuguan gfanya, Eud nalagyu wan. Ay kanya nadalan sa sangay fagsegan fag ngay gang ay nalao sas Seira. 27Ay nu ndasug sas Efraim fag ngay buksul, kanya nauyup at budyung laman guro ngay taw Israel laman namawayan. Sanya ginan, Eud nafangguna ngay taw Israel nu gtagbung siginan kafag ngay buksul. 28Eud nalong sa anya fagayu te, “Aloi angku aroro Yawi gfababo wan ayu sa ay ngay fawayan fag ngay taw Muab.” Ay ngay taw Israel nafaning Eud, ay maful sis fagdifean Liskung Urdan laman we malao sas Muab, ay nusdi sadik taw Muab we nadife. 29Ay ginanya fag menit, kanya fagayu at nafabul safuluk libuk taw Muab at magaras ay at maseganama. Ay we nalagyu nusdi sadi. 30Ginanya fag menit, taw Israel nagbilug talun Muab. Ay sanya ginan, ngay taw Israel manabayan kaduge waluk safuluk banwa.
Samgar
31Samgar, Anat at baguama, at natubus Eud laman tagfangguna. Kanya nafalangfe taw Israel ay nafabul unumk sandank taw Filistia. At famabul at fanreres baka fag tulag.
Currently Selected:
Tagfangguna 3: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
