Tagfangguna 2
2
Yawi at Tagbarita sis Bukim
1Yawi at Tagbarita nalao sas Gilgal ay nataglayun sas Bukim, ay nalong sa sangay taw Israel te, “Nafaduksun au ayu siginans talun Igiptu ay nabuba stae fag daga ku nafatuyanan sa ay ngay mangaguyang. Ay nafatuyanan au te, ‘Kwa ban kalyam ku nasadian sa ayu.’ 2Nalong kyangay sa ayu te, ‘Lag am nangawat ay nasadian sa sangay tagbanwan sanya fag daga, abat ngate, rufai wan at ngay fagirugan.’ Dewa katanya, nataw ay nafakamulun? Wam nafaning ku longan! 3Nu katanya, kwa ban gaiyan ngay tagbanwan si ay daga. Kanya ban fagayu kata sik dugi si ay dalan ay at ngay fagsegan ban kata sik famaskud sa ayu.”
4Ngay taw Israel nu nadungug takatanya, kanya fagayu nawayway maksvn. 5Ay kanya fagayu nafangayan sanya fag talun te, Bukim.#2:5 Bukim: at masuad, Ngay tagwayway. Ay sanya nu gfon fanggalangun laman sas Yawi.
6Sanya ginan, Uswe nafalao ngay taw Israel, ay galay sik kasugfunanan nalao laman nangagbilug at ngay mesa daga. 7Ay kaduge Uswe gleleg, kanya fagayu gfaning tua Yawi. Ay dewa Uswe anbul wan, kanya fagayu gfataglayun tua nu gfaning Yawi kaduge Israel at ngay fagtainan gleleg, at nalag Yawi at nafakamulun madulo sas Israel. 8Yawi at fagsuguan Uswe, Nun at baguama, nu kabul, at banwa sadik sandan safulu. 9Ay at iba nanamoli anya sat fagagbilugun fag daga sis Timnat-Eres, tagsis Efraim at fagagbilugun fag ngay buksul, sas wala fag alvngvdan buksul Gaas.
Ngay Taw Israel Anragang nu Gfaning Yawi
10Ginanya fag ngay talad kasugfunanan nu nbul wan, at fadogan fag ngay kasugfunanan wa natoglag Yawi, dewa nasaful Yawi at nafakamulun fag ngay madulo sa sangay taw Israel. 11Ngay taw Israel nafakamulun at mauri sas Yawi at daga salubangan, ay naseg Baal fag fagsegan. 12Ngay taw Israel natalyuyan Yawi, at ngay mangaguyang at Dius, at nafaduksun anya fagayu siginans talun Igiptu. Ay kanya fagayu nafaning ay naseg sit ligung fag ngay taw at ngay fagsegan. Kanya fagayu nafadotama Yawi, 13aroro natalyuyan Yawi ay nafaning Baal ay Asturet fag ngay fagsegan. 14Ankugat yay Yawi nu kadotama ngay taw Israel Nu katanya, kanya nafabayan ngay tagfangkamul laman namul at ngay ramraman. Ay Yawi nafabayan yangay at ngay fawayan sit ligung nu namawayan anya fagayu ay kanya fagayu wa makatu gbalabag at ngay sadili. 15Ngay taw Israel galay namawayan, Yawi at faggubukun at ngay fawayan way, kata ebi at nalong. Nu katanya, ngay taw Israel maksvn nu gidapan.
16Sanya ginan, Yawi nasugu ngay tagfangguna laman namalangfe ngay taw Israel siginan kafag ngay tagfangkamul. 17Dewa katanya, kanya fagayu wa nadungugan at ngay tagfangguna. Abat ngate, at ngay fakamulun kata way sik tagfaebayad fag mangena siginan nu gseg tibak fagsegan. Kanya fagayu natalyuyan masakit Yawi at ngay suguan, ay wa kata at ngay mangaguyang at nafaning tua. 18Yawi nagubuk tua fagayu at nasugu fag ngay tagfangguna ay nafalangfe ngay taw Israel siginan at ngay fawayan kaduge ngay tagfangguna gleleg, ay anfanyu tua, aroro nalag at ngay nakalpan siginan at ngay nafaidapan ay at nafauri anya fagayu. 19Ay kanya fag ngay tagfangguna nu nbul wan, ngay taw Israel gdog yay kafoli sat mauri fag fakamulun ay gdog yay gseg tibak fagsegan aksvn yap at ngay mangaguyang at fagmauriun. Ay kanya fagayu wa kaylat gubun at ngay fakamulun at mauri ay at fakamaogatunun.
20Nu katanya, Yawi nu kadotama ngay taw Israel ankaksvn, ay glong te, “Aroro tuy fag ngay taw nafamabo ku nasadian sat ngay mangaguyang ay wa nafaning ku ngay suguan, 21kwa ban gaiyan ngay taw Uswe at nayud nafaiyan ebi gina gleleg. 22Ay nangagbilug kban kafag ngay talun at ngay taw laman at fanginsaful sa sangay taw Israel te, o gfaning tua ku ngay suguan kata at ngay mangaguyang.” 23Katanya Yawi at fagyudun naiyan kafag ngay taw, ay at fagyudun nafagbilug anya fagayu sas Uswe.
Currently Selected:
Tagfangguna 2: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
