Tagfangguna 4
4
Debura ay Barak
1Eud nu nbul wan, ngay taw Israel nadog nafakamulun at mauri sas Yawi at daga salubangan. 2Nu katanya, Yawi nafabayan fun Abin tagsiginans Kasur nu nangagbilug ngay taw Israel. Abin, taw Kanaan at fun. Kanya at ngay tagfawayan at fun, Sisera, ay gbanwan sis Karuset-Aguyim. 3Sisera e siamk sandank faguyudan fangawayan mawatan sanbung, ay kanya nafaidapan maksvn ngay taw Israel kaduge duak safuluk banwa. Nu katanya, ngay taw Israel gdog yay naet gubuk sas Yawi.
4Ginanya fag buknga, tagfangguna ngay taw Israel, Debura, Lapidut at mangena, ay kanya Dius at taglong. 5Ngay taw Israel nu kaylat way gyafasineun at ngay malong, glao sas Debura sas layag at lanbung, tagsis wabilug Rama ay Betel sis Efraim at fagagbilugun fag ngay buksul.
6Sik menit, Debura nafauro Barak, Abinuam at baguama, tagsiginans Kedes, Naftali at kasugfunanan at fagagbilugun fag talun. Barak nu ndasug, Debura nalong anya te, “Yawi, Israel at Dius, e suguan emu te, namaful o safuluk libuk mangama siginan Naftali ay Sebulun at kasugfunanan, ay tabanani anya fagayu sas Buksul Tabur. 7Namasagsagan au Sisera, fun Abin at fun tagfawayan, nu glao sas Liskung Kisun, gfaudgufudan at ngay tagfawayan ay at ngay kabayu at ke ngay faguyudan. Ay namababo au anya fagayu sa ayu sanya.”
8Ay Barak nalong sas Debura te, “Nu sanya tua ro wo, anggan ro au, ay nu dway ro wo sanya anggan au kwa sanya.”
9Ay Debura nabalus te, “Sabv, nangalo kro emu, dewa katanya, wa ro sa emu nu kafon famauseganan, aroro Yawi namababawan Sisera siginan sik mangena.” Ay Debura nanangalo Barak sas Kedes. 10Barak nafauro Naftali ay Sebulun at kasugfunanan, ay at nanangalo safuluk libuk taw. Ay Debura galo yangay.
11Keber fag taw Ken ansaruayan siginan at kaiban ay nawat at bale ramit munakbang si tagbia fag fun kayu sis Saananim, munakbang sis Kedes. (Ngay taw Ken, Muisis at ifag Kubab at ngay kasugfunanan.)
12Ay e nalong sas Sisera te, “Barak nalo wan sas Buksul Tabur,” 13nu katanya Sisera nafaful siamk sandank kabayu ke faguyudan mawatan sanbung, ay anggan at ngay tagfawayan. Ay kanya fagayu nalao siginans Karuset-Aguyim sas Liskung Kisun.
14Ay Debura nalong sas Barak te, “Katsi wa fag menit Yawi nu namababo emu sas Sisera. Ay kanya yangay ro taggubuk emu.” Nu katanya, Barak natagbung siginans Buksul Tabur gadgaloan at ngay tagfawayan fag safuluk libu. 15Barak ay at ngay tagfawayan nu gfawayan wan, Yawi nafasagsagan Sisera ay anggan at ngay tagfawayan ay at mafananadan gsakay sis kabayu at faguyudan. Nu katanya, Sisera natos siginans faguyudan ay nalagyu. 16Barak ay at ngay tagfawayan nafafalo Sisera ay at ngay tagfawayan at mafananadan gsakay sis faguyudan. Kanya fagayu nafafalo sitsigons Karuset-Aguyim ay nafabul at ngay fawayan, ay we nlangfe nusdi sadi.
17Ay Sisera nalagyu sas Yael, Keber at mangena at bale ramit, aroro Abin, talun Kasur at fun ay Keber fag talanan ggadgalangan. 18Yael nafablang Sisera ay nalong te, “Gewan, sakboi sa ku bale ramit, lag kalimu.” Nu katanya, Sisera nasakbo sat bale, ay Yael natabun anya sik umut.
19Sisera nalong sas Yael te, “Foni angku mamam, gurungan au kadanum.” Nu katanya, Yael naluab at fagsuadan susu bilug ay nafainum Sisera, ay nu nainum wan, kanya gdog yay natabun. 20Sisera nalong te, “Malindug o si sakbawan bale ramit. Ay nu e ndasug, ay ginto te, ‘O ste e tibak taw?’ longi te, ‘Duan.’ ”
21Ay aroro Sisera maksvn nu kalufuy, kanya natiug ngabasad. Ay gina gtiug, Yael nabul sik fagtabingan lubyang bale ramit ay famulpug, ay narimanan nangakbang sas Sisera. Ay Yael napulpug at ba fagtabingan lubyang sas Sisera at dangasan, ay antalfus ay antaruk sas daga, nu katanya, Sisera anbul wan.
22Barak ay at ngay tagfawayan nu ndasug laman nanrvbvy Sisera, Yael nafablang anya, ay nalong te, “Gewan, namalag au ayu ay fagrvbvyun fag taw.” Nu katanya, Barak nanangalo anya ay nalag Sisera nu mafolian lang, ay matalfusan sit alfuyu sik fagtabingan lubyang. 23Ginanya fag menit, Dius nafababo ngay taw Israel sas fun Abin tagsiginans Kanaan. 24Barak ay at ngay tagfawayan gfataglayun nu gfawayan, yakmay nafabul Abin, Kanaan at fun.
Currently Selected:
Tagfangguna 4: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines