Nu Galin 1
1
Ngay Taw Israel nu Gafagsuguanan sis Talun Igiptu
1Akub at ngayan at sadi, Israel. Akub gina glao sas talun Igiptu, nataban at ngay baguama gadgaloan at ngay talnayan. 2Akub at ngay baguama at ngay ngayan: Rubin, Simyun, Lebi, Uda, 3Isakar, Sebulun, Benamin, 4Dan, Naftali, Gad, ay Aser. 5Ay Akub talafuan gina sas talun Igiptu nu fagayu wan, fituk safulu. Ginanya, Use nu gbanwan sis talun Igiptu glugo wan.
6Ay abandi, Use ay at ngay faduksay anbul wan, ay anlangfe wan kafag talad taw. 7Dewa katanya, ngay taw Israel masakit nu kayu, ay anfagdaul talun Igiptu.
8Ay talun Igiptu anke bagu fag fun, ay kanya wa nasaful sabaliwas Use. 9Kafag fun nalong sat ngay taw te, “Damai! Ngay taw Israel katsi ayu yap tua antam ay amabitsug yap. 10Nu katanya, nangawat tam sik balyawvtan laman kanya fagayu wa kayu, aroro nu nke awayan way ban, kanya ban manga fagayu manangasadi sa tam ngay fawayan ay gfawayan ban antam ay glao siginan tam talun.”
11Nu katanya, ngay taw Igiptu nafili sik ngay taw madot laman gfangguna ngay taw Israel ay namaidapan siginan nu gfafakamulun at maidap. Ay kanya fagayu nafawat sa sangay taw Israel duak furuan daul, Pitum ay Rameses laman Igiptu at fun at fagfungsuan gutluan. 12Dewa katanya, kaduge kanya fagayu gfataglayun gfaidapan ngay taw Israel, ngay taw Israel gfataglayun nu kayu ay nu kafagdaul talun Igiptu. Nu katanya, ngay taw Igiptu ankugat yay nu kalimu, 13Aroro katanya, ankugat ngay taw Igiptu nu yud e afanyu ya gfafakamulun ngay taw Israel, 14ay maksvn nu gfaidapan siginan nu gfawat ngay famadafut ay ngay gang fangawat bale,#1:14 gang fangawat bale: at masuad sik lifak madai at mafagamutan nagbiluganan fare ay mafagongan laman fangawat bale. Ay nu nkawat wan, kata sik alublak. Tiba at ngayan, tisa. ay nu gfafakamulun gugat sat gamasun.
15Ay sanya ginan, Igiptu at fun nalong sa sangay tagfasalug fag ngay Ebreu,#1:15 Ebreu: at masuad, taw Israel. Sifra ay Pua te, 16“Nu ggubuk am Ebreu fag ngay mangena nu gfasalug, at ngenge nu munama way, fabuli wan, ay nu munina tua, lag gfabul.” 17Ay aroro Sifra ay Pua kalimu tua Dius, wa nafaning fun at suguan, abat ngate, di gfabul ngay ngenge at kinsalug dewa munama.
18Nu katanya, at fun nafauro kafag duena ay nainto te, “Wain ay fagnafakamulunun takatanya? Wain ay fagyudun nafabul ngay sisian munama at bagu kasalug?”
19Ay kafag duena gbalus te, “Aroro Ebreu at ngay mangena nu gfasalug, amasakit yap tua talun Igiptu at ngay mangena nu gfasalug. Ay nu kadasug wami, nafasalug wan.”
20Nu katanya, masine tua Dius at nafakamulun sa kafag duak mangena tagfasalug. Ay ngay taw Israel gfataglayun nu kaayu. 21Aroro kafag dua gfaning tua Dius at fakaylatun, Dius nafon sa anya fagdua at mesa talanan.
22Nu katanya, Igiptu at fun nasugu sat ngay taw te, “Ukasi sasad Liskung Nilu ngay taw Israel at ngay sisian munama at bagu kasalug, dewa katanya, fabayani way nu sik ngay munina tua.”
Currently Selected:
Nu Galin 1: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
