Nu Galin 9

Faurianan sa sangay Fagbaugun

1Yawi nalong sas Muisis te, “Loi sas Igiptu at fun ay nanlong o sa anya te, Katatuy Yawi, ngay taw Ebreu at Dius, at nalong: ‘Falaoi wan ku ngay taw laman kanya fagayu mananseg angku. 2Nu dway ro wo nafalao anya fagayu, 3namadasug kban takamabul fag fakasaitun sam ngay kabayu, asnu, kamelyu, baka, tupa, ay kambing. 4Dewa katanya, namasaman kban ngay taw Israel at ngay fagbaugun siginan ay ngay fagbaugun. Ay di ban e kabul ku ngay taw Israel at ngay fagbaugun.’ ”

5Ay Yawi nafasaful te, “Balabag ban namakamulun au takatanya.” 6Ay balabag di, Yawi nafakamulun takatanya. Ngay taw Igiptu at ngay fagbaugun fagayu anbul wan. Dewa katanya, nusdi sadi sa sangay taw Israel at ngay fagbaugun we nbul. 7Nu katanya, Igiptu at fun nasugu at ngay fagsuguan laman nanginsaful. Ay kanya dewa nasaful te, ngay taw Israel at ngay fagbaugun we nbul nusdi sadi, kanya kamaogatun yay fia, ay wa nafalao ngay taw Israel.

Yapvs

8Yawi nalong sas Muisis ay sas Arun te, “Nanggalumut am dafug sas fagfatamaan ay Muisis ro nangukas kafag dafug sas tagmara sis Igiptu at fun at daga salubangan. 9Ay kanya ro fag dafug umfagdaul sas talun Igiptu, nu katanya, ngay taw umke ngay yapvs, ay umtayuk yangay anggan sat ngay fagbaugun.”

10Nu katanya, Muisis ay Arun nanamul dafug sas fagfatamaan ay nasas Igiptu at fun ay namalindug sit daga salubangan. Ay Muisis naukas kafag dafug galo tagmara. Nu katanya, ngay taw ay anggan at ngay fagbaugun anke ngay yapvs. 11Ay anggan ngay tagsaful gfasure at madulo anke ngay yapvs yangay kata at kaiban fag ngay taw Igiptu, nu katanya, kanya fagayu wa masalubang ya Muisis. 12Dewa katanya, Yawi nafaogat Igiptu at fun at amatanganan ay kanya wa nadungugan Muisis ay Arun kata Yawi at longan.

Nu Karak Yelu

13Sanya ginan, Yawi nalong sas Muisis te, “Balabag ban masuripi nung o kafulo, ay loi ban sas Igiptu at fun, ay longi ban anya te, ‘Yawi, ngay taw Ebreu at Dius, glong te, Falaoi wan ku ngay taw laman kanya fagayu mananseg angku. 14Aroro nu dway ro wo nafalao anya fagayu, namadasug au sa emu sik maksvn fag faurianan at namaurianan emu ay am ngay tagfakamulun ay anggan am ngay taw. Ay sumaful ro wo te, we gfasud angku sas fagdaul daga. 15Siginan ebi, makatu kway gfabul emu, gasfuan am ngay taw siginans fakasaitun, satu ro katsi wam e gleleg ya sas fagdaul daga. 16Dewa katanya, naylat kyay nung o gleleg laman lumag o ku fagmabalyananun, ay laman ku ngayan umtoglag sas fagdaul daga. 17Dewa katanya, nafamatungudun o sa ku ngay taw ay wo naylat kanya fagayu nu glao. 18Nu katanya, balabag ban kata yangay katsi fag buknga, namarak kban yelu takata ngay gang ayu sirut. Ay ya batang e nfugfug takaksvn nya siginan ebi talun Igiptu nu kasik talun. 19Nu katanya, katsi, sugui sam ngay fagsuguan te, fasarirungi fagayu am ngay fagbaugun ay anggan am ngay fagsuguan tagsim ngay fagtanuman aroro fagayu ban tagsis lod bale, dewa taw ay dewa fagbaugun, umbul nu natalfian way arak yelu.’ ”

20Ay Igiptu at fun at tagfakamulun tiba maksvn nu kalimu Yawi at nalong. Nu katanya, kanya fagayu gabanganan namasarirung at ngay fagsuguan ay at ngay fagbaugun.

21Dewa katanya, tibak taw wa nafanud Yawi at longan ay nafabayan way lang sis lod bale at ngay fagbaugun ay at ngay fagsuguan.

22Nu katanya, Yawi nalong sa Muisis te, “Fatiuani am tulag sas banwa laman karak yelu sas fagdaul talun Igiptu, sa sangay taw, sa sangay fagbaugun, ay sas fagayu fananumun.” 23-24Nu katanya, kanya nafatiuan at tulag, ay Yawi nafadasug lingsi, ay yelu fag arak, ay nafadasug yangay limbad. Ay siginan Igiptu nu kasik talun, kanya yay lang fag arak at maksvn at kindasug sanya fag talun. Ay kaduge karak yelu, glimbad yangay ay glingsi. 25Nu katanya, fagayu fagbaugun anggan ngay taw tagsis lod bale anbul wan, ay fagayu at fananumun anlagmak, ay fagayu fun kayu at ngay sanga anrabas wan. 26Siway langs Gusen fag afud talun si sangay taw Israel at fagbanwanan at yud narak yelu.

27Ay Igiptu at fun nafauro Muisis ay Arun, ay nalong sa anya fag dua te, “Katsi natuyan kwa te, au wan at nasalan. Yawi tua at yud e malong, ay ami way ku ngay kaiban at nasalan. 28Namainfanyuan am nanget sas Yawi te, ‘Faragangi wan takatanya fag lingsi at maksvn ay yelu fag arak.’ Ay gfalao kwan ayu, ay wa masine ya nu gbanwan am ste.”

29Ay Muisis nabalus te, “Kin! Nu nalao kwa ro ste ginan fag furuan, gfabat kro ku daluap sas Yawi laman gdarangin, ay karagang wa ro nu glingsi, nu glimbad ay nu karak at marios takata ngay gang. Nu katanya, sumaful ro wo te, Yawi tua tagagbilug fagdaul daga. 30Dewa katanya, nasaful au te, o ay am ngay tagfakamulun wam kalimu Yawi em Dius.”

31(Ginanya, anrasras wan fangawat lanbung fag tanum aroro gbarugwak wan, ay anggan fangawat tinapay#9:31 fangawat lanbung… tinapay: tuy fag duak tanum sas Faniganun, lino ay sebada. Sas Ingles, flax ay barley. anfangulan yangay, aroro ginanya geloan yay. 32Dewa katanya, trigu#9:32 trigu: sas Ebreu, duak dalan tanum fangawat tinapay. di nfangulan, aroro ya kagutlu.)

33Ay Muisis nalao wan siginans Igiptu at fun at daga salubangan, ay naduksun siginans furuan daul. Ay Muisis nafabat at daluap laman gdarangin sas Yawi. Nu katanya, anragang wan nu glingsi ay nu glimbad ay nu karak yelu. 34Ay Igiptu at fun nu nalag te, ansiwang wan, kanya ay at ngay tagfakamulun gdog yay nafamaogatun. 35Nu katanya, kanya wa nafalao ngay taw Israel, kata Yawi at longan sas Muisis.

Currently Selected:

Nu Galin 9: OCCT

Highlight

Copy

Compare