Nu Galin 8

1Ay Yawi gdog yay nalong sas Muisis te, “Laoi sas Igiptu at fun ay nanlong o anya te, ‘Katatuy Yawi at longan: Falaoi wan ku ngay taw laman kanya fagayu mananseg angku. 2Nu dway ro wo nafalao anya fagayu namapnu kro fio sas fagdaul am talun. 3Ay Liskung Nilu ro umkapnu fio ay gsakbo sam bale daul, ay anggan sam fagtiugan fag suluk, ay sam fagtaygilidanan. Ay kanya ro fag ngay fio gsakbo yangay sam ngay tagfakamulun at bale ay sam kaiban at bale, ay anggan sa sangay fagdafugan, ay sa sangay fakawatan tinapay. 4Ay kanya ban fag ngay fio nanliptuk sa emu anggan sam ngay taw ay sam ngay tagfakamulun fagayu.’ ”

5Ay Yawi nalong yay fia sas Muisis te, “Longi sas Arun te, ‘Fatiuani am tulag sa talay fag ngay liskung, ay sat nawat fag ngay fagfamiluganan mamam, ay sa sangay bunaw, ay fio ro umkapnu sas fagdaul talun Igiptu.’ ”

6Nu katanya, Arun nafatiuan at tulag sas talun Igiptu at ngay lino, ay ngay fio ansure, ay ankapnu sas fagdaul talun Igiptu. 7Dewa katanya, ngay tagsaful gfasure at ngay madulo nafakamulun yangay takatanya siginan at fagmabalyananun, ay nafasure yangay ngay fio.

8Ay Igiptu at fun nafauro Muisis ay Arun, ay nalong te, “Darangini sas Yawi te, falyami wan ngay fio siginan angku ay siginan ku ngay taw, ay gfalao kban ay ngay kaiban laman kanya fagayu namon at ngay fanggalangun sas Yawi.”

9Ay Muisis gbalus Igiptu at fun te, “Longi angku nu ginain ban at masine nu nandarangin au laman sa emu, ay sam ngay tagfakamulun ay sas fagayu am ngay taw, laman ban ngay fio umkalyam wan siginan ayu ay siginan ay ngay bale. Ay laman ban at sawad tagsi way lang sad Liskung Nilu.”

10Ay Igiptu at fun gbalus te, “Balabag ban.”

Ay Muisis gbalus te, “Kin! Umfasludan ban kata am nalong laman ban sumaful am te, we gfasud Yawi em Dius. 11Umkamin ban ngay fio tagsi emu, ay tagsim ngay bale, ay tagsim ngay tagfakamulun, ay anggan tagsim ngay taw. Ay at ke ngay fio ban si way lang sad Liskung Nilu.”

12Muisis ay Arun nu nalao wan siginans Igiptu at fun at daga salubangan, Muisis maksvn nu gdarangin laman Yawi gfalyam kanya fag ngay fio at nafadasug sas Igiptu. 13Ay Yawi nafakamulun Muisis at fagetun. Nu katanya, ngay fio anbul wan tagsi sangay bale, tagsi sangay ligung bale, ay tagsi sangay gamasun. 14Ngay taw Igiptu nafaful ngay fio at mabulan, ay fagdaul talun Igiptu basung way lang. 15Ay Igiptu at fun nu nalag te, we fagidapun ya, kanya kamaogatun yay fia, ay wa kaylat gdungugan Muisis ay Arun, kata Yawi at longan.

Ngay Bangyus

16Yawi nalong sas Muisis te, “Longi sas Arun te, ‘Fatiuani at tulag ay fafalangi sas daga,’ ay ngay lukbu ro umsik ngay bangyus sas fagdaul talun Igiptu.” 17Ay duksay nafaning. Arun nafatiuan ay nafafalang at tulag sas daga, ay ngay lukbu ankata sik ngay bangyus sas fagdaul talun Igiptu. Ay kanya fagayu nananggafus ngay taw Igiptu ay anggan sat ngay fagbaugun. 18Ay Igiptu at fun at ngay tagsaful gfasure at ngay madulo nafaskud oma nafaning ay dewa katanya, wa nakatu gfasure takatanya. Ay ngay bangyus gtaglayun nu ggafus ngay taw ay at ngay fagbaugun.

19Ay kafag ngay tagsaful gfasure at ngay madulo nananlong sas Igiptu at fun te, “Tuy Dius at fakamulun!” Dewa katanya, Igiptu at fun kamaogatun yay fia, ay kanya wa nadungugan Muisis ay Arun, kata Yawi at longan.

Ngay Lango

20Yawi nalong sas Muisis te, “Balabag ban masuripi tua nung o kafulo ay namablang ban o Igiptu at fun gina kanya glao sas liskung. Longi ban sa anya te, ‘Yawi glong te, Falaoi wan ku ngay taw laman kanya fagayu mananseg angku. 21Nu dway o gfalao, namadasug kban sa emu sik ngay lango, anggan yangay sam ngay tagfakamulun ay sam ngay taw. Ay ay ngay bale ban umkapnu lango, ay umkapnu yangay ban sas fagdaul ay talun. 22Dewa katanya, saman ku fakamulun sas Gusen fag talun, ku ngay taw at fagbanwanan; ay sanya long ban di e lango. Nu katanya, sumaful am te, sanya au fag talun. 23Namasaman au ku ngay taw siginan am ngay taw. Balabag ban umfasludan takatanya fag madulo.’ ”

24Nu katanya, Yawi nafadasug ngayuk lango sas Igiptu at fun at bale daul ay anggan sat ngay tagfakamulun at bale. Ay kanya fag ngay lango narasras fagdaul talun Igiptu at kayaunanan.

25Nu katanya, Igiptu at fun nafauro Muisis ay Arun, ay nalong te, “Kin, loi wan namon wam ay ngay fanggalangun say Dius. Dewa katanya, ste yakman stalun Igiptu.”

26Muisis nabalus te, “Duan, wa masine nu gseg ami anya stes talun Igiptu, aroro em ngay fanggalangun sas Yawi em Dius, mauri way sa sangay taw Igiptu. Nu katanya, kanya ro fagayu kauri way emi. Ay matuyan, kanya ro fagayu gfana emi. 27Sa ami stalun at yud e taw kaduge tuluk menit laman namon ami em ngay fanggalangun sas Yawi em Dius, kata at suguan emi.”

28Ay Igiptu at fun gbalus te, “Kin, kaylat kwan nung am namon ay ngay fanggalangun sa ay Dius Yawi, sat yud e taw fag talun. Dewa katanya, lag ban am kayayu. Katsi, darangini wan angku.”

29Ay Muisis nabalus te, “Nu nalao kwa ro ste ginan, gdarangin au sas Yawi. Ay balabag ban, lango umkalyam wan siginan emu, ay siginan am ngay tagfakamulun, ay siginan am ngay taw. Dewa katanya, tuyani wa fia te, wo gfadog ya gfandaya emi ay gfaragang nu glao ami laman manamon ami em ngay fanggalangun sas Yawi.”

30Sanya ginan, Muisis nalao wan ay nadarangin sas Yawi, 31ay Yawi nabalus Muisis at darangin. Nu katanya, nalyam wan ngay lango siginans fagdaul talun Igiptu, ay we sawad ya nusdi sadi. 32Dewa katanya, Igiptu at fun nadog yay nafamaogatun, ay kanya wa nafalao ngay taw Israel.

Currently Selected:

Nu Galin 8: OCCT

Highlight

Copy

Compare