Nu Galin 10
10
Ngay Liung
1Yawi nalong sas Muisis te, “Loi sas Igiptu at fun. Nafaogat au kafag fun ay at ngay tagfakamulun at amatanganan, laman gfataglayun au gfasure sa anya fagayu ku ngay fakamulun at madulo, 2ay laman ban mafansulit am sa ay ngay sisian ay sa ay ngay fufu, nu setain nu gfaurianan au maksvn ngay taw Igiptu ay nu gfakamulun au at ngay madulo sa sangay taw. Ay laman ban sumaful am te, au Yawi.”
3Ay Muisis ay Arun nasas Igiptu at fun ay nalong anya te, “Katatuy Yawi at longan, ngay taw Ebreu at Dius: Seduge yaban nu yud o kamababaun sa angku? Falaoi wan ku ngay taw laman kanya mananseg angku. 4Nu dway ro wo gfalao anya fagayu, balabag ban namadasug au sam talun sik ngay liung. 5Kafag ngay liung ban at kayuan, wa kalag ya lutuk. Ay nangon ban ay ngay fananumun ay ngay fun kayu at kinsawad, yelu fag arak at yud nadalan. 6Ay kanya ban fag ngay liung umkapnu am bale ay am ngay tagfakamulun at ngay bale ay anggan fagayu am ngay taw at ngay bale. Ya batang e kaksvn kanya at kinfasludan sas talun Igiptu siginan ay ngay mangaguyang nu kadasug sa ay talun.” Ay Muisis nu nalong wan katanya, nalao wan.
7Ay Igiptu at fun at ngay tagfakamulun glong sa anya te, “Seduge yaban nu gfabayan o kafag taw nu gfaidapan antam? Falaoi wan ngay taw Israel laman mananseg wan sat Dius Yawi. O yo nasaful te, anrasras wan fagdaul tam talun?”
8Nu katanya, Muisis ay Arun anfoli sas Igiptu at fun. Ay kafag fun nalong sa anya fag dua te, “Masine wam glao laman nanseg ay Dius Yawi. Dewa katanya, longi tua angku nu sinu ban ay fagnantabanun gina am glao.”
9Ay Muisis nabalus te, “Fagayu ami glao wami: ngay sisian, ay ngay fagtainan, ay gtaban wami fagayu em ngay fagbaugun. Aroro fagayu ami, namalganan ami sik fagmafulun laman sas Yawi.”
10Ay Igiptu at fun nalong te, “Anud! Yawi ro gufud ayu nu kaylat kdi nu glao am anggan ay ngay talnayan! Katsi nasaful au te, mauri way ay algan. Nanlagyu wayam angku. 11Kwa kaylat! Nu kaylat wayam nanseg Yawi, at mafagtainan yakman lang fag ngay mangama taglao.” Sanya ginan, kanya naiyan Muisis ay Arun siginan at daga salubangan.
12Nu katanya, Yawi nalong sas Muisis te, “Fabati am tulag sabaliwas talun Igiptu laman umdasug ngay liung laman ro nangon kafag ngay taw at ngay fananumun, yelu fag arak at yud nadalan.”
13Nu katanya, Muisis nafabat at tulag sabaliwas talun Igiptu. Sanya ginan, Yawi nafadasug tagmara siginans fakamenitan fagngabak menit ay fagngabak yabi. Balabag di, sik ngay liung galo tagmara. 14Ay kafag ngay liung ankapnu sas fagdaul talun Igiptu kata sik linyabu daul. Siginan ebi, ya batang e kayu nyak liung at kindasug sas talun Igiptu ay kabavn ban we kadasug ya takayu nya. 15Ay kafag ngay liung ankapnu sas fagdaul talun Igiptu ay at kayuan malayung way lang fagdaul lutuk. Ay naon at ngay fananumun at kinsawad sis arak yelu, ay naon yangay anggan ngay fun kayu at rawvg. Ay we sawad ya fagayu fananumun sis talun Igiptu.
16Nu katanya, Igiptu at fun masakit nafauro Muisis ay Arun, ay nalong te, “Anke asalanan au sa ay Dius Yawi, ay sa ayu. 17Falyami yap ku asalanan ay darangini sas Yawi te, ‘Buli wan ste ginan tuy fag faurianan takamabul.’ ”
18Ay Muisis nalao ay nadarangin sas Yawi. 19Ay Yawi nabalus, ay nafauyup tagmara sas fakayabian baliwa, ay nafalayug kafag ngay liung sas Dagat Maraska. Ay nusdi sadik liung wa nke sawad sis talun Igiptu. 20Dewa katanya, Yawi nafaogatun yay fia Igiptu at fun. Ay kafag fun wa nafalao ngay taw Israel.
Dulum
21Yawi nalong sas Muisis te, “Fabati am daluap sas banwa. Ay umdulum ro maksvn sas fagdaul talun Igiptu.” 22Ay Muisis nafabat at daluap sas banwa, ay andulum maksvn sas fagdaul talun Igiptu kaduge tuluk menit. 23Nu katanya, ngay taw Igiptu we naduksun siginan at ngay mesa bale ginanya fag ngay buknga, aroro wa ngap gladlagan ya. Dewa katanya, sis taw Israel at fagbanwanan mayamag tua.
24Igiptu at fun nafauro Muisis ay nalong te, “Kin, nanseg wam Yawi. Tabani wan ay ngay talanan, dewa katanya, famatoi way fagayu ay ngay fagbaugun.”
25Ay Muisis nabalus te, “Aylati wan nu gtaban ami em ngay fagbaugun laman em fagnangirugun em fanggalangun sas Yawi em Dius. 26Gtaban wami fagayu em ngay fagbaugun, ay wami gfamato nusdi sadi. Aroro wami saful te, kanya fag fagbaugun em fanggalangun sas Yawi. Ay sanya yaban nu gsaful ami te, kanya fag fagbaugun em fanggalangun.”
27Dewa katanya, Yawi nafaogatun yay fia Igiptu at fun, ay kanya wa nafalao anya fagayu. 28Ay kafag fun nalong sas Muisis te, “Loi wan siginan ku daga salubangan! Lag o galagan ya angku. Nu nadog kway ban nalag emu, gfabul kwan emu.”
29Muisis nabalus te, “Kin, nu katanya wan am fakaylatun, kwa ban nansalubang ya emu.”
Currently Selected:
Nu Galin 10: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
