Nu Galin 34

Dua yay fiak Dalifi

Deu 10:1-5

1Yawi nalong sas Muisis te, “Fasinei duak dalifi kata ebi taguna. Sanya ginan, nanriruk kban sanya kata ebi ku nariruk sim narufa fag duak dalifi. 2Balabag ban sbalabag, falganani, ay undaudi sas tungud Buksul Sinay ay nangablangan ta sanya. 3Lag e nangalo emu, ay dewa nday fag fungfung buksul lag e sanya. Anggan ngay tupa ay ngay baka lag namafangonan sanya.”

4Nu katanya, Muisis nafasine dalifi kata ebi taguna. Ay balabag di sbalabag, naundaud sas buksul kata Yawi at suguan anya gbuba kafag duak dalifi. 5Yawi andaga siginans linyabu ay nalong at ngayan te, Yawi, kaduge Muisis malindug sit daga salubangan. 6Yawi nadalan sas Muisis at daga salubangan ay nalong te, “Au Yawi, at mafangafanyu, at mafanggubuk fag Dius, at mafangesug, at matuyan, ay at yud masakit kadotama. 7Gfalag au ku fakesugun sas ngayuk taw, ay gfalyam au at ngay fagmauriun, at fagyudun gfaning ay at ngay asalanan, dewa katanya, gfaurianan kban ke ngay asalanan anggan at ngay sisian ay at ngay fufu anggan sas fatulu ay faufatk kasugfunanan.”

8Muisis namalub wa vtv sas daga ay nafauseganan. 9Ay kanya nalong te, “Kin ku Fun, nu guseganan tuo angku, gfainfanyuan au sa emu te, aloi tua ban emi. Dewa mi kamaogatun em ngay amatanganan, falyami em fagmauriun ay em ngay asalanan. Aylati emi laman am ngay taw ami fia.”

Gdog yay Nawat Nasadian

Gln 23:14-19; Deu 7:1-5, 16:1-17

10Yawi nalong te, “Kawat kban sik nasadian sa ayu. Sis salubangan am ngay kaiban, gfasure kban sik ngay madulo nusnga setaw ku nayud nafasure sas nusnga sinu fag ngay gaban taw sas fagdaul daga. Ay tagsi ay ligung fag ngay taw lumag ban ku ngay fagnamakamulunun siginan emu. 11Ay faningi ku suguan, ku nafon emu katsi fag menit. Nangaiyan kban ngay taw Amur, ngay taw Kanaan, ngay taw Ket, ngay taw Peres, ngay taw Kib, ay ngay taw Ebus siginan ku nafatuyanan sa ayu fag talun. 12Lag am kawat sik nasadian sanya fag ngay taw tagbanwan say fakadasugan ban fag daga, aroro tuy ban kata sik fanangdaw sa ayu. 13Abat ngate, nanrasras yakman am at ngay fagirugan ay nanrufa am at fagsegan fag ngay gang, ay namuan am at ngay turuk fagtoglagan Asera fag fagsegan. 14Lag am gseg tibak fagsegan, aroro au Yawi, kwa kaylat nu e fagsegan am tiba. 15Lag am kawat sik nasadian sanya fag ngay taw tagbanwan say fakadasugan ban fag daga. Aroro manafaylatan am gina kafag ngay taw gseg ay nu gfon fanggalangun sat ngay fagsegan, ay magewan ayu, sa nu nangon am fakonun at nafon sat fagsegan. 16Tibaginan ay ngay baguama ban mananfamubay sat ngay baguina ay manafaylatan ban nanseg at ngay fagsegan.

17“Lag am kawat tibak fagsegan.

18“Falganani kafag fagmafulun sabaliwa Tinapay at yud e Famabia, kata ku suguan ayu te, kaduge fituk menit ay fakonun fag tinapay at yud yakman e famabia. Namakamulun am takatatuy si ku nafalganan fag buknga sis Abib fag magdanun, aroro ginanya fag magdanun nung am galin siginans talun Igiptu.

19“Fagayu ay ngay baguama tiba kaka angku wan, ay anggan fagayu ay fagbaugun at riangan tama taguna. 20Nu kesug wayam ay fagbaugun asnu taguna at riangan, bangsii sik riangan tupa. Dewa katanya, nu dway am kaylat gbangsi, gatvngi kafag asnu at bini liug. Ay masine nu gfae famangsi laman say ngay mesa baguama tiba kaka.

“We mafakbang angku nu dway e buba fanggalangun.

21“Nu gfakamulun am, unumk menit, ay sis fafituk menit, famiangalayi, dewa sis buknga fangalian daga ay fanggutluan.

22“Afuli tua gugat galay fagmafulun sabaliwas Fanggutluan, siginan nu namuba am ay gutluan taguna. Ay afuli yangay gina Taguyan fag Fanggutluan, galay fakatabuan banwa.

23“Tulu ginan galay banwa ay ngay mangama nu nangaful sas fagmafulun laman nanseg angku, Yawi ay Fun, Israel at Dius. 24Gaiyan kwa ban ngay taw tagbanwan sanya fag talun, ay gfabia kyay ban ay fagbanwanan fag daga. Ay wa ban e namawayan ya ayu ay wa ban e nangago ay fagbanwanan kaduge am maful tulu ginan galay banwa laman nanseg angku; au ay Dius Yawi.

25“Lag am gfon sa angku taguk gasfuan tinapay at ke famabia. Ay lag am gfasawad ya laman ban sas balabag ay nafon angku fag fagbaugun sas fagmafulun sabaliwas Tagbarita nu Glangfe.

26“Bubai sa ay Dius Yawi at bale ay ngay gutluan taguna.

“Lag gfatama sik kambing riangan nu at mina way at susu bilug at fansabo.”

27Yawi nalong sas Muisis te, “Riruki tuy ku nalong aroro tuy ban ay fagaloan ay at nasadian sa emu ay sas Israel.” 28Sanya, Muisis nu gfadgaloan Yawi, at kadugean ufatk safuluk menit ay ufatk safuluk yabi. Kadugenya wa batang gfangon ay ginum. Muisis nariruk sa sangay dalifi at nasadian fag safuluk suguan.

29Ay Muisis natustus siginans Buksul Sinay, gbuba kafag duak dalifi sanya nu marirukan Dius at ngay suguan, ay kanya wa saful te, at kamatan masulo aroro nafakamatoan Dius. 30Ngay taw Israel ay Arun nu nalag Muisis at kamatan nu masulo, kalimu nangakbang. 31Dewa katanya, Muisis nauro Arun ay at ngay tagfangguna ay gfakamatoan anya fagayu. 32Sanya ginan, ngay taw Israel ankakbang yangay sas Muisis. Ay Muisis nafoyung Yawi at suguan fagayu, at nafon sa anya sis Buksul Sinay.

33Muisis nu ntabu gfakamatoan ngay taw, kanya nafae fantabun at kamatan. 34Ay Muisis galay gsakbo sas Bale Fagnangablanganan laman namakamatoan Yawi, gbul yay at fantabun sit kamatan. Ay nu gduksun wan, gtabun yay at mata ay gfoyung sa sangay taw Israel Yawi at ngay suguan. 35Muisis at fagnatabunun at kamatan laman ngay taw Israel di kasulo. Ay kanya nu gdog yay nanakbo sas Bale Ramit nabul yay fia at fantabun at kamatan laman gfakamatoan Yawi.

Currently Selected:

Nu Galin 34: OCCT

Highlight

Copy

Compare