Nu Galin 30

Fagirugan Famaebebanglu

Gln 37:25-28

1“Namawat o fagirugan famaebebanglu siginans akasya. 2Fasudsudani at fugungan sadik siu at kabaan ay anggan at kadaulan. At kabatan sadik sangbada ay e katai sik sunge sas galay sadik fugungan, gasfuan wan nu kawat kanya fagayu. 3Ay dafuti gintu sat tungud ay sat ufatk tigyangan ay sat sunge. Ay nanrarus o am nalanang sa sangaba ligung. 4Ay awati duak buksung at fangawat gintu, gsumbalian sis dua tigyangan laman fagfasulunan famuba. 5Ay nangawat o famuba siginans akasya ay dafuti gintu. 6Folii sas day Fagsuadan Nasadian at famalabag fag ramit. Sanya ban nu nangablangan ta.

7“Galay balabag, Arun, gina nafasalung ngay salung, kanya nangirug sik famaebebanglu sanya fag fagirugan. 8Ay sfafun gina nafasalung ngay salung, gdog yay nangirug at famaebebanglu. Irugi ban gugat sis Yawi at daga salubangan at mabebanglu. Masine nu gfakamulun am katanya anggan ban sat fadogan ay kasugfunanan. 9Lag am girug stae fag fagirugan tibak famaebebanglu, ay at yud masine fag fagirugun fag fanggalangun, ay fanggalangun laman sas fagmanabayanun, ay fanginum fag fanggalangun. 10Galay sik banwa, sayginan Arun nu nanrarus sas fagirugan at ngay sunge taguk tagsiginans famalyam asalanan fag fanggalangun. Fakamuluni ban takatanya galay banwa, anggan ban sat fadogan ay kasugfunanan. Aroro tuy fag fagirugan mafasamanan fia sa angku.”

Salapi Famalyam Asalanan

11Sanya ginan, Yawi nalong sas Muisis te, 12“Nu nariruk ban o Israel at ngay ngayan, kayu ban at kinriruk gfon sa angku sik famayad laman sat leleg, laman di e fagidapun takadasug sa anya fagayu kaduge o gtap anya fagayu. 13Galay sik taw at kintap at famayad sik lifung salapi, kayu sik tagfon fanggalangun at salapi. Kanya at fanggalangun sa angku. 14At masine gfon sa angku fanggalangun, at banwa duak safulu sat tungud. 15At maramraman lag gfasawe nu gfon, ay at ngay yud e kwa dangay gfakurang. 16Kafag salapi ban famayad nusnge wain si ku bale#30:16 ku bale: sas Ebreu, Bale Fagnangablanganan. Anggan t.18, 20-21, 26-28, 36. at fagayudanun. Kanya fag salapi famayad taw Israel at leleg laman ban gamatang ktua gugat anya fagayu.”

Fagfegusan

Gln 38:8

17Yawi nalong sas Muisis te, 18“Awati sik fagfegusan ay anggan at fagfatungkudan at mawatan siginans tansu. Ay kanya fasai swabilug ku bale ay fagirugan fanggalangun ay fapnui mamam. 19Kanya Arun talamean at fagfegusan at ngay daluap ay at ngay darafa. 20-21Talamean namegus at ngay daluap ay at ngay darafa galay nansakbo sa ku bale, ay galay nangakbang sas fagirugan laman namon sa angku ngay fagirugun fag ngay fanggalangun. Katanya at fakamulun laman di kabul. Takatanya fag faugali Arun ay at ngay kasugfunanan at fagaloan ban kabavn.”

Fanrarus fag Langis

22Yawi nalong sas Muisis te, 23“Namul o sik masine fia fag ngay fangawat: unumk fabudbungguan lune, tuluk fabudbungguan sinamun at masine nu kayuk, tuluk fabudbungguan kata sik ngawe at mamam. 24Unumk fabudbungguan kasia (kabyat ngay tagfon fanggalangun at famabudbungguan at kabyatan), ay sadik baringan langis ulibu. 25Ay siginan kanya fagayu, mawat o at fanrarus fag langis at mabebanglu, at mafalganan sas Dius. 26-28Rarusi sa ku bale ay sas Fagsuadan Nasadian fag fagfatungkudan ay fagayu at fagagbilugun, ay sas fagfolian salung ay fagayu at fagagbilugun, ay sas fagirugan famaebebanglu, fagirugan fanggalangun ay at ngay fagagbilugun, ay fagfegusan ay anggan at fagfatungkudan. 29Fatigwanani laman sa angku kanya fag ngay fagagbilugun laman di e kalong. Ay nusnga sinu at nated kafag ngay fagagbilugun, mafasamanan laman sa angku.

30“Rarusi yangay langis sas Arun talamean laman sik famasaful te, sik ngay tagfon fanggalangun sa angku. 31Longi sa sangay taw Israel te, Kafag fanrarus fag langis mafalganan sa angku laman ban sat fadogan ay kasugfunanan. 32Lag am grarus sa ay ngay bilug, ay lag yangay kawat nu sa way ro lang ay sadili. Aroro tuy mafalganan sa angku, nu katanya, tuyani te, mafasamanan laman sa angku. 33Nusnga sinu at nagbilug tuy fag langis at mabebanglu, ay at nararus sat yud tagfon fanggalangun, aiyani wan anya siginan at ngay kaiban.”

Famaebebanglu

34Yawi nalong sas Muisis te, “Namul o tagsudsudan at kayuan at mabebanglu fag ngay famasuglat: lune, unika, galbanu,#30:34 unika ay galbanu, duak dalan fun kayu at ke lune mabebanglu. ay at yud e suglat fag famaebebanglu. 35Siginan kanya fag ngay famasuglat, nangawat o sik famaebebanglu fag lune. Sanya ginan, fasuglati sanya barara laman umsik famaebebanglu fag lune ay at mafasamanan fia. 36Ay tiba, rufai ayu sirut, ay faramsigi sis salubangan Fagsuadan Nasadian at mafasakboan si ku bale, nu inda nu nangablangan ta. Tuyani te, kafag famaebebanglu Mafasamanan laman sa angku. 37Lag am gagbilug kafag famaebebanglu nu sa way ay ngay sadili fakaylatun. Tuyani te, tuy mafasamanan laman sa angku. 38Nusnga sinu at nagbilug kafag famaebebanglu laman sat sadili, tuyani anya te, bunwa kaiban ya.”

Currently Selected:

Nu Galin 30: OCCT

Highlight

Copy

Compare