Nu Galin 29
29
Nu Gfatigwanan Arun Talamean laman sik ngay Tagfon Fanggalangun
Leb 8:1-36
1“Katatuy am fakamulun nu gfatigwanan o Arun talamean laman ban sik ngay tagfon fanggalangun sa angku. Namul o sik riangan baka tama ay duak tupa tama at yud e malong. 2Ay siginan at masine fag fangawat tinapay at yud e famabia, awati ngay tinapay at madamvl at mafasuglatan langis, ay at mayangfis at mararusan langis. 3Sanya ginan, kanya fag ngay tinapay fasai sbang ay foni sa angku gasfuan kanya fag riangan baka tama ay fagduak tupa tama.
4“Tabani Arun fag talamean sas Yawi at sakbawan bale,#29:4 Yawi at bale: sas Ebreu, Bale Fagnangablanganan. Anggan t.10, 11, 30, 32, 42, 44. ay faigusi. 5Ay sanya ginan, fasuluni sas Arun lanbung tagtayuk at bilug, tangaba fag lanbung, ay anggan at mafamilian fia fag lanbung,#29:5 mafamilian fia fag lanbung: sas Ebreu, efod. ay tagsis dubdub fag famalanib ke fagsuadan. Siuki at mafamilian fag ramit siginans famutus fagwan. 6Fasangboani, ay folii sanya fagrirukan, sik fagtoglagan te, mafasamanan laman sas Yawi. 7Namul yangay o langis ay ugwagi sas Arun at alfuyu sik fakatoglagan te, nafatigwanan o anya sa angku. 8Tabani yangay at ngay baguama ay fasuluni yangay at ngay lanbung tagtayuk at bilug, 9ay at famutus fagwan ay sangbo. Kanya fagayu umsik ngay tagfon fanggalangun kabavn kata sik faugali at yud katabu. Katanya nu gfatigwanan o sa angku Arun talamean.
10“Tabanani riangan baka tama sis salubangan Dius at bale ay Arun talamean namasa kafag baka at tungud alfuyu at ngay daluap. 11Sanya ginan, filasi kanya fag baka sis Yawi at daga salubangan, sat sakbawan bale. 12Namul o baka at taguk ay fasurungi am sumyu ay rarusi sas fagirugan at ngay sunge, ay at sawad ugwagi sas daga fagirugan. 13Ay sanya ginan, buli kafag baka at taba tagsisad ungdan, ay tagbia fag afud dangdangun, ay at amuslun fagdua ay anggan at taba, ay irugi sas fagirugan. 14Dewa katanya, sai ways day fagmafulan nu nangirug am at bilug, at balat, ay at bitua laman fanggalangun famalyam asalanan.
15“Sanya ginan, buli sik tama tupa ay Arun talamean namasas tupa at tungud alfuyu at ngay daluap. 16Ay filasi kafag tupa, ay faramsigi at taguk sas fagirugan at ligung. 17Ramyuki ayu sirut kanya fag tupa ay fegusi at tagsisad basad bilug ay at ngay si, ay fafuli anggan at alfuyu ay tiba ya at afud bilug. 18Fagayu tuy irugi sas fagirugan laman gfalag te, gfauseganan am angku. Ay guseganan au at mabebanglu fag ayuk siginan kafag fagirugun fag fanggalangun.
19“Ay sanya ginan, namul yap o gayvd sik tupa, ay Arun talamean namasas tupa at tungud alfuyu at ngay daluap. 20Filasi kafag fagbaugun ay buli tiba at taguk, ay rarusi sas talamean at ngay talinga tagsit siun baliwa, ay sat sumyu tama daluap ay darafa tagsit siun baliwa. Sanya ginan, faramsigi at sawad fag taguk sa sangay ligung fagirugan. 21Namul o tiba at taguk tagsis tungud fagirugan ay fagamuti sas langis fanrarus,#29:21 fanrarus: ay mannga, fangugwag. ay faramsigi sas talamean anggan sat ngay lanbung laman kanya ay anggan at ngay lanbung mafasamanan sa angku.
22“Ay sanya ginan, buli tupa at taba, ay taba tagsit iug, ay fagayu taba sad basad ungdan, ay at masine fag afud dangdangun ay amuslun fagdua, anggan tagsanya fag taba, ay at siun fag balangbang. Kata kanya ay fanggalangun nu gfatigwanan sa angku sik tagfon fanggalangun. 23Buli siginans bang sik tinapay at mabalulang, ay sik madamvl fag tinapay at mafasuglatan langis, ay sik mayangfis fag tinapay at mararusan langis. Fagayu tuy fanggalangun laman sa angku. 24Fagayu tuy foni sas Arun talamean ay gfabat sa nu gseg angku. 25Buli tuy siginans talamean ay irugi sas fagirugan gfasfuan at fagirugun fag fanggalangun. Ay at mabebanglu fag ayuk tagsiginan sad afuy gfauseganan angku. 26Buli yangay kafag tupa at dubdub ay fabati sa ku daga salubangan laman gfili au Arun talamean laman sik tagfon fanggalangun. Kafag afud fanggalangun am ekwan.
27“Fasamani sa angku Arun at ekwan fag dubdub am nafabat ay at fanggalangun fag afud balangbang, gina gfili Arun talamean laman sik ngay tagfon fanggalangun. 28Katatuy ban gugat ngay taw Israel nu gfon sas Arun talamean. Kanya siginans taw Israel at ngay fanggalangun sik afud laman sas nasadian sa angku.
29“Ay Arun ban nu nbul wan, foni at mafasamanan fag ngay lanbung sat ngay baguama at nantubus anya, ay gina bagu nansulun kafag ngay lanbung, rarusi langis sat ngay alfuyu, sik fakatoglagan te, nafatigwanan o anya sa angku laman sik ngay tagfon fanggalangun. 30Arun at baguama tagtubus anya laman sik tagfon fanggalangun, ay gsulun kafag ngay lanbung kaduge fituk menit gina nansakbo sat Mafasamanan fag Suluk sas Yawi at bale.
31“Namul o sik yamas tupa ay fatamai sat mafasamanan fag bale.#29:31 Damai Lebitiku 8:31. Nafatama sas day sakbawan alad Dius at bale ramit. 32Ay Arun talamean gasfuan kon kafag yamas ay tagsis bang fag tinapay sis Yawi at sakbawan bale. 33Talamean way lang at masine kon yamas ay tinapay at fanggalangun laman famalyam asalanan. Ay tibak taw wa masine kon aroro kafag fakonun mafasamanan laman sa angku. 34Ay kafag fakonun nu nke sawad way, balabag di, irugi wan. Lag kon ya, aroro mafasamanan laman sa angku.
35“Fakamuluni ku suguan emu sabaliwas Arun talamean. Ay fatigwanani talamean kaduge fituk menit. 36Falganani galay menit sik baka laman sik fanggalangun famalyam asalanan ay sa nu masadi sa angku. Nu katanya, fagirugan ansine wan. Ay nanrarus o sanya sik langis laman mafasamanan sa angku. 37Namakamulun o katanya kaduge fituk menit. Ay nu katanya, fagirugan mafasamanan fia sa angku, ay at nanted tuy, mafasamanan yangay sa angku.
Nu Gfon Fanggalangun Kayu Menit
Tap 28:1-8
38“Galay menit, duak tupa tagsik banwa am fagnangirugun sas fagirugan laman sik fanggalangun. 39Foni at sadi sis balabag, ay at sadi sis fafun. 40Ay gina o namon sbalabag, foni yangay at masine fag fangawat tinapay, at kayuan duak fabudbungguan. Ay fae suglati sik baringan langis at naturis siginans ulibu at rawvg. Ay foni yangay sik fagsuadan fanlangu sik fanginum fag fanggalangun. 41Fakamuluni yangay takatanya sas faduak tupa ay fagnamonun galay fafun. Fasfuani yangay foni sik fanggalangun famauseganan angku ay sik fanggalangun fag fanginum. Kanya at fagirugun fag fanggalangun, ay at ayuk at mabebanglu sik famauseganan angku. 42-43Kata at nairug fag fanggalangun, masine anggan ban sat fadogan ay kasugfunanan nu gfon ban gugat kayu menit. Ay namubai tuy sa ku salubangan, sa ku bale at sakbawan nu inda nu nangablang au ayu ay nu namakamatoan au ngay taw Israel, ay namasaman au ku bale siginan ku kamasuloan. 44Anud, namasaman au ku bale ay fagirugan fanggalangun. Ay namasaman kyangay Arun talamean laman sik ngay tagfon fanggalangun. 45Namasfuan au namanwan sa sangay taw Israel ay au wan kanya fagayu at Dius. 46Ay kanya fagayu sumaful te, au wan Yawi kafag ngay taw at Dius at nafalangfe anya fagayu siginans talun Igiptu laman namasfuan au anya namanwan. Anud, au wan Yawi, kanya fagayu at Dius.
Currently Selected:
Nu Galin 29: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
