Nu Galin 28

Ngay Tagfon Fanggalangun at ngay Lanbung

Gln 39:1-7

1“Namasaman o siginan sangay taw Israel, Arun ay at ngay baguama: Nadab, Abyu, Elyasar, ay Itamar, laman ban sik ngay tagfon fanggalangun. 2Fawati at yud e mamalong fag ngay lanbung laman sam kaka Arun laman gfauseganan anya. 3Nanlong o sas fagayu ku nafae fagsafulun kawat lanbung te, Awati Arun at ngay lanbung at fagsulunun gina gfasaman anya siginans fagngayuan taw laman sik tagfon fanggalangun. 4Katatuy at fagnangawatun fag ngay lanbung: ke famalanib sit dubdub, ay mafilian fag lanbung, ay takalag fag lanbung, ay tagtayuk at bilug fag lanbung at nafae riruk, ay sangbo, ay famutus fagwan. Ay awati yangay ngay lanbung at mafasamanan sa angku, Arun talamean at fagsulunun, famasaful te, sik ngay tagfon fanggalangun. 5At fangawat kafag ngay lanbung, gintu, ay ramit melo, maubian ay maraska, ay at masine fag ramit.

At Mafilian fag Lanbung

Gln 39:2-7

6“At mafilian fag lanbung mawatan siginan at masine fag ramit, tagridrirukun gintu ay melo, maubian ay maraska. 7Kafag lanbung e duak afud; sis day guyuy ay sis salubangan, ay kafag duak ramit mesa masayangan sis lafi. 8At famutus fagwan mawatan yangay siginan at masine fag ramit, tagridrirukun gintu ay melo, maubian ay maraska.

9“Buli duak gang mafanud tagridrirukun ay riruki sanya Akub at ngay baguama at ngay ngayan. 10Riruki at ngay ngayan siginan tiba kaka anggan sitsigon at fuyu. Unumk ngayan am fagrirukun sas galay sik gang. 11At nanriruk sanya fag duak gang sik tagsafuli fia griruk, kata sik fagtoglagan nu marirukan. Sanya ginan, kafag duak gang fasais famakvd at mawatan siginans gintu, 12ay kanya fag duak gang fasai at mafilian fag lanbung at lafi laman sik famamatang Israel at ngay kasugfunanan. Ay siginan ban takatanya, Arun namuba way gugat kafag ngay ngayan sas Yawi at salubangan. 13Awati kafag ngay famakvd siginans gintu, 14ay salodi sanya duak salambitan yud e suglat fag gintu at masawaluan.

Tagsis Dubdub fag Fagsuadan

Gln 39:8-21

15“Namawat o sa sik tagsaful kawat, sik fagsuadan tagsis dubdub laman fanginsaful Dius at fakaylatun. Nu mawatan fakatai at mafilian fag lanbung. At fangawat at masine fag ramit, tagridrirukun gintu ay melo, maubian ay maraska. 16Ay kafag fagsuadan gsud at kabaan dewa nday fag fungfung nu mafalutan, sadik dango at kabaan ay sadi yangayk dango at kadaulan. 17Ay folii ufatk talad at mafanud fag ngay gang. Sis fasadik talad, fasanyai sik gang maraska, sik gang melo gladlaksiun, ay sik gang melo gadganyangun, 18ay sis faduak talad, sik gang melo madalusan, ay sik gang gmedmeloun, ay sik gang melo gbudbugulun, 19ay sis fatuluk talad, sik gang gakaraskaun, ay sik gang madalusan, ay sik gang masialungan, 20ay sis faufatk talad, sik gang gladlaksiun, ay sik gang tagridrirukun, ay sik gang mameloan.#28:17-20 kafag ngay gang sis Faniganun: rubi, topaz, beril, esmeralda, safiro, turkois, hasinto, agata, ametista, krisolito, onix, jasper. Namoli o kafag ngay gang sas fagfatungkudan mawatan siginans gintu. 21Marirukan sis galay sik gang Israel at baguama at sadi. Ay kafag ngay ngayan marirukan famamatang sas labi duak kasugfunanan.

22“Awati sik ngay salambitan at masawaluan at mawatan siginan at yud e suglat fag gintu, laman famakvd kafag fagsuadan. 23Ay fawati duak takatas fanumyu at mawatan siginans gintu ay rabingi sis galay sit tungud fag fugungan fagsuadan. 24Fasuluni sanya fag duak fanumyu kafag ngay salambitan. 25Ay mesa salambitan at fungfung sayangi sas famakvd ay fasai at mafilian fag lanbung at lafi sfagunan. 26Ay fawati yangay duak takata fanumyu siginans gintu ay fasais fagsuadan sit daga baliwa fag duak fugungan, tagtayuk sit mafilian fag lanbung. 27Fawati yangay duak fanumyu mawatan siginans gintu, ay fasais mafilian fag lanbung sabaliwas famutus fagwan. 28Sanya ginan, tabingi fagsuadan tagsis dubdub siginan at mafilian fag lanbung, siginan sik fantabing mameloan, laman kafag fagsuadan si tuas tungud famutus fagwan ay di glelegan.

29“Galay ban Arun gsakbo sat Mafasamanan fag Suluk, gsulun at ke famalanib tagsis dubdub at marirukan Israel at ngay kasugfunanan laman ban gamatang ktua gugat anya fagayu. 30Fasais lanib tagsis dubdub Urim ay Tumim#28:30 Urim ay Tumim: duak fanginsaful Dius at algan. laman si tua gugat sArun at dubdub galay gsakbo sa ku salubangan. Nu katanya, kafag fanginsaful si tua gugat sArun at dubdub laman sa sangay taw Israel.

Tagfon Fanggalangun at Lanbung Tiba

Gln 39:22-31

31“Takalag fag lanbung fagdaul fameloi way lang. 32Ay fae fagliugani sit wabilug. Ay faluti ay tiklisi at ligung laman di karasras. 33-34Fae famasinei sas fungfung lanbung kata rawvg at fangawat faniklis melo, maubian, maraska, ay fasai swabilug sik ngay takadkalingan. 35Masine Arun nu galanbungan takatanya gina nansakbo ay gduksun sat Mafasamanan fag Suluk. Kanya ban di kabul nu gfakamulun tua takatanya.

36“Namawat o sik fagrirukan siginan at yud e suglat fag gintu, ay riruki sanya takatatuy fag ngay longan: ‘Mafasamanan laman sas Yawi.’ 37Siuki sas Arun at fansifig alfuyu at fagunan kafag fagrirukan siginan sik fansiuk melo, 38laman kalag tua gugat sit dangasan, ay gfalag te, kanya gbuba nusnge wain taw Israel at ngay asalanan gina gfon sas Yawi. Kanya fag fagrirukan fasii way gugat sArun at dangasan laman Yawi kaylat tua ngay taw.

39“Arun at lanbung tagtayuk at bilug ay anggan at sangbo mawatan siginan at masine fag ramit. Fawati at famutus at fagwan sas tagsaful fia gfariro. 40Awati yangay tagtayuk at bilug fag ngay lanbung ay sik ngay famutus fagwan ay ngay sangbo laman sas Arun at ngay baguama laman ngay taw gtoglag tua gugat anya.

41“Fasuluni sam kaka Arun ay sat ngay baguama kafag ngay lanbung, ay ugwagi#28:41 ugwagi: ay mannga, rarusi. langis sa kafag talamean sik fakatoglagan te, nafatigwanan wan sa angku laman sik ngay tagfon fanggalangun.

42“Awati yangay tagtayuk at bilug fag lanbung at mawatan siginan at masine fag ramit. At kabaan siginan at rawang sitsigon at balangbang. 43Kafag lanbung nangus Arun talamean at fagsulunun galay gsakbo sas Dius at bale,#28:43 Dius at bale: sas Ebreu, Bale Fagnangablanganan. ay nung way kakbang sas fagfonan fanggalangun sat Mafasamanan fag Suluk, laman di e fagmauriun ay di kabul. Tuy fag suguan Arun ay at kasugfunanan at fagaloan kabavn ban.

Currently Selected:

Nu Galin 28: OCCT

Highlight

Copy

Compare