Nu Galin 27
27
Fagirugan Fanggalangun
Gln 38:1-7
1“Namawat o sik fagirugan fanggalangun at fangawat akasya. Fituk siu at kabaan, fitu yangayk siu at kadaulan ay ufatk siu at kabatan. 2Fae katai sunge sis ufatk fugungan gasfuan nu kawat fagirugan, ay dafuti tansu. 3Ay fagayu fagirugan at fagagbilugun awati siginans tansu: fantaga dafug, ay tagbia fag ngay saruk, ay taya fagsuadan famaramsig fag taguk, tagbia fag ngay fansaruk at ke sarangan fanguyut yamas, ay fagsuadan singsing afuy. 4Namawat yangay o fagsugban yamas sas fagirugan mawatan siginans tansu, ay awati ngay baklo siginan yangays tansu sas galay fugungan. 5Ay folii kafag ngay baklo sis wabilug fagfatungkudan sas daga fagirugan. 6Namawat yangay o famuba kafag fagirugan mawatan siginans akasya at madafutan tansu. 7Folii famuba sa sangay baklo tagsis tigyangan fagirugan tagsumbalian laman mabuba. 8Ay am fagfawatun fagirugan sik ngay turuk at yud e bilug sad basad. Namawat o fagayu takatanya kata ku nalong emu gina o sis tungud buksul.
Fagnansegan fag Bale Ramit at Alad
Gln 38:9-20
9“Fae aladi si ku day bale, ay fatungluani at masine fag ramit at kabaan sabaliwas siun fag alvngvdan limak safuluk sangbada. 10Rabingi ramit sas duak safuluk turuk tansu at mafatungkudan sat mesa fagfatungkudan fag sanbung salapi, ay at fagrabingan kafag ramit ay at ngay famaogat at fangawat sanbung salapi. 11Ramit at kabaan sabaliwas wala fag alvngvdan limak safulu yangayk sangbada. Rabingi yangay sas duak safuluk turuk tansu mafatungkudan sat mesa fagfatungkudan fag sanbung salapi, ay fagrabingan kafag ramit ay at ngay famaogat at mawatan siginan sanbung salapi.
12“Ay ramit tagsibaliwas fakayabian at kabaan limak safuluk siu. Ay rabingi yangay sas safuluk turuk at mafatungkudan sit mesa fagtungkudan. 13Ay tagsibaliwas fakamenitan fag ramit, at kabaan limak safuluk siu. 14Fagawean at sakbawan si baliwas fakamenitan, ay e ramit faningding gsumbalian. Tagsis fasiunan fag ramit at kabaan labi limak siu, ay rabingi sas tuluk turuk at mafatungkudan sit mesa fagtungkudan. 15Ay tagsibaliwas wala fag ramit, at kabaan labi limak siu, ay marabingan sas tuluk turuk at mafatungkudan sit mesa fagfatungkudan.
16“Ay faningding sakbawan alad fag ramit at kabaan duak safuluk siu, mawatan siginan at masine fag ramit, ay fae ridrirukani faniklis melo, maubian, ay maraska, famasinei mandi nu gridrirukun. Rabingi sas ufatk turuk at mafatungkudan sit mesa fagfatungkudan. 17Sas fagayu turuk alad fawati at ngay famaogat ay at ngay fansayang mawatan siginans sanbung salapi ay at fagfatungkudan fawati siginans tansu. 18Ay fagawean fagdaul, ufatk safulu limak sangbada at kabaan ay duak safulu e tulu at kadaulan, matunglu at masine fag ramit at kabatan limak siu gsugfunan ay at ngay fagfatungkudan turuk mawatan tansu. 19Fagnansegan fag Bale Ramit at ngay fagagbilugun fagayu at fangawat siginans tansu, anggan fagtabingan lubyang fag ngay turuk.
Nu Galaga Salung tagsis Fagnansegan fag Bale Ramit
Leb 24:1-4
20“Sugui sa sangay taw Israel te, namubai sa emu langis ulibu laman ngay salung gigang tua gugat. 21Ay Arun talamean ban tagalaga kafag ngay salung si ku bale,#27:21 ku bale: sas Ebreu, Bale Fagnangablanganan. sis day ramit faningding Fagsuadan Nasadian, laman ban gigang tua gugat si ku daga salubangan siginan nu bagu kayabi sitsigons balabag. Tuy fag faugali ngay taw Israel at fagaloan ban kabavn, anggan at ngay kasugfunanan.”
Currently Selected:
Nu Galin 27: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
