Nu Galin 26
26
Fagnansegan fag Bale Ramit
Gln 36:8-38
1“Katatuy am fagnamawatun fag Fagnansegan fag Bale Ramit. At ngay fangawat: safuluk girat at masine fag ramit, melo, maubian, ay maraska. Ay sugui sa tagsaful kawat te, fae aninui kafag ngay ramit ngay awatan at ke fakfak. 2Kanya fag ngay ramit fasudsudani, at kabaan labi limak sangbada ay at rafad duak sangbada. 3Fasugfunani mesa lima, 4ay namawat o sik ngay buksung ramit melo matiklisan sit mesa fungfung. 5Fawati limak safuluk buksung ramit sit mesa fungfung masugfunan fag limak ramit. 6Ay fawati yangay limak safuluk fagtabingan siginans gintu laman famasugfun kafag duak ramit. Nu katanya, umkawat Fagnansegan fag Bale Ramit.
7“Namawat o labi sadik girat fangugun bale ramit, at fangawat siginans kambing at sigyu. 8At kabaan galay sik girat, labi limak sangbada, ay at kadaulan duak sangbada. 9At lima fasugfunani, ay fakatanyai yangay sat sawad fag unum. Ay at faunumk afud faluti ay fasais salubangan bale ramit. 10Awati yangay limak safulu kata fanumyu ramit at fagtadtabingan fag duak ramit at fungfung, 11ay fasanyai kanya fag limak safuluk fansayang tansu. 12At sawad fag ramit at wabilug fabaringbingani sas day guyuy bale, 13at sawad at fantabun bale ramit fabaringbingani sa sangaba tigyangan bale, at kabaan sik darafa ay sik wabilug. 14Sis tungud fangumut falanibi tupa tama at balat at mafaraskan ay nafalanib yay fia at masine fag balat.
15“Ay fauyugani wan bale ramit, sik balse akasya. 16Galay sik balse at kabaan limak sangbada ay at kadaulan sik siu. 17Folii duak famataba sas galay sik balse laman famasugfun sat sadik balse. Fakatanyai sas fagayu balse. 18Kafag duak safuluk balse, kanya at faningding bale sas siun baliwa fag alvngvdan. 19Kafag ngay balse fasudsudani nu mafatungkudan sas ufatk safuluk fagfatungkudan fag sanbung salapi; galay sik balse duak fagfatungkudan. 20Ay sis wala fag alvngvdan bale, fasanyai yangay duak safuluk balse faningding, 21ay fasudsudani yangay nu mafolian sas ufatk safuluk fagfatungkudan at mawatan sanbung salapi. 22Ay sas fakayabian baliwa, fasanyai unumk balse faningding, 23ay duak balse galay fugungan. 24Fasugfunani ngay balse galay fugungan, siginan at daga anggan sat tungud. Fakatanyai ay fakamulun tagsi sangaba tigyangan fag duak balse. 25Nu katanya, sis day guyuy bale, waluk balse, ay mafasudsudan nu mafolian sas labi unumk fagfatungkudan fag sanbung salapi, galay sik balse duak fagtungkudan.
26“Namawat yangay o ngay bakban siginans akasya, lima si baliwas alvngvdan, 27ay lima yangay sa sik fungfung alvngvdan, ay lima yangay sas fakayabian baliwa sis day guyuy bale ramit. 28At fagaloan at bakban sis wabilug, siginan sik fungfung ay gdasug yangay sa sik fungfung. 29Dafuti gintu sa sangay balse, ay fasanyai yangay sik ngay buksung mawatan siginans gintu, ay dafuti yangay gintu sa sangay bakban.
30“Fawati Fagnansegan fag Bale Ramit, kata ku foyungan emu ste sis tungud buksul.
31“Fawati yangay sik famalabag at fangawat ramit melo, maubian, maraska ay at masine fag ramit, ay awati sanya fag ramit sik awatan at ke fakfak at aninu. 32Ay sayangi kafag ramit sa sangay fagsayangan mawatan siginans gintu sas ufatk turuk at madafutan gintu. Kanya fag ufatk turuk mafatungkudan sis ufatk fagfatungkudan mawatan siginans sanbung salapi. 33Nu nasayang wan kanya fag ramit sanya fag ngay fagsayangan, fasakboi sanya fag suluk Fagsuadan Nasadian. Ay kanya fag ramit fanwabilug at Mafasamanan fag Suluk ay at Mafasamanan Fia fag Suluk. 34Fasakboi Fagsuadan Nasadian sat Mafasamanan Fia fag Suluk ay fae suklubi. 35Folii fagfatungkudan tinapay sas day Mafasamanan Fia fag Suluk at day guyuy si baliwas wala fag alvngvdan bale ramit. Ay folii salung sis siun fag alvngvdan, sis aturunan fagfatungkudan tinapay.
36“Fawati yangay sadi yak ramit laman faningding bale ramit at sakbawan, at fangawat at masine fag ramit tagridrirukun melo, maubian, ay maraska. Ay famasinei mandi nu mawatan. 37Ay sayangi kafag ramit sa sangay fagsayangan at mawatan siginans gintu sis turuk fag lima at madafutan gintu. Kanya fag limak turuk mafatungkudan sis limak fagfatungkudan at mawatan siginans tansu.
Currently Selected:
Nu Galin 26: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
