Nu Galin 23

At Matuyan nu Gfawabilugan

1“Lag am gfansulit at yud matuyan. Lag am kamuagan laman ggubuk sik taw at mauri.

2“Dangay am galoan sas fagngayuan nung way gfakamulun at mauri. Nung am gfatuyanan sa sik malong, lag gfadiuganan at fagngayuan laman gsaruy at matuyan. 3Lag am gafaylatan at yud e kwa at malong aroro siginan at kayaunanan.

4“Nu nalag am ay fawayan at baka, ay mannga at asnu nu malfasan, masine nu namafoli am sa tagbilug. 5Nu nalag am ay fawayan at asnu nu kataygilid aroro siginan at kabyatan at buba, lag am gfabayan, abat ngate, gubuki way anya falindugi.

6“Fae katuyanani tua fia at ngay yud e kwa at ngay malong. 7Lag am gfantabugan at yud matuyan say iba, ay lag am gfabul taw at yud e asalanan. Aroro gfaurianan kban fagayu tagfakamulun takatanya.

8“Lag am gbul famayad nung way lang sik famaylatan, aroro tuy gfalyam taw siginan at matuyan, ay wa mafafon fagmatuyanun sas taw at yud e asalanan.

9“Lag am kauri ngay betaw, aroro nasaful wam nu setain sik betaw at kayaunanan, aroro ebi, sik ngay betaw yangay am sis talun Igiptu.

Famiangalay fag Banwa ay fag Menit

10“Kaduge ban unumk banwa, mafananumun am ay magutlu am si ay daga. 11Ay galay fafituk banwa, lag am nantanum ya, ay nu e natugbung si ay daga ngay fananumun, lag gsalag at yud e kwa at nanggutlu laman ban at fakonun, ay nu nke sawad yay, fabayani wan sa tagsis talun fag ngay mangilafang laman at fakonun. Fakatanyai yangay ay fakamulun sa ay ngay tanuman ubas#23:11 ubas: sik wat fag tanum, at rawvg fangawat fanlangu. ay sa ay ngay tanuman fun ulibu.

12“Fakamuluni kaduge unumk menit ay lag am gfakamulun sis fafituk menit laman gfiangalay tuam, anggan ay ngay baka, ay anggan ay ngay asnu, ay anggan ay ngay fagsuguan, ay anggan fagayu ay betaw tagbanwan si ayu.

13“Faningi tua fagayu ku longan sa ayu. Ay lag am gdarangin sa tibak fagsegan nusdi taglong at ngay ngayan.

Galay Banwa fag Tuluk Fagmafulun

Gln 34:18-26; Deu 16:1-17

14“Galay sik banwa, tulu ginan am nanmaful laman namauseganan angku. 15Falganani kafag fagmafulun sabaliwa Tinapay at yud e Famabia, kata ku suguan ayu te, kaduge fituk menit ay fakonun fag tinapay at yud yakman e famabia. Fakamuluni ban takatanya si ku nafalganan fag buknga sis Abib fag magdanun, aroro ginanya fag magdanun ebi nu glao am siginans talun Igiptu.

“Galay am at sadi bubai ay mesa fanggalangun laman sa angku.

16“Mafuli ban gugat galay fagmafulun sabaliwa Fanggutluan siginan nu namuba am taguna ay ngay gutluan. Afuli yangay sabaliwa fagmafulun Taguyan fag Fanggutluan galay taguyan fag magdanun, gina am ganamafulun ay ngay gutluan siginan ay ngay gamasun.

17“Tulu ginan galay banwa ngay mangama nu nangaful laman nanseg angku, Fun Dius Yawi.

18“Lag am gfon sa angku taguk gasfuan tinapay at ke famabia. Ay lag am gfasawad ya ay nafon sa angku fag fagbaugun at taba laman ban sas balabag.

19“Bubai sa ay Dius Yawi at bale ay ngay gutluan taguna.

“Lag gfatama sik kambing riangan at fansabo nu at mina way at susu bilug.”

Dius at Tagbarita Namangguna ngay taw Israel

20“Katsi, nansugu au sa ayu ku tagbarita laman nangalaga ayu sa ku nafalganan fag talun. 21Dungugani anya ay faningi at ngay longan, ay lag am kauri anya, aroro fagayu at fakamulun, gfakamulun sa ku ngayan ay kanya wa gfabayan ayu laman diam gfataglayun sa ay ngay asalanan. 22Nu gfaning tua ban am at ngay longan, ay gfakamulun fagayu ku ngay longan, au wan at namawayan ay ngay fawayan. 23Ku tagbarita nangguna ayu, ay nantabanan ayu sa sangay taw Amur, taw Ket, taw Peres, taw Kanaan, taw Kib ay taw Ebus at talun, ay namamin kban anya fagayu. 24Lag ban am nanseg ay namaning at ngay fagsegan kata kafag ngay taw at fakamulun. Falyami at ngay fagsegan ay rufai tagfamatang fag ngay gang. 25Nanseg am angku, ay Dius Yawi, ay namon au ayu tangayu fag fakonun, ay mamam, ay namafia au ayu, 26ay siban ay talun ay ngay mangena at fafionan di e katong, ay we yud gngenge, ay gfaduge ktua ban nu gleleg am.

27“Ay ngay fawayan tagsi ay salubangan umlimu ay galakayan, ay kanya fagayu lumagyu. 28Namadasug au sa ayu ngay malege laman nanfangguna ayu, ay kanya fagayu nangaiyan ngay taw Kib, ngay taw Kanaan, ay ngay taw Ket. 29Dewa katanya, kya ban gaiyan anya fagayu kaduge sik banwa laman di kafabayan at ngay daga, ay anggan ngay mangilafang tagsisad talun di karagang nu kayu. 30Gfarimanan kban gaiyan anya yakmay am ankayu ay makatu nangagbilug kanya fag daga.

31“Namalganan au ay daga gfasigad siginans Dagat Maraska sitsigons Dagat Mediteranyu, ay siginans talun at yud e taw sas alvngvdan sitsigons Liskung Eufrates. Namababawan kban sa ayu at ngay kinsawad tagbanwan sanya fag daga, ay nangaiyan am anya fagayu. 32Lag am kawat sa anya ay nasadian, ay anggan sat ngay fagsegan. 33Lag ban am namabanwan anya fagayu si ay daga, aroro kanya fagayu mafoyung ayu sa nu gasalanan am sa angku. Ay nu naseg way ban am at ngay fagsegan, kanya ban umsik sangdaw sa ayu.”

Currently Selected:

Nu Galin 23: OCCT

Highlight

Copy

Compare