Nu Galin 22

Faugali sabaliwa ngay Fagagbilugun

1“Sik taw nung way nafangkamul sik baka ay mannga sik tupa, ay kanya nung way nafabul ay mannga nafalao, masine nu gbayad. Sat nafangkamul fag sadik baka at famangsi limak baka, ay sat nafangkamul fag sadik tupa at famangsi ufatk tupa.

2“Ay sik taw nu nafabul sik tagfangkamul sisad yabi gina gfangkamul, kanya fag taw we asalanan. 3Ay dewa katanya, nu siway swa menit nu gfabul kafag tagfangkamul, kanya fag taw e asalanan. Ay at nagamatan fag tagfangkamul, bayadi at nabul. Ay kanya nu dway e famayad, namabayadi anya laman sik fagsuguan ay at ngay nagbulan famayad wan at nabul. 4Ay at nafangkamul fag baka, ay asnu, ay tupa nu si yay anya, kanya bayadi duak kayu at nabul.

5“Sik taw at ngay fagbaugun nung way nanangon nusnge wain at ngay iba at tanum, bangsii siginan at masine fia at gutluan ay mannga at tanuman wat ubas.

6“Ay sik taw nu nasalung, ay anrarab ay nairug tibak taw at ngay gutluan ay at ngay fananumun, kanya fag taw masine nu gbayad at nasalung.

7“Sik taw nu nafalaga sat fasabale at salapi ay mannga nusnge wain fag ramraman ay nu nabulan way, ay at nabul nu nagamatan way, bayadi duak kayu at nabul. 8Ay dewa katanya, way nafagamat tagfangkamul, tabani at fagfalagan fag taw sa sangay tagwabilug sis Dius at salubangan laman nanginsaful te, o kanya nabul o mannga duan.

9“Ay duak taw gbadbaboan sabaliwa nu sinu si anya fag dua tagagbilug, kata baka, asnu, tupa, lanbung ay nusnge wain fag fagagbilugun, masine kanya fag dua nu namoyung at fagbadbaboanun sa sangay tagwabilug sas Dius at salubangan. Ay at nasalanan fag taw kata at ngay tagwabilug at longan, bayadi sa tagagbilug fia duak kayu at nabul.

10“Sik taw nu nafaalaga sat faduksay at baka, asnu, tupa ay nusnga setaw at fagbaugun, ay nu nbul way ay mannga narunguy ay e nafangkamul yud e nalag, 11masine at tagalaga nu namatuyan sas Yawi te, wa nabul at faduksay at ramraman. Ay at tagbilug masine nu gafanud wan, ay lag get ya famayad sanya fag tagalaga. 12Ay dewa katanya, nu e nafangkamul way kanya fag fagbaugun, tagalaga gbayad sat tagbilug. 13Tagfangagat fag mela nu nafabul way kafag fagbaugun, tagalaga masine nu gbuba kafag fagbaugun at sawad sa tagbilug laman at famatuyan, ay wa namayad ya.

14“Sik taw nu naulbus at iba at fagbaugun, ay kafag fagbaugun nu narunguy ay nu nbul way, ay tagbilug way sanya ginanya, kafag taw at naulbus bayadi fia. 15Dewa katanya, nu sanya tua tagbilug, at naulbus wa gbayad ya. Nu e gulbus sik fagbaugun, kanya foni yap sik famayad, ay kanya wan at famayad, kanya nu nafarunguy way ay nafabul.

Tiba yak Suguan

16“Sik mangama nu nafaylatan way sik baguina gina yud andadwa, ay nu nafataladan way anya, kanya fag mangama gbayad sanya fag baguina at talananan kata at fagetun. Ay kanya fag mangama bubayi wan kanya fag baguina. 17Kanya fag baguina at mama nu dway kaylat gfafamubay anya, kanya fag mangama gbayad yay fia kata kafag baguina at talananan at fagetun.

18“Fabuli wan ngay tagfangabalo.

19“Fabuli wan nusnga sinu at natugtug fagbaugun.

20“Fabuli wan nusnga sinu tagfon fanggalangun sa tibak fagsegan nu dway sa angku.

21“Lag am gfaidapan ay ngay betaw at yud ay kaiban, aroro ebi, sik ngay betaw yangay am sis talun Igiptu.

22“Lag am gfalingun ngay fagbubayun ay at yud e fagtainan ya. 23Nu nafafakamulun way ban am takatanya, ay kafag ngay fagbubayun nu naet ban sa angku gubuk, matuyan ggubuk kban anya fagayu. 24Matuyan wan umdotama au ayu, ay namabul au ayu sas awayan. Ay ay ngay mangena ban umsik ngay fagbubayun, ay ay ngay sisian ban umsik yud e fagtainan ya.

25“Nu gfaulbus wayam ay salapi sa ay kaibaman at yud e kwa, lag am gfae famamut ya gina gfafoli, kata ngay tagfaulbus salapi at fakamulun. 26Nu nabul wayam ay iba at lanbung laman sik famatuyan te, gbayad at bedan sa ayu, fafolii way vtv gina menit gakafalyuun, 27aroro kanya way lang at lanbung gina gtiug sad yabi. Kanya nung way naet gubuk sa angku, matuyan ggubuk kro anya aroro mafangafanyu au.

28“Lag am gfauri Dius ay lag am glong at mauri say ngay tagfangguna.

29“Lag am kalyam gfon sa angku siginan ay ngay gutluan, ay siginans fanlangu ay siginan sangay langis. Fatigwanani yangay sa angku ay ngay munama tiba kaka, 30ay ay ngay baka, ay ay ngay tupa taguna at riangan. Fasii yap at mina at bagu kasalug fag riangan baka ay tupa kaduge fituk menit, ay nu siwas fawaluk menit, foni wa sa angku.

31“Am wan ku nafasaman fag ngay taw, nu katanya, wam masine kon nusnga setaw fag fagbaugun at nafabul nu at madot way fag mangilafang. Abat ngate, faoni wan sa sangay idu.

Currently Selected:

Nu Galin 22: OCCT

Highlight

Copy

Compare