Nu Galin 24

Ngay Taw Israel Nabul at Nasadian sas Yawi

1Yawi nalong sas Muisis te, “Undaudi stae sa angku ay adgaloani Arun, Nadab, Abyu, ay anggan taw Israel at ngay fagtainan fag fituk safulu. Ay nu gseg am angku, ngayayui tua sirut. 2Muisis, o way lang at manangakbang sa angku, am ngay iba wa masine nangakbang. Ay ngay taw wa masine gundaud galo emu.”

3Muisis nu nafoyung wan sa sangay taw Yawi at foyungan ay fagayu at ngay suguan, ngay taw gasfuan gbalus te, “Gfaning ban mi Yawi at ngay suguan fagayu.” 4Ay Muisis nariruk Yawi at ngay longan fagayu.

Balabag di, Muisis anfulo ay nawat sik fagirugan fanggalangun sis buksul ay nafoli labi duak gang, kata Israel at gaban fag labi dua.

5Ay sanya ginan, Muisis nasugu ngay baguama te, “Namon am sas Yawi fagirugun fag ngay fanggalangun ay namon yangay am ngay tama baka laman sik ngay fanggalangun laman sas fagmanabayanun sas Yawi.” 6Muisis nabul kafag taguk at tiba ay nasuad sa sangay taya, ay tiba at taguk nafaramsig sas fagirugan fanggalangun. 7Ay nabul yangay at Nasadian fag Fafil ay natap sa sangay taw at daga salubangan. Ay ngay taw nabalus te, “Gfaning ban mi Yawi at ngay suguan.”

8Sanya ginan, Muisis nabul tagsi sangay taya fag taguk, ay nafaramsig sa sangay taw ay glong te, “Tuy fag taguk famaksvn Yawi at nasadian sa ayu, gina gfon ayu at ngay longan.”

9Sanya ginan, Muisis, Arun, Nadab, Abyu, ay anggan taw Israel at fagtainan fag fituk safulu, naundaud sas buksul, 10ay nalag Israel at Dius. Ay sis Dius at fagsiadan e kata sik dalan mawatan siginan sik gang gmedmeloun, at kasuloan kata yays kiwang. 11Ngay tagfangguna dewa nalag Dius, di nbul. Kanya fagayu nafangon yay ay nainum sis Dius at daga salubangan.

12Yawi nalong sas Muisis te, “Gewan, undaudi stae sa angku sis buksul, ay sanyai ay namon au emu ngay dalifi. Nariruk au sanya ku suguan am fagnamoyungun sa sangay taw.”

13Nu katanya, Muisis naundaud sas Dius at nafili fag buksul, gadgaloan at fagsuguan Uswe. 14Ay duama gina galoun, Muisis nalong sas taw Israel at ngay fagtainan te, “Fanyai yap emi ste yakmay ami anfoli. Ste way Arun ay Kur, ay nusnga sinu at ke fagidapun akbangi sanya fag duama.”

15Ay Muisis nu ndasug wan sas tungud buksul, linyabu nasuklub kafag buksul. 16Ay Yawi at kamasuloan anlag sis Buksul Sinay. Ay kaduge unumk menit linyabu nasuklub buksul. Ay sis fafituk menit, Yawi nauro Muisis siginan sad linyabu. 17-18Nu katanya, Muisis nasas linyabu gina yay gundaud sis buksul. Ay Muisis nu sanya ufatk safuluk menit ay ufatk safuluk yabi. Ay ngay taw Israel tagsis lod buksul nalag Yawi at kamasuloan kata sik afuy gigang sis tungud buksul.

Currently Selected:

Nu Galin 24: OCCT

Highlight

Copy

Compare