Nu Galin 21

Faugali sa sangay Fagsuguan

Deu 15:12-18

1Yawi nalong sas Muisis te, “Katatuy ban fag ngay faugali am fagnamafasludanun sa sangay taw Israel:

2“Nu namagsuguan wayam sik ngay taw Ebreu, namayad am anya, ay kanya ban namakamulun sa ayu kaduge unumk banwa. Ay sis fafituk banwa, kalfas wan at yud fagbayadun aroro siginan nu gafagsuguanan. 3Nu nabayad am anya gina yud e mangama, ay at kadugean kafag fagsuguan fag mangena nu nke indugan, kanya way lang fag mangena takalfas sis fafituk banwa. Dewa katanya, nu e indugan wan gina am gbayad, anggan at indugan kalfas yangay galo anya. 4Ay nu at tagfayafun yay at nafae indugan anya ay kanya nu nke sisian, kanya kalfas sis fafituk banwa, dewa katanya, at indugan ay at ngay sisian kafamato way sit tagfayafun.

5“Dewa katanya, kanya fag fagsuguan nu glong way te, kesug way at tagfayafun, ay at indugan ay at ngay sisian, ay kanya nu dyay kaylat kalfas, 6at tagfayafun nantabanan ban anya sas Dius at daga salubangan sas fagnansegan at sakbawan. Ay at tagfayafun nansulbung at sadi at talinga ay namagsuguan anya kabavn.

7“Sik taw nung way namabayad at baguina laman sik fagsuguan, kanya ban wa makalfas sis fafituk banwa kata sik fagsuguan mangama. 8At tagfayafun nu dway guseganan anya, at talananan masine way gfafoli at famayad aroro at tagfayafun we fagmabalyananun sa anya. Dewa katanya, at tagfayafun wa masine gfalao anya sa tibak talun at taw. 9Kanya fag tagfayafun nung way namon at fagsuguan sat baguama laman at bubay, masine kanya nu gngayan fia anya te, at baguina. 10Kanya nu nabubay way kafag fagsuguan, ay nu nanfamubay yay sa tibak mangena, kanya masine gfataglayun gfon fakonun ay lanbung, ay fataladani tua anya. 11Kanya nu dway mafafaning kafag tuluk fagetun, kanya masine gfalfas kafag mangena yud e famayad.

Ngay Faugali sabaliwa ngay Taw Tagfakamulun at Mauri

12“Nusnga sinu at nafalang sik taw ay anbul, fabuli yangay anya. 13Dewa katanya, nu bundi at algan, ay nu doma naylat takatanya, kanya mananuksuan sa ku nafoyung fag talun. 14Dewa katanya, nu at algan way namabul, fabuli yangay anya, dewa yay nanangakbang sa ku fagirugan fanggalangun.

15“Nusnga sinu at nafauri at mama ay at mina, fabuli wa anya.

16“Nusnga sinu at nafantaban sik taw, dewa nafae bayad ay yud nafae bayad, fabuli wa anya.

17“Nusnga sinu at nafalingun at mama ay at mina, fabuli wa anya.

18“Dua nangus ktaw nawayan; at usama nasuntuk ay mannga nafana gang, dewa katanya, ya nbul, ay kanya anmomuy ay wa manangabangkad ya. 19Ay kafag taw at nasuntukan nu manangabangkad yay ay nu malao yay, lag yap gfaurianan kafag taw at nafanuntuk. Dewa katanya, kanya fag taw masine nu gbayad sat nasuntukan at kinfangulan fag buknga, ay kanya fag taw at nafanuntuk masine nu galaga anya yakmay anfia.

20“Nusnga sinu fag tagfayafun at nafalang at fagsuguan, mangena man ay mangama, ay nu nbul way, faurianani wan at tagfayafun. 21Dewa katanya, kanya fag fagsuguan nung yay manangabangkad, nu nlangfe sik menit ay anggan faduak menit, wa masine gfaurianan kafag tagfayafun aroro kanya wan tagagbilug kafag fagsuguan.

22“Ay nu e gawayan way, ay sik tagfafion natayukan at famalang, ay nafasalug gina yud sit buknga, dewa katanya, di e ndasug sa anya at mauri, fabayadi kafanud at mangama ay tagwabilug at fagetun. 23Ay nu maksvn way at kindasug sanya fag mangena, faurianani yangay at nafakamulun mauri sa anya. Ay kafag mangena nu nbul way, fabuli yap fia at nafabul anya, 24ay nu gafalangan nu siwas mata, fasii yangay fias mata, ay nu sis bagang, fasii yangay fias bagang, ay nu sis take, fasii yangay fias take, ay nu sis darafa, fasii yangay fias darafa, 25ay nu nafasugba way, fasugbai yangay anya, ay nu nafae fakarukan, fae fakarukani yangay anya, ay nu nafagarasan way, fagarasani yangay anya.

26“Sik tagfayafun nu nafalang way at fagsuguan mangama ay mangena sit mata, ay nu dway glag ya, lag gfagsuguan ya tuga famayad sat nafayud glag anya. 27Ay nu nafarabas way at bagang, lag gfagsuguan ya anya tuga famayad sat bagang at kinrabas.

28“Sik baka tama nu nasunge way sik taw, ay kanya nu nbul way, fanai wan kanya fag baka sik ngay gang, ay lag kon at yamas, dewa katanya, tagbilug baka we fagbayadun. 29Ay sik baka tama nu nnanad gfansunge taw, ay nu nalong oma sa tagbilug, ay nu dway kasalag, ay kafag baka nu nafabul sik taw, fanai wan kanya fag baka sik ngay gang yakmay anbul, ay gasfuan anggan at tagbilug. 30Dewa katanya, tagbilug baka nung way namayad laman ro di gfabul anya, kanya masine nu gbayad nusnga seyu at fagetun sa anya. 31Katanya yangay at faugali sik baka nu nasunge way sik sisian. 32Ay kanya fag baka tama nu nasunge way sik fagsuguan, tagbilug baka gbayad tuluk safuluk salapi sanya fag fagsuguan at tagfayafun, ay fanai wan kafag baka.

33“Sik taw nu nabul way bubun at fanuklub, ay mannga e sik taw nabubun ay wa natabun ya ay nu e ntong way sanya fag bubun sik baka ay mannga sik asnu, 34kafag taw bayadi sanya fag fagbaugun tagbilug, ay anya wa ngap ro kanya fag fagbaugun.

35“Sik baka tama nu nafabul way sik baka tama, at tagbilug fag dua masine nu namaloi wan tagleleg fag baka, ay at nagbulan afudani. Ay afudani yangay at kinbul fag baka at yamas. 36Ay kanya fag baka tama nu nnanad way gfansunge ay nu nafamabul way, ay tagbilug way naubung, bangsii yangay sik baka tama, ay anya wa ngap ro at kinbul fag baka.

Currently Selected:

Nu Galin 21: OCCT

Highlight

Copy

Compare