Nu Galin 20

Safuluk Suguan

Deu 5:1-21

1Ay Dius nalong te, 2“Au wan ay Dius Yawi at nafaduksun ayu siginans talun Igiptu nu inda nu gafagsuguanan am.

3Lag am gseg tibak fagsegan sas day angku.

4Lag am kawat ngay fagsegan kata nusnge wain tagsis banwa, ay tagsis daga, ay anggan tagsisad mamam.

5Lag am gfaning ay gseg takatanya fagayu, aroro au, ay Dius Yawi, kwa kaylat nu e fagsegan am tiba. Gfaurianan au fagayu at nasalanan sa angku, anggan ay ngay sisian sitsigons fatulu ay sfaufatk talad kasugfunanan takauri angku. 6Dewa katanya, gfalag au sas fagayu kasugfunanan takesug angku ay tagfaning ku ngay suguan te, kesug au anya fagayu.

7Lag am glong ku ngayan nu dway e masuad. Aroro au ay Dius Yawi, namaurianan au nusnga sinu taglong ku ngayan sat yud e masuad.

8Amatangi Famiangalay fag Menit, ay fasamani kanya fag menit laman sa angku. 9Nu gfakamulun am unum wayk menit, 10ay sis fafituk menit, fiangalayi way laman sa angku, ay Dius Yawi. Lag am gfakamulun ginanya fag menit: anggan ay ngay sisian, ay ay ngay fagsuguan, ay ay ngay fagbaugun, anggan ngay taw tagsiginan tibak talun tagbanwan si ayu. 11Kaduge unumk menit, nawat au banwa, ay daga, ay dagat, ay fagayu tagsanya, ay natungkud au sis fafituk menit. Nu katanya, nafili kwan Famiangalay fag Menit, ay tuy at nafasamanan fag menit laman sa angku.

12Suyui ay mama ay ay mina laman mabanwan am ngaduge si ku fon ban ayu fag daga.

13Lag am gfabul.

14Lag am gfanugtug ay namatugtug.

15Lag am gfangkamul.

16Lag am gfatuyan at yud matuyan sabaliwa ay iba.

17Lag am galabian ay iba at bale, ay at mangena, ay at ngay fagsuguan, ay at ngay fagbaugun, ay nusnga setaw at fagagbilugun.”

18Ngay taw nu nadungug lingsi, ay budyung nu gawang, ay nu nalag limbad ay buksul takanus, kanya fagayu gtadtaruyan kalimu. Ay kanya fagayu namalindug ngayayu 19ay nalong sas Muisis te, “O yakman tagaringang sa emi ay gdungugan ro mi emu, deyud Dius tagaringang sa emi aroro manbul ro mi.”

20Nu katanya, Muisis nalong sa sangay taw te, “Lag am kalimu aroro Yawi nastie laman kanya namalag sa ayu at fagmabalyananun laman kalimu tuam anya ay diam gasalanan.”

21Ngay taw malindug sis fagngayayuan kaduge Muisis nangakbang sat madamvl fag linyabu nu inda Dius.

22Sanya ginan, Yawi nalong sas Muisis te, “Nanlong o sa sangay taw Israel te, nalag wam nu gfakamatoan au ayu siginans banwa. 23Nu katanya, lag am kawat ngay fagsegan at mawatan sanbung salapi ay gintu, laman gfasfuan nu gseg am angku.

24“Nangawat am sik fagirugan fanggalangun mawatan siginans lutuk laman sa angku, ay stie ban nu nangirug am ay ngay fanggalangun fag ngay tupa, kambing ay ay ngay baka laman ay fagirugun fag fanggalangun, ay fanggalangun laman sas fagmanabayanun. Namakamulun am tuy sa ku nafili fag buknga ay fagnansegan sa angku, ay nanlag au ayu sanya, ay namon au sa ayu nusnge wain. 25Nung wayam nangawat sik gang fagirugan laman sa angku, lag am gdasdas, aroro kanya ro wa masine ya fagnangirugan ngay fanggalangun laman sa angku. 26Ay lag yangay nangawat fagnangirugan at ke agdan aroro mae nalag ban ayu gina am nangirug.”

Currently Selected:

Nu Galin 20: OCCT

Highlight

Copy

Compare