Nu Galin 19
19
Sis Buksul Sinay
1-2Ngay taw Israel nalao siginans Refidim ay nasas talun at yud e taw sis Sinay. Ay kanya fagayu namaful sis salubangan buksul. Ginanya, at fatuluk magdanun siginan nu glao siginans talun Igiptu.
3Muisis nasas tungud buksul laman namablang Dius. Ay Yawi nauro anya sanya sbuksul ay nalong anya te, “Nanlong o tuy sa sangay taw Israel, Akub at kasugfunanan te, 4‘Nalag wam ku nafakamulun sa sangay taw Igiptu, ay nu gtabanan au ayu sa angku, kata sik bio nu gbuba at ngay riangan sit fakfak. 5Nu galo tua ban am angku ay gfaning ku nawat fag nasadian, gfili kban ayu siginans fagayu talun laman ku ngay taw. Au wan tagagbilug fagdaul daga, 6ay am wan ku nafili fag ngay taw, ay umkata ban am sik fagfagtainanan tagfon fanggalangun ay sik gaban taw at mafasamanan sa angku.’ Nanlong o tuy sa sangay taw Israel.”
7Ay Muisis natustus siginans buksul ay nafauro ngay taw Israel at ngay fagtainan ay nalong sanya fagayu Yawi at longan. 8Ay fagayu taw gasfuan gbalus te, “Gfaning ban mi Yawi at ngay longan.” Ay sanya ginan Muisis nalong sas Yawi ngay taw at famalus.
9Yawi nalong sas Muisis te, “Kasure au sa emu siginan sik madamvl fag linyabu laman ngay taw gdungug tua nu gfakamatoan au emu, ay laman kanya fagayu gafanud tua gugat sa emu.” Ay Muisis nafasaful wan sas Yawi ngay taw Israel at famalus.
10Yawi nalong yay sa anya te, “Loi sa sangay taw ay nanlong o te, ‘Katsi ay balabag ban, falganani ay sadili, ay namakbaki ay lanbung.’ 11Tuyani fia te, sis fatuluk menit kanya fagayu mafalganan wan, aroro ginanya ban fag menit, au Yawi, kadaga au sas Buksul Sinay, ay ngay taw glag fia angku. 12Ay namoli o sik famalabag sis fatuan buksul sik fakatoglagan te, ste way tsigon ngay taw nu malindug. Ay longi sa anya fagayu te, ‘Lag am glangfe kafag fatuan ay lag nangakbang buksul. Aroro nusnga sinu ro at kinkakbang buksul, umbul, 13taw man ay fagbaugun. Ay nusnga sinu at nafakamulun takatanya, fanai anya gang ay mannga sik godun. Ay lag e nanted anya.’ Ay nu nabudyung wa long, ngay taw masine wa nangundaud sas buksul.”
14Muisis natustus siginans buksul ay nasugu ngay taw te, “Falganani ay ngay sadili.” Nu katanya, ngay taw nanamakbak at ngay lanbung. 15Muisis nalong yangay anya fagayu te, “Falganani ay ngay sadili laman ban sas fatuluk menit. Ay lag yap am namataladan ay ngay bubay.”
16Balabag di, gina sis fatuluk menit, nalingsi ay nalimbad, ay sik linyabu daul nasuklub buksul ay andungug sik awang daul budyung. Ay ngay taw gtadtaruyan kalimu sit fagmafulan. 17Sanya ginan, Muisis nataban ngay taw Israel sat day fagmafulan laman nanlag Dius, ay kanya fag ngay taw malindug sis fun buksul. 18Ay Buksul Sinay ansuklub anus aroro Yawi ansure sanya kata sik afuy. Ay anus ankabat kata sik fagirugan at anus, ay buksul nauigan daul. 19Ay ankugat yay kafag budyung nu gawang. Ay Muisis naringang ay Dius nabalus anya siginan sik lingsi.
20Yawi andaga ay nasas tungud Buksul Sinay, ay nauro Muisis laman gundaud sas tungud buksul. Ay Muisis naundaud. 21Ay Yawi nalong anya te, “Tustusi sas fun buksul ay namararang o sa sangay taw te, ‘Lag glangfe famalabag buksul laman nanlag angku, aroro nusnga sinu at nalangfe umbul ro.’ 22Dewa ngay tagfon fanggalangun at munakbang gugat si ku daga salubangan masine nu gfasine yangay at ngay sadili aroro nu dway nafakamulun katanya, gfaurianan kyangay anya.”
23Muisis nalong sas Yawi te, “Setain ro ngay taw nu maundaud sas buksul, aroro ebi nafararang o emi te, fae famalabagi si sangaba fun buksul, nu inda tsigon nu malindug ami, ay fasamani laman sa emu.”
24Yawi nabalus te, “Tustusi ay nantaban o stie Arun. Dewa katanya, wa masine ngay tagfon fanggalangun ay ngay taw nu gundaud stie laman kwa gfaurianan anya fagayu.”
25Nu katanya, Muisis natagbung ay nananlong takatanya sa sangay taw.
Currently Selected:
Nu Galin 19: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
