Nu Galin 2

Muisis nu Kasalug

1Ay ginanya, e sik taw siginans Lebi at kasugfunanan at nafamubay yangay sat gaban. 2Ay wa ngaduge, kanya fag mangena nafafion ay nafasalug sik munama. Kafag mangena nu nalag te, at ngenge mataglu, kanya nafasuksuan kaduge tuluk magdanun. 3Dewa katanya, kanya nu dway mafasuksuan ya at ngenge, nabul sik buyug#2:3 buyug: at masuad, sik fagsuadan takata sik sabi at mayung. at mawatan siginans sigbo, ay nararus sik fanrarus at madafut. Ay sanya ginan, kanya nasuad at ngenge sasad buyug ay nanamasas wa faltu sis tigyangan Liskung Nilu. 4Ay kafag ngenge at kaka munina wa ngayayu nu malindug laman gulit takadasug sat arian.

5Ay ginanya, Igiptu at fun at baguina natagbung sasad Liskung Nilu laman nangigus. Ay kaduge kanya gigus, at fagsuguan fag ngay mangena kamanlaoan way sis tigyangan liskung. Ay Igiptu at fun at baguina nalag kafag buyug sisad liskung sis wa faltu ay nasugu sat fagsuguan at sadi te, “Namul o.” 6Ay kanya nalunggab kafag buyug ay nalag kafag ngenge nu gwayway ay kanya kafanyu, ay nalong te, “Tuy fag ngenge sik taw Ebreu.”

7Ay sanya ginan, kanya fag ngenge at kaka ankakbang sas Igiptu at fun at baguina ay ginto te, “O kaylat o nu nanrvbvy au sik mangena siginans taw Ebreu tagfasusu ay tagfagurang anya laman ban am ngenge?”

8Ay fun at baguina gbalus anya te, “Agvd.” Nu katanya, kafag munina nalao wan ay nanantaban at mina sas fun at baguina. 9Ay Igiptu at fun at baguina nalong sa kafag mangena te, “Bubai wan tuy fag ngenge ay fasusui laman sa angku. Ay alagai anya ay namayad kban sa emu.” Nu katanya, kafag mangena nabul at ngenge laman galaga.

10Ay kafag ngenge gina yud gsusu ya, at mina fia nabuba anya sas Igiptu at fun at baguina. Ay kafag baguina natuyan fia te, kanya at sadili wa fia sisian. Ay nafangayan kafag sisian te, Muisis,#2:10 Muisis: at masuad, Anlakwi. aroro nalong te, “Nabul au anya siginan sad lino.”

Muisis Nalagyu sas Talun Midyan

11Ay Muisis nu mabaguama wan, sik menit, kanya nalao sat ngay kaiban ay nalag te, maksvn nu gidapan. Ay kanya nalag sik taw Igiptu nu gfalang at sadi at kaiban fag taw Ebreu. 12Muisis kamanawan sat ligung, ay nu nalag te, di e glag anya, kanya nafabul kafag taw Igiptu, ay nalubgub at bilug sasad lagnas.

13Ay balabag di, kanya anfoli ay nalag duak taw Ebreu nu gawayan. Kanya nainto sat ke asalanan te, “Wain ro am fagfalangun am kaiban Ebreu?”

14Ay kanya gbalus Muisis te, “Sinu at nafili emu laman o em fun ay em tagwabilug? O namabul yangay o angku kata am nafakamulun egmenit sa sik taw Igiptu?” Nu katanya, Muisis kalimu ay gamatangan te, “E nalag way mangaro ku nafakamulun.”

15Ay Igiptu at fun nu nasaful Muisis at nafakamulun, gyafabulun anya. Nu katanya, Muisis nalagyu wan sas talun Midyan laman namanwan sanya.

Ay Muisis nu ndasug sanya, namalunggung si sik day bubun. 16Ay ginanya, fituk baguina andasug laman nanagub ay namainum at mama at ngay fagbaugun. Kafag ngay baguina at mama sik tagfon fanggalangun sanya fag talun. 17Ay e ngay tagulit yangay fagbaugun at kindasug sanya, ay kanya fagayu naiyan kafag ngay baguina ay at ngay fagbaugun. Dewa katanya, Muisis nagubuk kafag ngay baguina ay nafainum at ngay fagbaugun.

18Ay kafag ngay baguina nu noli wan sat mama Etru,#2:18 Etru: at ngayan yangay te, Reuel. at mama nalong sa anya fagayu te, “At kasakit nu guli am.”

19Ay kafag ngay baguina gbalus te, “E sik ngay tagulit fagbaugun nafalingun emi, dewa katanya, e sik taw Igiptu nagubuk emi, ay kanya nafanagub ay nafainum em ngay fagbaugun.”

20Ay at mama ginto te, “Dada wan kanya katsi? Wain ay fagnaubunun anya? Nantaban am anya stie ay fafangoni.”

21Ay Muisis nanangalo kafag ngay baguina ay naylat gbanwan sis Etru at bale. Ay nu glugo wan, Etru nafadadwa at baguina Sipura sas Muisis. 22Ay Sipura nafafion ay nafasalug sik munama, ay Muisis nafangayan kafag sisian te, Gersum.#2:22 Gersum: at masuad, Sik betaw au sanya. Aroro Muisis nalong te, “Sik betaw kway ste fag talun.”

23Nu nlangfe ngayuk banwa, Igiptu at fun anbul wan. Ay dewa katanya, ngay taw Israel gidapan yay gugat siginan nu gafagsuguanan. Ay kanya fagayu naet gubuk sas Dius, ay Dius nadungug at fagetun. 24Ay Dius nadungug kanya fagayu nu gdarangin aroro gidapan, ay Dius namatang at nasadian sas Abrayam, sas Isak, ay sas Akub. 25Dius nalag kanya fagayu nu mabanwan ay anfanyu anya fagayu.

Currently Selected:

Nu Galin 2: OCCT

Highlight

Copy

Compare