Nu Galin 3

Dius nu Gfili Muisis

1Sik menit, Muisis galaga at nugangama Etru at ngay fagbaugun. (Etru tagfon fanggalangun sis Midyan.) Ay Muisis nataban kafag ngay fagbaugun sas talun at yud e taw. Ay kanya andasug sas Kureb sas Dius at nafili fag buksul. 2Ginanya yay, Yawi at tagbarita ansure sas Muisis kata sik afuy si sik fun kayu ngababa. Muisis nalag te, kafag kayu dewa gigang, wa kairug. 3Kanya glong te, “At kadulo! Wain kanya fagyudun kairug? Yakay, nangakbang au fia nanlag.”

4Yawi nu nalag te, Muisis nangakbang, kanya nauro te, “Muisis, Muisis.”

Ay Muisis nabalus te, “Nataw?”

5Dius nalong te, “Sanya yap o, lag o kakbang. Lafusi yap am lapak aroro am fagmalindugan at yud e malong fag buknga.” 6Ay glong yangay te, “Au wan am mangaguyang Abrayam, ay Isak, ay Akub at Dius.” Ay Muisis nu nadungug at aringang, natabun at kamatan aroro kalimu gdama Dius.

7Ay Yawi glong yay fia te, “Nalag au ku ngay taw nu gidapan sis talun Igiptu. Nadungug kyangay nu gurungan get gubuk aroro maksvn at fun at ngay fagsuguan nu gfaidapan, ay anfanyu au anya fagayu. 8Nu katanya, nastie au sdaga laman namalangfe anya fagayu siginans talun Igiptu, ay nantaban au sat masine ay tagbia ay at maramraman fag talun; sa sangay taw Kanaan, taw Ket, taw Amur, taw Peres, taw Kib, ay taw Ebus at ngay fagbanwanan. 9Nadungug au ngay taw Israel nu get gubuk, ay nalag au ngay taw Igiptu nu gfaidapan anya fagayu. 10Nu katanya, gsugu au emu sas Igiptu at fun laman namalfas ku ngay taw Israel siginans talun Igiptu.”

11Dewa katanya, Muisis nalong sas Yawi te, “Ay wain, o au way ro tagsas Igiptu at fun laman namalfas ngay taw Israel siginans talun Igiptu?”

12Dius glong te, “Gufud kban emu. Katatuy tagfatuyan te, au at nasugu emu: nu nafalfas ban o ngay taw Israel siginans talun Igiptu, nanseg ban am angku stie fag buksul.”

13Ay Muisis nalong sas Yawi te, “Ay nu nasa kro sangay taw Israel katsi, laman nanlong sa anya fagayu te, ‘Ay mangaguyang at Dius nasugu angku laman namalfas ayu siginans talun Igiptu,’ ay kanya ro fagayu nu nainto te, ‘Sinu kanya at ngayan?’ setain ro ku famalus?”

14Dius nabalus Muisis te, “Au, au wan.#3:14 Au, au wan: sanya ginan fag ngay longan at ngayan Yawi. Katatuy ro am famalus sa anya fagayu: ‘At nalong te, Au, au wan, kanya at nasugu angku sa ayu.’ ”

15Ay Dius gdog yay nalong sas Muisis te, “Longi sa sangay taw Israel te, ‘Yawi, ay mangaguyang Abrayam, Isak, ay Akub at Dius, nasugu angku sa ayu.’ Ay kabavn ay ngay kasugfunanan gtoglag tua angku te, Yawi.”

16Ay Dius nalong yay fia sas Muisis te, “Loi wan ay namaful o ngay taw Israel at ngay fagtainan ay longi sa anya fagayu te, ‘Au Yawi, ay ngay mangaguyang Abrayam, ay Isak, ay Akub at Dius, taglong te, gulit au gugat ayu ay nalag au ngay taw Igiptu nu gfaidapan ayu. 17Nafatuyanan au te, namalin kban ayu ste ginan fag talun, nu inda ngay taw Igiptu nu gfaidapan ayu, ay nantaban kban ayu sat masine ay sat maramraman fag talun;#3:17 at masine… fag talun: sas Ebreu, sik talun at ke familugan susu bilug ay deut. sa sangay taw Kanaan, taw Ket, taw Amur, taw Peres, taw Kib, ay taw Ebus at talun.’

18“Ngay taw Israel ban at ngay fagtainan gdungugan emu. Ay nantaban ban o anya fagayu sas Igiptu at fun, ay nanlong ban am sa anya te, ‘Yawi, ngay taw Ebreu at Dius, ansure sa emi. Nu katanya, get ami sa emu te, aylati nu glao ami sas talun at yud e taw at kadugean tuluk menit, laman namon ami ngay fanggalangun sas Yawi em Dius.’ 19Dewa katanya, saful kway te, Igiptu at fun wa kaylat gfalao ayu way ro nafabulunan. 20Namaurianan kban ngay taw Igiptu siginan at ngay madulo fag ngay fakamulun. Nu katanya, kanya ban fag fun kaylat wan nu glao am.

21“Ay namasine kban ngay taw Igiptu at amatanganan sa ayu laman ban gina am glao kanya fagayu wa gfalao ayu yud e buba. 22Ay ay ngay mangena ban nanget sa at ngay fasabale fag ngay taw Igiptu, ay sa tiba yak taw tagbanwan sanya fag talun ngay famasine, sanbung salapi, gintu, ay ngay lanbung. Ay fasuluni ban kanya fag ngay lanbung sa ay ngay sisian. Nu katanya, nagbilug ban am ngay taw Igiptu at ngay ramraman.”

Currently Selected:

Nu Galin 3: OCCT

Highlight

Copy

Compare