Nu Galin 16
16
Mana ay ngay Fugu
1Siginans talun Elim, ngay taw Israel gfataglayun nu glao yakmay andasug sas Sin fag talun at yud e taw, swabilug talun Elim ay Sinay. Kanya fagayu andasug sanya fag talun sis falabi limak menit sis faduak magdanun siginan nu gduksun siginans talun Igiptu. 2Ay gina ngay taw Israel sis talun yud e taw, kanya fagayu nafayud Muisis ay Arun, 3ay nalong te, “Amasine yap Yawi nu nafabul di emi sis talun Igiptu, nu inda nu kon ami gugat yamas ay tiba yak fakonun em fakaylatun. Ay natabanan am emi stae sat yud e taw fag talun laman namabul sas lunus.”
4Sanya ginan, Yawi nalong sas Muisis te, “Dungugani! Namadasug au fakonun siginans banwa kata arak laman sa ayu. Kayu menit, ngay taw Israel namul at ngay mesa fakonun ginanya fia fag menit. Kanya ban ku famaskud te, o kanya fagayu gfaning tua ku ngay suguan. 5Ay longi sa anya fagayu te, ‘Faduai kkayu ebi ginan nu gbul at ngay fakonun galay faunumk menit.’ ”
6Ay Muisis ay Arun nalong sas fagayu taw Israel te, “Katsi fag yabi, sumaful am te, Yawi at nafalfas ayu siginans talun Igiptu, 7ay balabag ban sbalabag, lumag am Yawi at fagmabalyananun aroro nadungug nu kamayud am. Wain ay fagfayudun emi, ay wami e nafakamulun?” 8Ay Muisis nalong yay fia te, “Yawi namon ayu sik ngay yamas ay fakonun sad yabi, ay balabag ban sbalabag, namapsug ayu tinapay aroro nadungug nu kamayud am sa anya. Wain ay fagfayudun emi? Wa sa emi nu kamayud am, nu bunway sa tuas Yawi.”
9Muisis nalong sas Arun te, “Longi sas fagayu taw Israel te, ‘Akbangi sas Yawi at salubangan aroro kanya nadungug nu kafamayud am.’ ”
10Kaduge Arun garingang sa sangay taw Israel, kanya fagayu nabanawan sat yud e taw fag talun ay nalag Yawi at fagmabalyananun sis linyabu. 11Yawi nalong sas Muisis te, 12“Nadungug au ngay taw Israel nu kamayud. Ay longi sa anya fagayu te, ‘Galay ban yabi kon am yamas ay galay ban balabag kon am ay umkapsug am tinapay. Ay sumaful am te, au wan ay Dius Yawi.’ ”
13Ginanya yangay fia fag fafun, ngay fugu andasug ay arvs ankapnu fagdaul at fagmafulan. Ay balabag di, gadamugun fagdaul at fagmafulan. 14Ay gina damug nalyam, kanya fagayu e nalag sik ngay malaksi ayu sirut sis tungud daga. 15Kanya fagayu wa saful ay naidgintoan te, “Nataw manga in ngayu?”
Ay Muisis glong sanya fagayu te, “Kanya Yawi at fon ayu ay fakonun. 16Ay Yawi nalong yay fia te, ‘Galay sik taw fafuli kayu at kasakan; at kayuan, sik salup.’ ”#16:16 salup: sas Ebreu, omer.
17Nu katanya, ngay taw Israel nafuyut kanya fag ngay fakonun, sa tiba at nafafuyut ngayu, ay sa tiba alay way. 18Kanya fagayu nu nainsaful at nafuyut, tagsik salup galay sik taw. Ay at nafuyut tangayu we sawe, ay at nafuyut talay di nkurang, nu katanya, kasakan tua galay at sadi at nafuyut.
19Muisis nalong sa anya fagayu te, “Lag am e gfasawad balabag ban ay fakonun.” 20Dewa katanya, at tiba wa nafandungug Muisis at longan, ay nafasawad yay at fakonun ban balabag. Ay at nafasawad naulud ay anbasung. Nu katanya, Muisis andotama kanya fag ngay taw.
21Kayu balabag, galay at sadi namul kayu at fagayudanun. Ay menit nu masugba wan, at yud anfuyut fag fakonun antinas wan. 22Sis faunumk menit, duak kayu ebi ginan at fagnamulun, galay sik taw duak salup. Nu katanya, ngay tagfangguna nasas Muisis ay nananginto te, “Wain katsi fagkayuun tua nya?”
23Ay Muisis nalong sa anya fagayu te, “Yawi nasugu te, ‘Balabag ban tungkudi way, aroro kanya Famiangalay way fag Menit at nafasaman fag menit laman sas Yawi. Nu katanya, fatamai ay fakaylatun gfatama ay seudi ay fakaylatun gseud. Ay at sawad, falganani laman ban sas balabag.’ ”
24Nu katanya, kanya fagayu nafasawad at fakonun laman ban sas balabag kata Muisis at suguan. Ay balabag di, di ndan ay di naulud.
25Muisis nalong sa anya fagayu te, “Katsi oni wan, aroro katsi Famiangalay fag Menit laman sas Yawi. Aroro katsi fag menit wa ro am e lagan ya takatanya sis daga. 26Nu gfalganan am ay fakonun unum wayk menit, ay sis fafituk menit, Famiangalay fag Menit, we kalag kafag fakonun.”
27Ay dewa katanya, e ngay taw yay fia at naduksun sis fafituk menit laman nanrvbvy fakonun, dewa katanya, we nalag. 28Ay Yawi nalong sas Muisis te, “Seduge yaban kanya fag ngay taw nu kamabo ku ngay suguan ay ku ngay foyungan? 29Amatangani, nafasaman au Famiangalay fag Menit, nu katanya, galay sis faunumk menit, gfamut au ay fakonun. Ay fagayu am sii way fia ay mesa fagbanwanan sis fafituk menit. Ay lag am gduksun laman nanrvbvy ay fakonun.” 30Ay nu katanya, ngay taw Israel natungkud sis fafituk menit.
31Ay ngay taw Israel nafangayan kafag fakonun te, mana.#16:31 mana: sas Ebreu at masuad, Nataw tuy? Kanya malaksi kata sik fare at bintuy, ay matamis kata sik ngay mayangfis fag tinapay ke deut. 32Muisis nalong sa anya fagayu te, “Yawi nasugu te, ‘Fasamani sik salup mana laman anggan ban sat fadogan ay kasugfunanan, ay laman ban kanya fagayu lumag ku nafon sa ayu fag fakonun sis talun at yud e taw, gina au nafalfas ayu siginans talun Igiptu.’ ”
33Muisis nalong sas Arun te, “Buli sik tikung ay suadi sanya sik salup mana. Sanya ginan, bubai sas Yawi at daga salubangan laman ban sat fadogan ay kasugfunanan.” 34Ay Arun nafaning Yawi at longan sas Muisis, ay nasuad kanya fag mana sas Fagsuadan Nasadian laman namasuksuk. 35Ngay taw Israel naon mana kaduge ufatk safuluk banwa yakmay andasug sas talun Kanaan. 36(Galay sik menit, sik taw namuyut sik salup.)
Currently Selected:
Nu Galin 16: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
