Nu Galin 15
15
Muisis at Alubad
1Muisis ay ngay taw Israel galubad sik alubad sas Yawi te,
“Galubad au sas Yawi aroro kanya nababo wan.
Ay naukas sas dagat ngay kabayu ay ngay tagsakay sanya.
2Yawi wan at nafon angku bitsug,
ay kanya wan ku alubad at masuad.
Ay kanya at nafalangfe angku.
Ay kanya ku Dius, ay gfauseganan au anya.
Ay kanya wan ku mama at Dius,#15:2 ku mama at Dius: ay mannga, ku mangaguyang at Dius. gfabat au anya.
3Yawi at ngayan, ay kanya sik tagfawayan.
4Ay kanya naukas sas dagat ngay faguyudan fangawayan ay Igiptu at fun ay at ngay tagfawayan.
Ay Igiptu at fun at ngay tagfakamulun ke ngay fagsafulun ankapnut sas Dagat Maraska.
5Kanya fagayu nasukluban tangabasad fag mamam,
ay anlubgub sas fagngabasadan kata sik gang.
6Yawi, matuyan am fagmabalyananun,
ay siginan takatatuy, narufa o am ngay fawayan.
7Siginan am fagmabalyananun, nababo o fagayu tagfawayan emu.
Nafalag o sa anya fagayu am dotama ay nafamin o anya fagayu kata sik nagruyusan fare at kinkirug.
8Siginan am engasan, mamam ankafud,
ay tagfamilugan fag mamam anlindug kata sik alad gang,
ay tangabasad fag mamam antugas sis wabilug dagat.
9Em ngay fawayan nafamatungudun glong te,
‘Namafalo au anya fagayu ay nanggamat.
Ay nangafud au at ngay ramraman ay namafanudan kwa fia ku sadili.
Ay gbul au ku fiso ay namamin au anya fagayu.’
10Dewa katanya, siginan yay lang am uyup, kanya fagayu anlubgub sas dagat,
ay anfalyu sas fagngabasadan kata sik sanbung.
11Yawi, sinu ya fag dius tagtungud emu?
We gtungud ya emu sam fagmatuyanun ay sa am fagmabalyananun.
Ay fagayu am nafakamulun madulo.
12Ay siginan am fagmabalyananun, daga naon em ngay fawayan.
13Ay siginan am fakesugun at yud e fakatabuan,
namangguna o am ngay taw am nafalangfe.
Ay siginan am fagmabitsugun nantaban ban o anya fagayu
sam nafalganan fag fagbanwanan.
14Ngay talun at ngay taw nu nadungug, kanya fagayu gtadtaruyan kalimu.
Ngay taw Filistia ban umlimu maksvn.
15Ay Edum ay Muab at ngay tagfangguna gtadtaruyan yangay ban kalimu,
ay ngay taw Kanaan gtadtaruyan yangay.
16Yawi, anud, kanya fagayu anlimu.
Ay siginan am fagmabalyananun,
kanya fagayu wa glelegan ya kata ngay gang,
yakmay am nafalangfe fag ngay taw, anlangfe sanya.
17Yawi, nantaban ban o am ngay taw sam sadili daga,
ay namabanwan sam fagagbilugun fag buksul,
sam fagbanwanan, am awatan fag bale.
18Yawi tua ban tagfunan kabavn.”
19Ay gina ngay taw Israel glangfe sis wabilug dagat sit matat fag daga, Yawi nafalubgub Igiptu at fun at ngay kabayu at ke ngay faguyudan ay ngay tagsakay sanya.
20Miryam fag taglong, Arun at faduksay, nanamul sik fagfawangun ay nafangguna ngay mangena nu gfawang ay nu gfalelegan at ngay bilug. 21Ay Miryam nalubad tuy fag alubad sa anya fagayu:
“Fagayu am alubadi, aroro Yawi nababo wa fia.
Ay naukas wan sas dagat ngay kabayu ay fagayu tagsakay sanya.”
At Mayat fag Mamam
22Ay Muisis natabanan ngay taw Israel siginans Dagat Maraska sas Sur fag talun at yud e taw. Tuluk menit ngay taw Israel nu glao sas talun at yud e taw ay we nalag mamam sanya. 23Ay kanya fagayu nu ndasug sas Mara, nalag sik mamam, dewa katanya, wa mainum aroro mayat way. (Katanya at masuad at fagnafangayanun kafag talun te, Mara.)#15:23 Mara: at masuad, Mayat. 24Aroro katanya way, ngay taw Israel gfanlonganan sas Muisis te, “Nataw ro tam fanginum?”
25Ay Muisis naet gubuk sas Yawi, ay Yawi nafalag sa anya sik lifung kayu. Ay Muisis naukas kafag lifung kayu sasad mamam ay nalyam wan nu mayat. Ay sanya Yawi nu gfon at faugali ay at suguan laman gfaskud kanya fagayu at ngay fagmatuyanun sa anya.
26“Au ay Dius Yawi. Nu gfaning tua ban am angku sas fagdaul ay amatanganan, ay nu gfakamulun tua ban am at masine sa ku daga salubangan, ay nu gfaning tua ban am fagayu ku suguan ayu ay ku faugali, kwa ban gfadasug sa ayu ngay fakasaitun kata ku nafadasug sa sangay taw Igiptu aroro au Yawi ay tagfafia.”
27Ay kanya fagayu andasug sas Elim, ay sanya e labi duak bulbug ay fituk safuluk layag ay nawat at ngay bale ramit munakbang sis liskung.
Currently Selected:
Nu Galin 15: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
