Nu Galin 17

Mamam siginans Gang

Tap 20:1-13

1Ay siginan Yawi at suguan, ngay taw Israel nalao siginans Sin fag talun at yud e taw, ay gfataglayun nu glao. Ay kanya fagayu gadgalinan at fagbanwanan. Ay nawat at ngay bale ramit sis Refidim, ay sanya we mamam laman at fanginum. 2Nu katanya, kanya fagayu nafabadbaboan Muisis ay glong te, “Foni emi mamam em fanginum.”

Ay Muisis gbalus te, “Wain ay fagfayudun angku? Ay wain ay fagfaskudun Yawi?”

3Dewa katanya, ngay taw Israel maksvn nu kadanum, ay gfataglayun gfayud Muisis te, “Wain ro am fagnafaloun emi siginans talun Igiptu nu nangabul way ngap mi lang stae ay nangadanum anggan em ngay sisian ay anggan em ngay fagbaugun?”

4Nu katanya, Muisis naet gubuk sas Yawi ay ginto te, “Tain ro ku fakamulun stae fag ngay taw? Arvs kanya fagayu gafanaun wa angku.”

5Yawi gbalus te, “Buli am tulag am nafafalang sas Liskung Nilu, ay fanggunai ngay taw Israel ay tibak ngay fagtainan sis Israel. 6Namanya au emu si sik gang sis Kureb. Ay nu sanya wa ro wo, falangi kafag gang, ay mamam ro gduksun laman ngay taw e fanginum.” Nu katanya, Muisis nafakamulun takatanya sis Israel at ngay fagtainan at daga salubangan. 7Ay Muisis nafangayan kafag talun te, Masa ay Meriba, aroro ngay taw Israel nafabadbaboan anya ay nafaskud Yawi siginan nu glong te, “O Yawi galo antam o mannga duan?”

Ngay Taw Amalek Nababawan

8Ay ngay taw Israel gina yay sis Refidim, ngay taw Amalek namawayan. 9Muisis nalong sas Uswe te, “Nanfili o tibak ngay tagfawayan ay namawayan am ngay taw Amalek. Ay balabag ban nanmalindug au sas tungud buksul kaduge au gted ku tulag Dius at nalong angku ku fagnamubaun.”

10Nu katanya, Uswe ay at nafili fag ngay tagfawayan nanamawayan ngay taw Amalek, kata Muisis at suguan siginans Yawi. Ay Muisis ay Arun ay Kur naundaud sas tungud buksul. 11Kaduge Muisis gfabat at take, ngay taw Israel gbabo, ay nung way nafababa at ngay take, ngay taw Amalek gbabo. 12Ay Muisis anlufuy gfabat at ngay take. Nu katanya, Arun ay Kur nabul sik gang ay nafalunggung Muisis sanya. Arun natukud Muisis at take at sadi ay Kur gtukud yangay at sadi at take yakmay menit anfalyu. 13Nu katanya, Uswe fag gaban nababo ngay taw Amalek.

14Sanya ginan, Yawi nalong sas Muisis te, “Riruki tuy laman wo kalyam ay namasaful o sas Uswe te, namamin kwa ban fia ngay taw Amalek.”

15Muisis nawat sik fagirugan ay kanya nafangayan te, “Yawi wan ku tagfatuyan te, nababo kwan.” 16Ay Muisis nalong te, “Aroro Arun ay Ur nafabat tua ku ngay take sabaliwa Yawi at fagbanwanan, kabavn ban Yawi gfataglayun gfawayan ngay taw Amalek.”

Currently Selected:

Nu Galin 17: OCCT

Highlight

Copy

Compare