Nu Galin 14
14
1Sanya ginan, Yawi glong sas Muisis te, 2“Longi sa sangay taw Israel te, ‘Afolii sas day furuan Pi-Akirut, sis Migdul ay sis Dagat Maraska at wabilug. Ay awati ay ngay bale ramit sas tigyangan dagat, sis furuan Baal-Sefun at salubangan.’ 3Ay Igiptu at fun ban gamatangan te, ‘Ngay taw Israel ginkalyaman sas talun at yud e taw. Kanya fagayu natunan!’ 4Ay gdog au namaogat Igiptu at fun at amatanganan, ay kanya ban namafalo ayu. Dewa katanya, gfabul kban anya ay at ngay tagfawayan, ay siginan ban takatanya, ku ngayan ban kadungug, ay ngay taw Igiptu sumaful te, au wan Yawi.” Ay ngay taw Israel nafaning Yawi at longan.
5Ay e nafamansulit sas Igiptu at fun te, ngay taw Israel nalo wan. Nu katanya, kanya fag fun ay fagayu at tagfakamulun at ngay amatanganan anbali sabaliwas taw Israel nu glao. Ay nalong te, “Nataw tam nafakamulun? Wain tam fagnafaloun ngay taw Israel? Katsi, wa tam e ngay fagsuguan ya.” 6Ay Igiptu at fun nafalganan at faguyudan fangawayan ay at ngay tagfawayan. 7Kanya nafadgaloan fagayu at faguyudan, magamut at masine fia fag unumk sandank faguyudan, ay at ngay tagfangguna fag ngay fun tagfawayan. 8Yawi nafaogat Faraun, Igiptu at fun at amatanganan, ay nu katanya, kanya nanamafalo ngay taw Israel, dewa katanya, fagayu taw Israel nalao ay maseganama tua at amatanganan. 9Ngay taw Igiptu at nanamafalo ngay taw Israel: ngay kabayu at ke faguyudan ay ngay tagsaful gsakay sanya, ay ngay tagfawayan. Ngay taw Israel nasudan sit fagbalean sis tigyangan Dagat Maraska munakbang sis furuan Pi-Akirut, sis salubangan furuan Baal-Sefun.
10Ay Igiptu at fun ay at ngay tagfawayan nu munakbang wan, ngay taw Israel nalag anya fagayu. Nu katanya, ngay taw Israel maksvn nu kalimu ay get gubuk sas Yawi. 11Ngay taw Israel nalong sas Muisis te, “Wain am fagnatabanun emi stae fag talun at yud e taw laman nangabul ami? O nunda we fagfolian ya sis talun Igiptu? Nataw fia am algan am fagnantabananun emi siginans talun Igiptu? 12O nunda ebi gina ami sis talun Igiptu wami nalong emu te, ‘Fabayani wan emi gafagsuguanan ngay taw Igiptu’? Amasine yap nu gafagsuguanan ami ngay taw Igiptu nu gamut ro nu nbul ami stes talun yud e taw.”
13Ay Muisis nabalus ngay taw te, “Lag am kalimu. Faksvni ay amatanganan ay lumag ro am Yawi nu gfalangfe ayu katsi fag menit. Ay wa ro am lumag ya ay nalag katsi fag ngay taw Igiptu. 14Yawi tua ro tagfawayan kanya fagayu. Nu katanya, mabayani way fia ay ngay amatanganan.”
15Sanya ginan, Yawi nalong sas Muisis te, “Wain yay am fagetun gugat gubuk sa angku? Longi sa sangay taw Israel te, ‘Fataglayuni nu glao am,’ 16ay fatiuani am tulag sas dagat laman kafud ay laman ngay taw Israel malao sat matat fag daga. 17Namaogat au ngay taw Igiptu at ngay amatanganan laman namafalo ayu. Dewa katanya, namabul au Igiptu at fun ay at ngay tagfawayan ay anggan tagsaful gsakay sis kabayu ke faguyudan. Ay nu katanya, e gfauseganan ban angku. 18Ay nu nafabul kban anya fagayu, ngay taw Igiptu sumaful te, au wan Yawi.”
19Sanya ginan, Dius at tagbarita ay anggan kafag turuk linyabu tagguna ngay taw Israel nalin wan sas faguyanan. 20Ay kafag turuk linyabu anragang si sangay taw Israel ay si sangay taw Igiptu at wabilug. Fagngabak yabi kafag turuk linyabu gfon yamag sa sangay taw Israel ay gfon fagmadulumun sa sangay taw Igiptu. Ay kadugenya ngay taw Igiptu wa manangakbang ya ngay taw Israel.
21Sanya ginan, Muisis nafatiuan at take sas tungud dagat ay Yawi nafadasug sik maksvn fag tagmara siginans fakamenitan, ay dagat ankafud. Ay fagngabak yabi, gtagmara wa gugat, ay dagat ankafud ay anke matat fag daga. 22Ay ngay taw Israel nadife, nu glao sa way at matat fag daga, ay mamam sit dua tigyangan kata sik alad.
23Ay Igiptu at fun ay at ngay tagfawayan ay tagsakay sis kabayu, ay ngay faguyudan at ke balingkitan, gadgaloan namafalo. 24Ay gina gakamenitun wan, siginans turuk linyabu ay turuk afuy, Yawi nadama talun Igiptu at ngay tagfawayan, ay nafalyam kanya fagayu at amatanganan. 25Ay Yawi nafalubgub#14:25 nafalubgub: ay mannga, nafayud gribungan ya. at ngay faguyudan at ngay fanlao, laman kanya fagayu gidapan gfatarung. Nu katanya, ngay taw Igiptu glong te, “Kafoli watam sa tam guyan, aroro Yawi wan tagfawayan antam laman sa anya.”
26Ay ngay taw Israel nu ndife wan, Yawi nalong sas Muisis te, “Fatiuani am take sas dagat laman mamam umfoli, ay ngay taw Igiptu ay at ngay faguyudan ay anggan tagsakay sis kabayu umlubgub.” 27Ay menit nu nsure wan, Muisis nafabat at take sas dagat, ay mamam anfoli wan kata aro taw. Ay ngay taw Igiptu at ngay tagfawayan nanlagyu yay ma, dewa katanya, Yawi nafalimus anya fagayu sasad dagat. 28Mamam nafalubgub Igiptu at fun at ngay tagfawayan at nanamafalo ngay taw Israel, anggan tagsakay sis kabayu at ke faguyudan. Ay nusdi sadi we nlangfe.
29Dewa katanya, ngay taw Israel nalao sat matat fag daga sas wabilug dagat, ay mamam kata sik alad sit dua tigyangan. 30Ginanya fag menit, Yawi nafalangfe taw Israel siginan sangay taw Igiptu. Ay ngay taw Israel nalag ngay taw Igiptu nu mabulan ngayu sis tigyangan dagat. 31Ay ngay taw Israel nu nalag Yawi at nafakamulun sa sangay taw Igiptu, kanya fagayu anlimu ay nafanud sas Yawi ay anggan sat fagsuguan Muisis.
Currently Selected:
Nu Galin 14: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
