Nu Galin 13

Nu Gfatigwanan at ngay Baguama Tiba Kaka

1Yawi nalong sas Muisis te, 2“Fatigwanani sa angku fagayu taw Israel at ngay baguama tiba kaka ay anggan ay ngay fagbaugun at riangan tama taguna.”

3Sanya ginan, Muisis nalong sa sangay taw te, “Amatangi ban tuy fag menit, aroro kata katsi fag menit nu glao am siginan nu gafagsuguanan am talun Igiptu. Yawi nafalfas ayu siginan at fagmabalyananun. Lag am kon tinapay at ke famabia. 4Katsi fag menit, sis Abib fag magdanun, nu glao am. 5Yawi ban nantabanan ayu sa sangay taw Kanaan, taw Ket, taw Amur, taw Kib, ay taw Ebus at talun, at nafatuyanan sa ay ngay mangaguyang te, at fon sa ayu. Kanya fag talun masine ay maramraman.#13:5 masine ay maramraman: sas Ebreu, sik talun at ke familugan susu bilug ay deut. Nu nfasludan waban takatanya, masine nu nanmaful am namauseganan sabaliwa Tagbarita nu Glangfe, galay taguna fag magdanun kayu banwa. 6Ay gina am gfauseganan fag buknga, fituk menit nung am kon tinapay at yud e famabia, ay sis fafituk menit, gfasigad wam ay fagmafulun laman sas Yawi. 7Kaduge fituk menit, wam masine kon tinapay at ke famabia. Sas nusnga sinu si ayu, lag e fasawadan ya famabia tinapay. 8Ay gina am gfauseganan fag buknga, fayamagi sa ay ngay mesa sisian te, ‘Namatang au Yawi at nafakamulun sa angku gina au glao siginans talun Igiptu.’ 9Takatatuy fag fagmafulun kata sik fakatoglagan sim famauyungan ay sim dangasan tagfamatang sa emu te, masine nu gfoyung o sa am iba sabaliwas Yawi at suguan, aroro at fagmabalyananun nafalfas emu siginans talun Igiptu. 10Nu katanya, fakamuluni ban gugat takatatuy fag faugali galay banwa si ku nafalganan fag buknga.

11“Yawi gtaban ban ayu sa sangay taw Kanaan at talun, at nafatuyanan sa ayu ay sa ay ngay mangaguyang. Ay gina ban am gbanwan sanya, 12fatigwanani sas Yawi fagayu ay baguama tiba kaka ay fagayu fagbaugun taguna at riangan, aroro kanya Yawi at fagagbilugun. 13Masine wayam gbul ay nafon sas Yawi fag ngay asnu at riangan taguna, ay baliwan, bangsii yap sik tupa. Dewa katanya, nu dway am mabangsi ya, gatvngi kafag asnu at bini liug. Ay masine nu gfae famangsi am laman sa ay ngay mesa baguama tiba kaka.

14“Ay ay ngay sisian ban nu nainto way ayu te, ‘Nataw tuy at masuad?’ longi ban sa anya fagayu te, ‘Yawi at fagmabalyananun nafalfas emi siginans talun Igiptu, ebi gina ami gafagsuguanan. 15Igiptu at fun gina nafamaogatun at amatanganan ay gina yud gfalfas emi, Yawi nafabul sis talun Igiptu fagayu at ngay baguama tiba kaka ay anggan at ngay fagbaugun at riangan tama taguna. Katanya at masuad em fagnafonun sas Yawi fagayu fagbaugun at riangan taguna, gbangsi ami em munama tiba kaka.’ 16Takatatuy fag fagmafulun kata sik fakatoglagan si ay famauyungan ay si ay dangasan tagfamatang sa ayu te, Yawi at fagmabalyananun at nafalfas ayu siginans talun Igiptu.”

Ngay Taw Israel nu Gdife Dagat Maraska

17Ay gina Igiptu at fun nafalfas ngay taw Israel, Dius wa kaylat kanya fagayu nu gdalan sa sangay taw Filistia at talun, dewa sanya at munakbang. Aroro Dius nalong te, “Ngay taw Israel nung way ro anke awayan, manbali ro at ngay amatanganan ay manfoli sas talun Igiptu.” 18Nu katanya, Dius nataban way anya fagayu sas talun at yud e taw tagsas Dagat Maraska. Kaduge ngay taw Israel glao siginans talun Igiptu, kanya fagayu e ngay famalabag ay mafalganan sas awayan.

19Muisis nabuba Use at ngay bini, kata Use at nafafatuyanan sat ngay taw Israel. Ebi, Use nalong te, “Matuyan wan, Dius ban gfalangfe wa fia ayu. Nu katanya, ginanya ban, bubai ku ngay bini gina am glao ste ginan.”

20Ay kanya fagayu nalao siginans Sukut, ay anful sis Etam, sis tigyangan talun at yud e taw. 21Galay menit, Yawi si sangay taw Israel at fagunan laman gufud siginan sik turuk linyabu. Ay galay yabi, kanya gufud siginan sik turuk afuy tagfon yamag, laman malao dewa swa menit ay dewa sad yabi. 22Kafag turuk linyabu tagufud anya gina menit. Ay kafag turuk afuy at ufud gina yabi.

Currently Selected:

Nu Galin 13: OCCT

Highlight

Copy

Compare