Nu Galin 12
12
Tagbarita nu Glangfe
1Yawi nalong sas Muisis ay sas Arun gina sis talun Igiptu te, 2“Katsi fag magdanun tuyani te, taguna fag magdanun kayu banwa. 3Namasaful am sas fagayu taw Israel te, galay ban sis fasafuluk menit kata katsi fag magdanun, galay sik talanan, falganani sik kambing ay mannga sik tupa. 4Ay sik talanan nu dway ngayu at taw, ay nu dway mafamin sik mabilug tupa at yamas, fafudani sat fasabale. Ay afudi kafag ngay yamas nu seyu si sik talanan at kayuan ay at fagmafaminun. 5Kafag tupa ay fag kambing, filii tua at mataglu ay tagsik banwa at kadaulan ay at yud e malong. 6Ay alagai ay nafili fag tupa sitsigons falabi ufatk menit ginanya fag magdanun. Aroro ginanya wan fag menit ngay talanan nu gfilas at ngay nafili fag fagbaugun. 7Sanya ginan, tagai kafag fagbaugun at taguk ay rarusi say mesa tungud ay tigyangan sakbawan bale, si ay fagnanfangonan fag bale. 8Ay ginanya fag yabi, galay sik talanan mesai sugbai ay ngay filasan ay oni wan, gasfuan at mayat fag gulay, ay tinapay at yud e famabia. 9Lag am kon ay filasan at yud antama ay nu maseudan way. Abat ngate, sugbai wa daul mabilug, anggan at alfuyu ay at ngay si ay tagsisad basad. 10Lag gfae sawad ya, ay nu nke sawad way, balabag di, irugi wan. 11Kaduge am kon, falganani nu glo am; suluni ay lapak ay atulagani. Fasakiti nu kon am. Katanya ay fagmafulun sabaliwa Tagbarita nu Glangfe, laman gfauseganan am angku.
12“Ay ginanya yangay fag yabi nandalan au sas fagdaul talun Igiptu at ngay bale, ay namabul au fagayu taw Igiptu at ngay baguama tiba kaka, anggan at ngay fagbaugun at riangan taguna fag tama. Ay namaurianan au taw Igiptu at ngay fagsegan fagayu. Au Yawi. 13Ay nararus si ay ngay bale fag taguk famasaful te, am tagbanwan sanya. Nu nalag kro kanya fag taguk, glangfe kway ro ay bale, ay wa ro e faurianan takadasug sa ayu gina au gfaurianan talun Igiptu.
14“Kabavn ban, amatangi tua gugat katsi fag menit. Ay galay banwa afuli tua ban gugat ginanya fag fagmafulun laman gfauseganan am angku. Ay faningi tua gugat tuy fag faugali anggan ban sat fadogan ay kasugfunanan. 15Kaduge fituk menit, ay fakonun fag tinapay at yud yakman e famabia. Gina taguna fag menit, ukasi wan famabia tinapay tagsi ay ngay bale, aroro nusnga sinu ban at naon tinapay at ke famabia siginan taguna sitsigons fafituk menit wa katap ya te, taw Israel. 16Gina taguna ay fafituk menit, nanmaful am laman nanseg angku. Ginanya fag duak menit lag am gfakamulun ya, falganani way lang ay fakonun. Kanya yakman lang ay fakamulun.
17“Afuli tua ban gugat fagmafulun sabaliwa Tinapay at yud e Famabia, laman ban gamatang tuam gugat te, katsi fag menit nafalfas au ayu siginans talun Egiptu. Fakamuluni tua ban gugat takatanya laman ban ay fagaloan anggan ban sat fadogan ay kasugfunanan. 18Nu maful am fasigadi siginans falabi ufatk menit sitsigons faduak safulu e sadik menit at yabi, gina taguna fag magdanun, ay kadugenya ay fakonun fag tinapay at yud yakman e famabia. 19Kaduge fituk menit, lag e famabia tinapay si ay ngay bale. Fagayu ban at naon tinapay at ke famabia, kanya dewa sik taw Israel ay sik betaw, kanya wa katap ya te, taw Israel. 20Ginanya fag fagmafulun, lag am kon nusnga setaw fag fakonun at ke famabia. Ay nusnga nday ban nu namanwan am, ay fakonun at yud yakman e famabia fag tinapay.”
21Ay Muisis nafauro Israel at ngay fagtainan ay nalong te, “Nanlong am sas fagayu talananan te, ‘Namul am sik riangan tupa ay mannga sik riangan kambing laman sas fagmafulun sabaliwa Tagbarita nu Glangfe. 22Sanya ginan, fantingi kafag fagbaugun at taguk sas taya takarufa. Ay namul am sik sanga isupu#12:22 isupu: sik tanum at fagagbilugun nu gfadante ay nu gfafasine sik taw at kintap te, masuya. At masuad sik taw nu masuya, ansaman wan siginan sangay tagseg Yawi. Damai Lebitiku 14:4 ay Tap 19:18. ay fasurungi sanya fag taguk, ay rarusi say ngay mesa tungud sakbawan ay sa ay dua tigyangan sakbawan. Ay lag am gduksun siginan ay bale yakmay sbalabag. 23Aroro Yawi glangfe laman namabul ngay taw Igiptu at ngay sisian tiba kaka munama. Dewa katanya, Yawi nu nalag taguk si ay mesa tungud sakbawan ay si ay sakbawan at dua tigyangan, glangfe way lang ay bale ay gsalag way at tagbarita nu gsakbo sa ay ngay bale laman namabul ay ngay baguama tiba kaka.
24“ ‘Faningi tua ban gugat tuy fag faugali kabavn, anggan ban sa ay ngay kasugfunanan. 25Ay fataglayuni yangay ban takatanya fag fakamulun, gina ban am andasug sas Yawi at fatuyanan sa ayu fag talun. 26Ay ay ngay sisian ban nu nainto ayu te, Nataw at masuad nu katatuy ay fakamulun? 27Katatuy ban ay famalus: Tuy sik fagmafulun sabaliwa Tagbarita nu Glangfe, laman famauseganan Yawi, aroro kanya nalangfean tua ngay taw Israel at bale gina namabul ngay taw Igiptu at ngay baguama tiba kaka.’ ”
Ay Muisis nu nalong wan takatanya, ngay taw Israel narungan laman gseg Yawi. 28Ay ngay taw Israel nafaning Muisis ay Arun at longan siginans Yawi.
29Ay sis wabilug yabi, Yawi nafabul fagayu taw Igiptu at ngay baguama tiba kaka, siginans Igiptu at fun at baguama tiba kaka munama at nantubus ban anya laman sik fun, anggan at maubungan at ngay tiba kaka munama. Ay nafabul yangay fagayu fagbaugun at riangan taguna. 30Ginanya fag yabi, kafag fun ay anggan at ngay tagfakamulun ay fagayu taw Igiptu anfulo. Ay andungug nu gwayway sas fagdaul talun Igiptu, aroro tanan wa e nbul sit mesa bale.
31Ay ginanya yay fia fag yabi, Igiptu at fun nafauro Muisis ay Arun ay nalong te, “Katsi, loi wan ste ginan. Ay adgaloani wan ngay taw Israel laman nanseg am Yawi kata ay longan gugat. 32Tabani wan ay ngay fagbaugun, kata ay fagetun gugat sa angku ay loi wan. Dewa katanya, darangini yap angku laman Dius umfanyu yay angku.”
33Ngay taw Igiptu gfasakit nu gfalao ngay taw Israel siginan at talun, aroro gamatangan te, manbul. 34Nu katanya, ngay taw Israel nabuba at ngay fangawat tinapay at yud e famabia ay nasuad sat ngay fagsuadan, ay nasifig sat lanbung ay nabuba. 35Ay ngay taw Israel nafaning Muisis at longan. Ay nananget sa sangay taw Igiptu ngay lanbung, ngay famasine, sanbung salapi ay gintu. 36Yawi nafaylat ngay taw Igiptu laman malukme sa sangay taw Israel, nu katanya, ngay taw Igiptu nafon sa sangay taw Israel nusnga setaw at ngay fagetun. Takatatuy fag balyawvtan, kanya fagayu nabul wan ngay taw Igiptu at ngay ramraman.
37Ay ngay taw Israel nalao wan siginans Rameses sas Sukut. Ay fagayu at mangama unumk sandank libu, ya kataip sanya at ngay mangena ay at ngay sisian. 38Ay ngayuk taw yud Israel at nanangalo, ay ngayu yangay at tabanan ngay fagbaugun: tupa, kambing ay baka. 39Ay nu siwa sangaba dalan, kanya fagayu nafatama tinapay at yud e famabia at nabuba gina ngay taw Igiptu gaiyan anya fagayu. Nu katanya, kanya fagayu wa nafasuglat ya famabia tinapay sat fangawat tinapay, ay wa anke buknga ya laman gfalganan at fetus fag ngay fakonun.
40Ngay taw Israel nu gbanwan sis talun Igiptu ufatk sandan tuluk safuluk banwa. 41Gina sis faufatk sandan tuluk safuluk banwa gina taguyan fag menit, Yawi at ngay taw nalao siginans talun Igiptu, galay sik kasugfunanan gadgaloan. 42Ay gina kanya fagayu glao fag yabi siginans talun Igiptu, Yawi gulit anya fagayu fagngabak yabi. Nu katanya, galay banwa, taguyan fag yabi, ngay taw Israel gfauseganan Yawi, ay kanya ban fagayu gfakamulun takatanya anggan ban sat fadogan fag kasugfunanan.
Faugali sabaliwa Tagbarita nu Glangfe fag Fagmafulun
43Yawi nalong sas Muisis ay sas Arun te, “Katatuy ngay faugali sabaliwa Tagbarita nu Glangfe fag fagmafulun. At yud Israel fag ngay taw, wa masine kon ginanya fag fagmafulun at fakonun.
44“Ay nabayad fag ngay fagsuguan masine way kon kanya fagayu nung tua nafae fakatoglagan. 45Dewa katanya, at yud Israel fag ngay tagfakamulun, ay tagsiginan tibak talun fag ngay taw, wa yangay masine kon.
46“Nu kon am, si yakman sad bale. Lag am gfaduksun kafag yamas, ay lag grufa at ngay bini. 47Fagayu taw Israel masine nu gfakamulun takatanya.
48“Ay sik taw tagsiginan tibak talun, nu kaylat way namasfuan ayu, gina am nanmaful laman namauseganan Yawi sabaliwa Tagbarita nu Glangfe, kanya fagayu fae fakatoglagani yap, anggan at ngay kalongan. Nu dway katanya, kanya fag ngay taw wa masine kon gfasfuan ngay taw Israel. 49Takatatuy ban fag faugali ay fagaloan, am fag ngay taw Israel ay at yud Israel fag ngay taw tagbanwan si ayu.”
50Ay ngay taw Israel nafaning Yawi at suguan, at nalong sas Muisis ay sas Arun. 51Ay ginanya fag menit, Yawi nafalao ngay taw Israel siginans talun Igiptu gadgaloan galay at mesa kasugfunanan.
Currently Selected:
Nu Galin 12: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
