Nu Galin 11

Nu Gfabul ngay taw Igiptu at Kaka Munama

1Yawi nalong sas Muisis te, “Sadi yak faurianan ku fagnamadasugun sas Igiptu at fun ay sas fagdaul talun Igiptu. Nu nlangfe ban takatanya fag faurianan, kanya ban gfalao wan ayu ste ginan fag talun. Ay bundi lang ban gfalao, nu bunway gaiyan tua ban ayu. 2Nanlong o sa sangay taw Israel, sa sangay mangama ay sa sangay mangena te, ‘Nanget am sa ay ngay fasabale fag ngay taw Igiptu at ngay famasine at bilug at mawatan siginans sanbung salapi ay gintu.’ ” 3(Yawi nafalukme ngay taw Egiptu at amatanganan laman kaylat ngay taw Israel. Ay saman ya kanya, Igiptu at fun at ngay tagfakamulun ay fagayu taw sis talun Igiptu nasuyu Muisis.)

4Nu katanya, Muisis nalong sas Igiptu at fun te, “Katatuy Yawi at longan: ‘Arvs ro sis wabilug yabi nandalan au sas fagdaul talun Igiptu. 5Ay fagayu tiba kaka munama sis talun Igiptu umbul: siginan Igiptu at fun at baguama at nantubus ban anya laman ban sik fun, sitsigon at fagsuguan tiba daga fag mangena at sisian taguna ay anggan ngay fagbaugun at riangan taguna. 6Ay umdungug ro sas fagdaul talun Igiptu ngay taw nu gwayway ya batang andungug takafanud nya ay wa ban batang ya e kadungug kaksvn kanya. 7Dewa katanya, wa ban e kadungug sa sangay taw Israel at fagbanwanan, nusdi kadaul sik idu at subang.’ Nu katanya, sumaful ban o te, saman tua Yawi nu gdama ngay taw Israel ay ayu fag ngay taw Igiptu. 8Am ngay tagfakamulun ban grungan nangakbang sa angku ay nanlong te, ‘Loi wan ay tabani wan am kaibaman tagalo emu.’ Ay sanya ginan, glo kwan!” Ay Muisis maksvn nu kadotama gina glao siginans Igiptu at fun at daga salubangan.

9Ebi, Yawi nalong sas Muisis te, “Igiptu ban at fun wa kaylat gdungugan emu laman ban namasure au ku ngay fakamulun at madulo sas talun Igiptu.” 10Muisis ay Arun nafakamulun takatanya fag ngay madulo sis Igiptu at fun at daga salubangan. Dewa katanya, Yawi nafaogat Igiptu at fun at amatanganan, ay kafag fun wa naylat ngay taw Israel nu glao siginan at talun.

Currently Selected:

Nu Galin 11: OCCT

Highlight

Copy

Compare