2 Krunika 18
18
Mikaya Nafararang sas Akab
1Fn 22:1-28
1Nu ngayu wan Eusafat at ngay ramraman, kanya ansik takadungug ay nafagadgalangan. Ay kanya nafadadwa at ngay kalongan sas fun Akab at ngay kalongan. 2Ay nu nlangfe wan nu seyuk banwa, Eusafat nalao sas Samarya laman nansibo fun Akab. Ay fun Akab nafilas ngayuk tupa ay ngayuk baka laman at falganan sas Eusafat ay sat ngay fagsuguan. Ay kanya nafaylatan laman nangalo anya namawayan furuan Ramut-Gilyad. 3Ay Akab nainto sas Eusafat te, “O nangalo o angku laman namawayan Ramut-Gilyad?”
Ay kanya nabalus te, “Sabv, mafalganan au nangalo emu, ay mafalganan kyangay gfaalo sa emu ku ngay tagfawayan laman namawayan.” 4Ay Eusafat nalong yangay fia sa anya te, “Taguna nanginsafuli yap Yawi at longan.”
5Ay Israel at fun nafaful ufatk sandank taglong ay nainto te, “O namawayan au Ramut-Gilyad ay mannga duan?”
Ay kanya fagayu nabalus te, “Kin, loi wan, aroro Dius ro gfababo emu.”
6Ay Eusafat nainto te, “O we ste ya Yawi at taglong tam fagnangintoan?”
7Ay Israel at fun nabalus Eusafat te, “Sabv, e sik taw yay tam fagnangintoan Yawi at fakaylatun. Dewa katanya, kauri au anya, aroro we longan ya sa angku at masine nu bunway at mauri way lang. At ngayan Mikaya, Imla at baguama.”
Ay Eusafat nalong te, “Lag glong takatanya.”
8Ay Israel at fun nalong te, “Fastiei wa vtv Mikaya, Imla at baguama.”
9Sanya ginan, Akab talun Israel at fun ay Eusafat talun Uda at fun nasulun at mesa lanbung laman sik fun ay anlunggung sit mesa faglunggungan sis salubangan fagruyusan tagsibaliwas furuan Samarya at sakbawan, ay gdungugan ngay taglong at ngay longan. 10Ay Sedekya fag taglong, Kenaana at baguama nawat duak sunge at fangawat sanbung. Ay kanya nalong te, “Yawi glong te, ‘Fun Akab namawayan o ngay taw Aram siginan tuy fag duak sunge, ay gfamin ban o anya fagayu.’ ”
11Katanya yay fagayu taglong at longan. Kanya fagayu nalong te, “Namawayan o Ramut-Gilyad ay gbabo ro wo anya fagayu, aroro Yawi ro ggubuk emu.”
12Ay fun Akab at nasugu nalong sas Mikaya te, “Fagayu taglong ansadi glong te, fun ro gbabo, ay anggan o fakatanyai yangay am longan.”
13Ay Mikaya nalong te, “Gfatuyanan au sas Yawi, tagleleg fag Dius te, at ngay longan tua ban ku fagnanlongun.”
14Ay Mikaya nu ndasug sas fun Akab, fun nainto anya te, “O namawayan ami Ramut-Gilyad, ay o mannga duan?”
Ay Mikaya nabalus te, “Namawayan wam ay gbabo ro am aroro Dius gfababo ro ayu sanya fag ngay taw.”
15Ay fun Akab nalong sas Mikaya te, “Seyu ginan wan nu glong au emu te, fatuyanani sas Yawi at ngayan laman glong o sa angku at matuyan?”
16Ay Mikaya nalong te, “Nataginfan au ay nalag ngay taw Israel nu gfanaruayan sa sangay buksul kata ngay tupa yud e gulit ya. Ay Yawi nalong te, ‘We gfangguna ya kanya fag ngay taw. Faulii wan manabayan kanya fagayu.’ ”
17Ay fun Akab nalong sas Eusafat te, “O nunda kya nalong emu te, kanya wa batang e nalong at matuyan sabaliwa angku, nu bunway fagmauriun way lang?”
18Ay Mikaya nalong yangay te, “Dungugani Yawi at longan! Nalag au Yawi nu malunggung sit faglunggungan, ay at ngay tagbarita nu malindug gsumbalian sit dua tigyangan. 19Ay Yawi glong sa sangay awatan tagsis banwa te, ‘Sinu at nandaya Akab, talun Israel at fun, laman namaylatan anya namawayan Ramut-Gilyad laman kanya nangabul?’ Saman wa saman at ngay famalus.
20“Ay sanya ginan sik falad ankakbang sas Yawi ay nalong te, ‘Au wa ro at nandaya anya.’
“Ay Yawi nainto te, ‘Setain ro?’
21“Ay kafag falad nabalus te, ‘Nanlao au ay namasik takamuagan au kanya fag ngay taglong.’
“Nu katanya, Yawi nalong anya te, ‘Loi wan ay namakamulun o takatanya.’
22“Nu katanya, Yawi nanamasa am ngay taglong at ngay bibig sik takamuag fag falad, aroro Yawi kaylat nu gababawan o.”
23Ay Sedekya, Kenaana at baguama, ankakbang sas Mikaya ay nafalang sit fingi ay nalong te, “Setain nu malong o te, Yawi at falad nalao siginan angku, ay nanamakamatoan emu?”
24Ay Mikaya nabalus te, “Sumaful ban o, gina ban o nababawan, ay nananuksuan sam bale at masuksuk fag suluk.”
25Ay Akab, Israel at fun masakit nu gsugu te, “Gamati Mikaya ay tabanani fafolii sas Amun tagfangguna sis furuan daul, ay sa ku baguama Uas. 26Longi te, ‘Katatuy fun Akab at suguan: Ubungi tuy fag taw. Tinapay yakman lang ay mamam ay fagfonun, yakmay kban anfoli manabayan siginans fagawayanan.’ ”
27Ay Mikaya nalong te, “Nu nfoli tua ban o manabayan, Yawi wa naringang siginan angku.” Ay nalong yangay sa sangay taw tagsanya te, “Amatangi ku nalong.”
Akab nu Kabul
1Fn 22:29-35
28Akab, Israel at fun ay Eusafat, Uda at fun, nanamawayan Ramut-Gilyad. 29Ay Akab, Israel at fun, nalong sas Eusafat te, “Gsulun au sik lanbung laman we gtoglag angku, dewa katanya, suluni am lanbung tagfatoglag te, sik fun o.” Nu katanya, Israel at fun nasulun sik lanbung laman wa katoglag, ay nalao sas fagawayanan.
30Ay Aram at fun nasugu sat ngay fun tagfawayan tagsakay sit faguyudan te, “Lag am namafalo nusnga sinu fag tagfawayan, sangay Israel at fun.” 31Ay kafag ngay fun tagfawayan tagsakay sit faguyudan nu nalag Eusafat, gamatangan te, “Anud, kanya wan Israel at fun.” Ay kanya fagayu anbiling laman gfawayan anya. Ay Eusafat nauro sas Yawi, ay Yawi nagubuk tua anya ay nafayayu at ngay fawayan. 32Ay kafag ngay fun tagfawayan nu nasaful te, kanya bunwa Israel at fun, kanya fagayu anragang nu gfafalo anya.
33Ay sik taw Aram fag tagfawayan kaduge gfana ngay taw Israel at ngay tagfawayan, kanya nafana Israel at fun sit buknga famalabag ay natayuk sit dubdub. Ay fun Akab nalong sat tagfalao at kabayu te, “Fayayui angku siginans fagawayanan, aroro nafanan au.” 34Maksvn tua at awayan ginanya fagngabak menit, Israel at fun masararean sit faguyudan gsalubang Aram at ngay tagfawayan sitsigons fafun. Ay menit nu nfalyu wan kanya anbul wan.
Currently Selected:
2 Krunika 18: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
