2 Krunika 17
17
Eusafat nu Gfunan Talun Uda
1At natubus Asa laman sik fun, at baguama Eusafat. Ay Eusafat nafaksvn at fagfunanun, laman manamawayan sas Israel. 2Ay kanya nasugu at ngay tagfawayan laman nangulit sat ke alad fag ngay furuan sis Uda, ay kanya nawat yangay at ngay tagfawayan at fagulitan fag bale sis talun Uda ay si sangay furuan sis Efraim, at mama Asa at nagbilug. 3Ay Yawi naufud Eusafat, aroro gina taguna fag ngay banwa kanya nu gfunan, nafaning tua at mangaguyang Dabid nu mabanwan. Kanya di nananget gubuk sas Baal fag ngay fagsegan, 4nu bunway kanya ankakbang tua sat mama at Dius ay nafaning tua at ngay suguan, abat ngate, gfaning ngay taw Israel nu gugali. 5Yawi nafaksvn Eusafat at fagfunanun, ay ngay taw Uda nafon sa anya at ngay famonun. Nu katanya, kanya anramraman ay ansik takadungug. 6Ay kanya gfaning tua Yawi at ngay balyawvtan. Kanya nanamaiklas ngay fagnansegan si tangabat fag ngay buknga, ay anggan ngay turuk fagtoglagan Asera fag fagsegan sis talun Uda.
7Ay gina sis fatuluk banwa nu gfunan, kanya nataban at ngay tagfangguna: Ben-Kail, Ubadyas, Sakaryas, Netanel, ay Mikaya laman namoyung sa sangay furuan sis Uda. 8Ay galo yangay anya fagayu ngay taw Lebi: Semaya, Netanya, Sebadya, Asael, Semiramut, Eunatan, Adunya, Tubya, Tub-Adunya, ay ngay tagfon fanggalangun: Elisama, ay Euram. 9Ay kanya fagayu gbuba fagrirukan Yawi at suguan, ay nadalanan sas fagayu furuan sis Uda, ay kanya fagayu nafoyung sa sangay taw.
10Yawi naylat fagayu fagfagtainanan at munakbang sis talun Uda nu kalimu tua anya, nu katanya, we manamawayan ya fun Eusafat. 11Ay tibak taw Filistia nabuba at ngay famonun fag ngay salapi laman at famayad sas fun Eusafat, ay ngay taw Arabya nanamon yangay fituk libu fituk sandank tupa ay fituk libu fituk sandank kambing. 12Nu katanya, ankaksvn yay Eusafat nu mabalyanan. Kanya nafawat sis talun Uda at mogat fag ngay fagsarigan ay ngay furuan fagfungsuan gutluan. 13Ngayu at nafaful tagsaman saman fag ngay ramraman sa sangay furuan sis Uda. Ay kanya nafasas furuan Erusalem at ngay tagfawayan tagsaful ay at maseganama. 14Ay nariruk at ngay tagfawayan at ngay ngayan kata at mesa talanan.
Siginans Uda at kasugfunanan, Adna wan tagfangguna tuluk sandank libuk tagfawayan tagsaful ay at maseganama, ay nafud sas sadik libu galay sik gaban.
15Ay at faduak tagfangguna Eukanan, kanya gfangguna duak sandan waluk safuluk libuk tagfawayan.
16At fatulu Amasya, Sikri at baguama, kanya gfangguna duak sandank libuk tagfawayan tagsaful ay at maseganama. Kanya mafalganan gfakamulun Yawi at fakamulun.
17Ay siginans Benamin at kasugfunanan Elyada sik taw at maseganama, ay gfangguna duak sandank libuk tagfawayan. Kanya fag ngay tagfawayan e ngay famalabag ay e ngay godun.
18Ay at fadogan, Eusabad tagfangguna sadik sandank waluk safuluk libuk tagfawayan at ke ngay famawayan.
19Kanya fagayu fun Eusafat at ngay tagfakamulun, saman ya at ngay tagfawayan sa sangay furuan at ke ngay alad tagsis talun Uda.
Currently Selected:
2 Krunika 17: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
