2 Krunika 19
19
1Ay Eusafat noli wan sat bale sas Erusalem. 2Ay Yeu, Kanani fag taglong at baguama nafablang anya ay glong te, “Wain am fagnagubukun at mauri fag taw ay am fakesugun tagfawayan Yawi? Siginan takatanya Yawi kauri emu. 3Dewa katanya, e nafakamulun tuo at masine. Narufa tuo sis Uda fag turuk fagtoglagan Asera fag fagsegan, ay naylat tuo gfaning Dius.”
Eusafat Nafili at ngay Tagwabilug
4Eusafat gbanwan sis Erusalem. Dewa katanya, kanya nansibo way gugat sas Beerseba ay sas Efraim at fagagbilugun fag ngay buksul, laman namafoli ngay taw sas Yawi, sat ngay mangaguyang at Dius. 5Kanya nafili ngay tagwabilug sas galay sik furuan at ke alad sis Uda. 6Ay kanya nalong sa kafag ngay tagwabilug te, “Nu nanwabilug am, amatangani tua fia, aroro bundi sas taw nu gfawabilugan am nu bunway sa tuas Yawi, tagsi ayu gina am gfawabilugan. 7Suyui tua Yawi, ay matuyani tua nu gfawabilugan am, aroro Yawi tam Dius wa kaylat fagmatuyanun nu kalyam, ay nu e fagfili nu gfawabilugan, ay nu gbul famayad gina gfawabilugan.”
8Ay Eusafat nafili yangay sis Erusalem, ngay taw Lebi, ngay tagfon fanggalangun, ay tagfangguna ngay taw Israel at ngay talanan, laman tagfasine kafag ngay taw at ngay mamalong sabaliwa Yawi at suguan, ay tagfasine nu e gawayan way. 9Ay kanya nalong sa anya fagayu te, “Suyui tua Yawi, ay fakamuluni at matuyan sas fagdaul ay amatanganan. 10Ay nu e nafadasug sa ayu ngay mamalong dewa ndaginan ay furuan, sabaliwa at nafamabul, ay at nafamabo ngay suguan ay fagaloan, fararangi sa anya fagayu te, lag e asalanan sas Yawi, laman di gfadasug at dotama sa ayu ay sa kafag ngay taw. Fakamuluni takatanya laman wam gasalanan. 11Ay nu e malong wayam sabaliwa Yawi at suguan, at namasine Amarya fag tagfon fanggalangun. Ay nu sabaliwa ay fun ay fagyudun mafasine, at namasine Sebadya Ismael at baguama fag tagfangguna Uda at gaban. Ay ngay taw Lebi gubuk ayu laman e fagmatuyanun tuam gugat. Maksvni tua nu gfakamulun am ay ngay fakamulun. Yawi ban nangus gufud tua ngay taw tagfakamulun at matuyan.”
Currently Selected:
2 Krunika 19: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
