2 Krunika 16
16
Taguyan fag ngay Banwa Asa nu Gfunan
1Fn 15:17-24
1Gina sis fatuluk safulu e unumk banwa Asa nu gfunan, Baasa, Israel at fun nafawayan talun Uda, ay nafaksvn furuan Rama at alad laman we masakbo ay maduksun siginans Uda, fun Asa at talun. 2Ay Asa nasugu laman namul ngay salapi ay gintu siginans fagfungsuan ngay ramraman sis Yawi at bale, ay siginan at sadili bale. Ay kanya nanamon sas fun Ben-Adad talun Aram at fun, tagbanwan sis furuan Damasku. 3Ay Asa nalong anya te, “Kaylat au nangawat sik nasadian sa emu, kata ta mesa mama at nawat. Nafabuba au emu sik famonun sanbung salapi ay gintu. Fai yud e masuad ya am nasadian Baasa, Israel at fun, laman glao ro siginan ku talun.”
4Ay Ben-Adad naylat fun Asa at famonun ay nasugu at ngay fun tagfawayan laman namawayan ngay furuan sis Israel. Ay kanya nababo ngay furuan Iyun, Dan, Abel-Maim ay fagayu fagfungsuan gutluan sis talun Naftali. 5Ay Baasa nu nadungug kafag barita, anragang wan nu gfaksvn furuan Rama at alad. 6Sanya ginan, fun Asa nasugu fagayu taw Uda laman namuba ngay gang ay ngay balse, ebi Baasa at famale sis Rama. Ay kanya nagbilug kafag ngay famale laman gfaksvn furuan Geba tagsis Benamin fag talun ay anggan furuan Mispa.
7Ginanya fag buknga, Kanani fag taglong nalao sas Asa talun Uda at fun, ay nalong te, “Aroro nafanud way o sas Aram at fun, abat ngate, sas Yawi am Dius, wam anke buknga ya namabul talun Aram at fun at ngay tagfawayan. 8O gamatang yay o at kinfasludan sa sangay taw Etiupya ay sa sangay taw Libya at ngay tagfawayan ay at ngay faguyudan, ay at tagsaful gsakay sis kabayu ngayu? Ginanya fag buknga gafanud tuo sas Yawi, ay kanya nafababo tua ayu sa kafag ngay taw. 9Aroro Yawi gdama sas fagdaul daga laman gfabitsug ngay taw at matuyan sa anya. Wa matuyan am ngay nafakamulun. Nu katanya, siginan ban katsi namawayan way ban o gugat.”
10Nu katanya, fun Asa andotama maksvn kafag taglong ay nafaubung. Ay siginan yangay ginanya Asa nafasigad nafaidapan at ngay taw tiba.
11At fansulitan sabaliwa Asa nu gfunan, siginan nu gfasigad sitsigons fakatabuan, marirukan sis fagrirukan fansulitan sabaliwa Uda ay Israel at ngay fun. 12Gina sis fatuluk safuluk e siamk banwa Asa nu gfunan, kanya anke fagagwantanun aroro anke fakasaitun sit darafa. Ay dewa maksvn wan at fakasaitun, kanya wa naet gubuk sas Yawi, abat ngate, nanangakbang way sa sangay taw tagsaful gfafia. 13Ay kanya anbul gina sis faufatk safulu e sadik banwa nu gfunan. 14Ay nanamoli anya sat nafawat fag fagfolian laman sa anya sis Dabid at furuan daul. Ay nafoli anya sa sik fagtaygilidanan, ay nararus anya tagsaman saman fag ngay famaebebanglu fag ngay lune. Ay ngay taw nafaigang tagbia fag afuy laman gfauseganan anya.
Currently Selected:
2 Krunika 16: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
