2 Krunika 15
15
Asa at Nafabagu fag ngay Fakamulun
1Dius at Falad antayuk sas Asarya, Uded at baguama. 2Ay kanya nanangablang fun Asa, ay nalong anya te, “Fun Asa, dungugani, ay anggan am fag ngay taw Uda, ay ngay taw Benamin. Yawi si tua ayu nu gbanwan tuam si anya. Nu grvbvy tuam anya, lumag am anya. Ay nu natalyuyan wayam anya, kanya gaiyan yangay ayu. 3Ngaduge wan ngay taw Israel nu gbanwan nu yud si anya at matuyan fag Dius, ay nu yud e ngay tagfon fanggalangun tagfoyung anya fagayu, ay nu yud e fagaloan suguan. 4Ay gina kanya fagayu gidapan, nadarangin sas Yawi, Israel at Dius, ay kanya nagubuk tua anya fagayu. 5Ginanya malimu taglao aroro nusnga nday we fagmanabayanun ya at ngay taw. 6Ay ngay talun anggan ngay furuan gawayan, aroro Dius nafasagsagan kanya fag ngay taw siginan ngay fagidapun. 7Dewa katanya, am maksvni tua ay lag kamomuy, aroro e fon ban fia ayu sa ay ngay nafakamulun.”
8Asa nu nadungug Asarya, Uded at baguama, at longan, kanya anseganama. Ay kanya naukas wan ngay fagsegan at maksvn nu mauri sis fagdaul talun Uda ay sis Benamin, ay tagsit nagbilug fag ngay furuan tagsis Efraim fag ngay buksul. Ay kanya nafasine fagirugan fanggalangun sas Yawi, tagsis Yawi at bale at tangbi.
9Sanya ginan, kanya nafaful fagayu taw Uda ay taw Benamin, ay anggan taw Efraim, taw Manase, ay taw Simyun tagbanwan si anya. Ngayu at nalin sas Uda siginans talun Israel, kanya fagayu nu nasaful te, Yawi Asa at Dius, gufud tua anya.
10Kanya fagayu anful sas talun Erusalem, gina sis fatuluk magdanun, sis falabi limak banwa Asa nu gfunan. 11Ay ginanya fag buknga kanya fagayu nafon at ngay fanggalangun sas Yawi, at nabul fag ngay fagbaugun siginan at ngay fawayan, fituk sandank baka ay fituk libuk tupa ay kambing. 12Ay kanya fagayu nawat at nasadian, laman nandarangin sas Yawi, sat ngay mangaguyang at Dius, sas fagdaul at amatanganan ay sas fagdaul at basad taw. 13Ay nusnga sinu at yud gseg Yawi, ngay taw Israel at Dius, gfabul wan, dewa sisian ay mafagtainan, mangama ay mangena. 14Ay kanya fagayu nafatuyanan sas Yawi, siginan sik awang daul, gasfuan sik uro daul, ay siginan nu gfawang at ngay budyung. 15Ngay taw Uda guseganan aroro kanya fagayu nafatuyanan sas fagdaul at amatanganan. Ay kanya fagayu nadarangin sas Yawi sas fagdaul at amatanganan, ay kanya fagayu nalag at fagmatuyanun. Ay Yawi nafae fagmanabayanun anya fagayu nusnga nday.
16Ay fun Asa naiyan yangay at fufuina Maaka fag fun mangena, aroro kanya nafawat at maksvn nu mauri fag turuk fagtoglagan Asera fag fagsegan. Ay Asa nafafuan ay nafabalse kafag turuk, ay nafairug sis Liskung Kidrun. 17Ay Asa deyud naiklas ngay fagnansegan sa tangabat fag ngay buknga, kaduge kanya gleleg matuyan tua gugat sas Dius. 18Ay kanya nabuba sas Dius at bale at nafasaman fag ngay fagagbilugun anggan at mama at nafasaman fag ngay fagagbilugun, ay anggan gintu ay sanbung salapi.
19Wa batang e awayan sitsigons fatuluk safulu e limak banwa Asa nu gfunan.
Currently Selected:
2 Krunika 15: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
