1 Krunika 28
28
Dabid at Algan laman sas Yawi at Bale
1Fun Dabid nafauro ngay taw Israel at ngay tagfangguna: fagayu tagfangguna ngay kasugfunanan, tagfangguna ngay tagfawayan tagfakamulun sas fun, ay tiba yak tagfangguna ngay tagfawayan tangayu, ay tagfangguna tagfakamulun sas fun ay sat ngay sisian laman galaga at ngay fagagbilugun, ngay fagbaugun, ay fagayu tagfangguna sis fun at bale daul, ay at ke fagmabalyananun fag ngay taw, ay fagayu tagfawayan at maseganama.
2Kanya fagayu nu maful wan, Dabid anlindug ay glong te, “Ku ngay faduksay ay ku ngay taw, dungugani. Kaylat au namawat Yawi at bale laman fagfasakboan Fagsuadan Nasadian, ay laman e fagfatungkudan at ngay darafa. Ay e algan kwan at namawat takatanya. 3Dewa katanya, Dius nalong sa angku te, ‘Bunwa ban o at namawat ku bale laman fagnamauseganan ku ngayan aroro sik tagfawayan way o ay ngayu am nafabul.’ 4Ay dewa katanya, Yawi, Israel at Dius nafili angku siginan ku mama at talanan, laman ban gfunan ktua gugat talun Israel. Kanya nafili Uda at kasugfunanan laman tagfangguna fagayu kasugfunanan. Ay siginan yangay kafag kasugfunanan nafili ku talanan ay siginan ku talanan kanya nafili angku laman talun Israel at fun. 5Ay Yawi nafon angku ngayuk baguama ay sas fagayu ku baguama kanya nafili Sulumun at nanfunan Yawi at fagfagtainanun fag talun Israel. 6Ay kanya nalong sa angku te, ‘Am baguama Sulumun at namawat ku bale ay anggan fagaweanan. Aroro nafili au anya laman ku sisian ay au ban at mama. 7Ay kanya ban nu gfataglayun tua gfaning ku ngay suguan ay ku faugali kata katsi at fakamulun, namasik fun kban at kasugfunanan kabavn ban.’
8“Nu katanya, sis Yawi at ngay taw Israel ay sa tam Dius at daga salubangan, gsugu au te, faningi ay Dius Yawi at ngay suguan laman ban gbanwan tuam gugat ste fag talun at masine, ay namagbilug ban am sa ay ngay kasugfunanan kabavn.
9“Ay o, ku baguama Sulumun, toglagi ay fakamuluni sa am mama at Dius sas fagdaul am amatanganan aroro Yawi glag way tam amatanganan ay saful tam algan ay tam fagamatanganun. Nu kakbang tua ban o gugat sa anya, ggubuk tua ban emu. Dewa katanya, nu natalyuyan way ban o anya, kanya ban gaiyan emu kabavn. 10Nu katanya, amatangani tua fia. Yawi nafili emu laman namawat at Bale laman ban sanya nu e nanseg anya. Maksvni tua ay fakamuluni fia tuy fag fakamulun.”
11Sanya ginan, Dabid nafon sas Sulumun at fagaloan sabaliwa nu namawat Yawi at bale ay at ngay sakbawan, ngay fagfungsuan nusnge wain, ngay suluk tagsit tungud, ngay suluk sisad bale, ay at mafasamanan fag suluk nu inda nu gfalyam ngay taw at ngay asalanan. 12Ay kanya nafon wan fagayu fagaloan at Masine fag Falad at nafoyung anya nu namawat Yawi at bale at ngay fagaweanan, sas fagayu suluk tagsit ligung, fagfungsuan nusnge wain, ay fagfungsuan yangay nusnga setaw fag ngay fanggalangun. 13Ay kanya nafoyung sat baguama Sulumun nu setain nu gafud ngay tagfon fanggalangun ay ngay taw Lebi ay fagayu fakamulun nu gfakamulun sis Yawi at bale ay katanya yangay fagayu at ngay fagagbilugun gina gfakamulun. 14Ay nafoyung yangay nu seyuk sanbung salapi ay gintu at fagnangagbilugun laman fangawat tuy fag ngay fagagbilugun: 15ngay salung ay at ngay fagfatungkudan at mawatan siginan gintu, ay ngay salung ay at fagfatungkudan at mawatan siginan sanbung salapi, 16ngay fagfatungkudan at mawatan siginans gintu at fagfatungkudan ngay tinapay laman fanggalangun sas Dius; sis fagfatungkudan at mawatan siginans salapi; 17tagbia fag ngay fansaruk at ke sarangan at mawatan siginans gintu; ngay taya fagsuadan famaramsig fag taguk ay sa sangay fagsuadan mamam; ngay bang at mawatan siginan at yud e suglat fag gintu ay ngay bang at mawatan siginans salapi; 18ay at mawatan gintu fag fagirugan laman fagirugan famaebebanglu. Ay Dabid nafoyung yangay sas Sulumun nu setain nu kawat awatan siginans gintu, at fakfak taglanbung sis tungud Fagsuadan Nasadian.
19Ay fun Dabid nalong te, “Tuy fag ngay fagaloan anriruk kata Yawi at suguan, ay nafoyung angku nu setain tuy fagayu nu kafasludan.”
20Ay Dabid nalong yangay sat baguama Sulumun te, “Maksvni ay maseganamai. Fasigadi wan fawati. Lag o kalimu ay kamomuy, aroro Yawi, ku Dius galo emu. Kanya ban wa gubun ay wa gfabayan emu anggan antabu at bale. 21Ngay tagfon fanggalangun ay ngay taw Lebi mafalganan wan sas fagayu fakamulun sis Yawi at bale, ay e ngay taw yangay at mafalganan ggubuk emu at ke fagmakatuun gfakamulun nusnga setaw fag fakamulun. Fagayu tagfangguna ay anggan ngay taw mafalganan gfaning emu.”
Currently Selected:
1 Krunika 28: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
