1 Krunika 29
29
Ngay Famonun laman Famawat Yawi at Bale
1Ay sanya ginan, fun Dabid nalong sas fagayu taw Israel te, “Dius nafili ku baguama Sulumun, ay kanya mabaguama yay ay ye nagdalanan. Maksvn tuy fag fakamulun aroro at fagnamawatun fag bale bundi sas taw, sa tua tam Dius Yawi. 2Nafakamulun au fagayu laman gfalganan at ngay fangawat sa ku Dius at bale kata gintu, salapi, tansu, sanbung, kayu, gang at mafanud nu kabayad ay tiba yak mafanud fag ngay gang ay ngay gang tagridrirukun, ay ngayuk gang malaksi. 3Ay aroro kaylat au namawat ku Dius at bale, gfon kwan ku ngay fagagbilugun at mawatan siginans gintu ay salapi, saman ya ku nafaful fag ngay fangawat laman sas Dius at bale. 4Ay ku fagnamonun sandank libuk fabudbungguan gintu tagsiginans Ufir, ay duak sandan limak safuluk libuk fabudbungguan sanbung salapi. Kanya ban fagayu famadalusan sa sangay dingding, 5ay tiba yak fagagbilugun ngay takawat at fagnangawatun yay. Katsi sinu takaylat yangay gfon takatanya fagayu sas Yawi?”
6Sanya ginan, ngay tagfangguna talanan, ay ngay tagfangguna ngay taw Israel at kasugfunanan, ay ngay tagfangguna tagfawayan, ay at fagfatigwanan fag ngay tagfangguna fun at ngay fakamulun, nafon yud fabulunan. 7Kanya fagayu nafon sadik sandan fituk safulu e limak libuk fabudbungguan gintu, safuluk libuk famayad at mawatan siginans gintu, tuluk sandan limak safuluk libuk fabudbungguan salapi, unumk sandan tuluk safuluk libuk fabudbungguan tansu, ay tuluk libu limak sandank libuk fabudbungguan sanbung. 8Ay e nafon yangay at mabyat nu kabayad fag ngay gang, ay kanya nafasakbo sas fagfungsuan sis Yawi at bale. Ay tagulit kanya fagayu, Eyel tagsiginans Gersun at gaban. 9Ngay taw nauseganan at ngay tagfangguna aroro nu gfon sas Yawi di gafabulunan. Ay fun Dabid maksvn yangay nu guseganan.
Dabid at Darangin
10Dabid nafauseganan Yawi sis salubangan ngay taw. Glong te, “Yawi, em mangaguyang Akub at Dius, o way lang em fagfausegananun kabavn!
11“Yawi, o wan at fun sas fagayu nusnge wain, ay at mabalyanan, ay sik fagsuyuun tagtungud sas fagayu, ay at mauseganan! Aroro o way tagagbilug fagayu tagsis banwa ay tagsis daga. 12Siginan emu fagmaramramanun ay famauseganan ay gfunan o fagayu nusnge wain. Mabalyanan o ay o wan tagfabitsug ay tagfon fagmabalyananun sas nusnga sinu.
13“Em Dius, katsi gfauseganan ami ay gfabat am ngayan at mauseganan fag fagsuyuun. 14Dewa katanya, sinu au ay ku ngay taw laman namon ami sa emu takayu tuy fag fanggalangun? Fagayu nusnge wain siginan emu, ay gfafoli ami sa emu am nafon sa emi. 15Yawi, nasaful wo te, betaw way mi ste swa daga, kata em ngay mangaguyang. Nu katanya, em leleg kalyam way kata sik aninu.
16“Yawi, em Dius, siginan way emu fagayu em fon laman famawat am bale, laman famauseganan am ngayan at yud e malong. O way tagagbilug kanya fagayu! 17Ku Dius, nasaful au te, nainsaful o em ngay amatanganan ay guseganan o nu nalag o te, matuyan tuami. Nu katanya, matuyan ay bundi fabulunan nu gfon au sa emu tuy fagayu. Ay guseganan au aroro nalag au te, anggan am ngay taw tagste di gafabulunan nu gfon.
18“Yawi, em mangaguyang Abrayam, Isak ay Akub at Dius, fasii ban nangus gugat am ngay taw at amatanganan at mafamaning, ay gubuki anya fagayu laman matuyan tua ban gugat sa emu. 19Ay gubuki yangay ku baguama Sulumun laman kaugat yay nu matuyan ay nu gfaning am ngay suguan, ay am ngay foyungan, ay am ngay faugali ay nu gfakamulun fagayu laman gfawat am Bale ku nafalganan.”
20Sanya ginan, Dabid nalong sas fagayu taw te, “Fauseganani ay Dius Yawi.” Nu katanya, ngay taw nafauseganan Yawi at ngay mangaguyang at Dius. Kanya fagayu natudan ay namalub laman gfauseganan Yawi, ay at fun.
Nu Gtoglag Sulumun laman sik Fun
21Ay balabag di, kanya fagayu nafon at ngay fagirugun fag fanggalangun sas Yawi: sadik libuk tumad baka tama, sadik libuk tama tupa, ay sadik libuk riangan tupa. Ay nafon yangay ngay fanginum fag fanggalangun, ay tiba yak fanggalangun laman sa sangay taw Israel. 22Ay ginanya fag menit kanya fagayu maful guseganan gfangon ay gmamaman sis Yawi at daga salubangan. Ay sanya ginan, kanya fagayu gdog yay gfoyung te, Sulumun, Dabid at baguama, sik fun ay naugwag sas Sulumun langis sis Yawi at daga salubangan laman sik fun, katanya yangay at nafakamulun sas Saduk laman sik tagfon fanggalangun.
23Nu katanya, Sulumun namalunggung sis Yawi at faglunggungan laman sik fun, fantubus at mama Dabid. Ay Sulumun anke ramraman, ay fagayu taw Israel nafaning Sulumun. 24Ay fagayu tagfangguna ay ngay taw ke fagmabalyananun ay anggan fun Dabid at ngay baguama nafatuyanan te, namaning ban fun Sulumun. 25Yawi nafasik takadungug Sulumun sas fagdaul talun Israel ay nafon famauseganan, tibak fun sis Israel at yud nadalan.
Dabid nu Kabul
26-27Dabid, Ese at baguama, nafunan Israel at kadugean ufatk safuluk banwa; fituk banwa sis Kebrun ay tuluk safulu e tuluk banwa sis Erusalem. 28Kanya ngaduge tua nu gleleg, ay maramraman ay sik fagsuyuun, ay nu kabul mafufuama wan. Ay at baguama Sulumun at natubus anya laman sik fun. 29Ay fansulitan sabaliwa fun Dabid nu gfunan, siginan nu gfasigad sitsigons fakatabuan, marirukan sis ngay taglong Samwel, Natan, ay Gad at fagrirukan. 30Ay anriruk sa kafag ngay taglong at fagrirukan nu setain nu gfunan ay nu se aksvn nu mabalyanan, nu setain fagayu at kinfasludan sa anya ay sas Israel, ay sat ngay tagligung si anya fag ngay fagfagtainanan.
Currently Selected:
1 Krunika 29: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
