Matei 12
12
Le spiče ando des le Savatohko.
1Ando čiro kodoa, o Isus nakhălas anda le lanuri le divehkă, ande khă des Savatohko. Lehkă jene, kai sas bokhale, line te çîrden spikuri divehkă thai te xan le.#Deut. 23.25. Marko 2.23. Luka 6.1.
2Le Fariseaia, kana dikhline e buti kadea, phendine Lehkă: „Dikta kă Te jene kărăn so nai lengă muklino te kărăn ando des le Savatohko.”
3Ta o Isus dea le anglal: „Ta tume na drabardean so kărdea o Davido, kana bokhailo, o thai kukola kai sas andekhthan lesa?#1Sam. 21.6.
4Sar šutea pe ando Khăr le Devllehko, thai xalea le manŕă kai thonas pe angloa Rai, kai nas meklino te xale či o, či kukola kai sas lesa, numai le rašangă?#Exod. 25.30; 29.32, 33. Lev. 8.31; 24.5, 9.
5Or na drabardean ande Kris, kă ando des le Savatohko, le rašea ušteaven o Savato, thai sa kadea on nai došale?#Num. 28.9. Ioan 7.22.
6Ta Me phenau tumengă kă koče sî Iekh mai baro sar o Templo.#2Kron. 6.18. Mal. 3.1.
7Te jeanglino so ameal: „Mila kamau, ta na jertfe,” nahkă došaven varesar bidošalen.#Cap. 9.13. Osea 6.6-8.
8Kă o Šeau le manušehko sî Rai i le Savatohko.”
O manuši le vastesa šuko.
9O Isus gălotar oçal, thai šutea pe ande khă khăngări.#Marko 3.1. Luka 6.6.
10Thai dikta kă ande khăngări sas khă manuši kai sas les o vast šuko. On, kaste daštin te došarăn le Isusos, pušle Les: „„Sî mišto te sastearăs ando des le Savatohko?”#Luka 13.14; 14.3. Ioan 9.16.
11O dea le anglal: „Kon sî o manuši kodoa anda tumende kai, kana sî les khă bakri, thai perăl lehkă ande khă groapa, ando des le Savatohko, te na astarăl te ankalavel la avri?#Exod. 23.4, 5. Deut. 22.4.
12Sodença mai kuči sî khă manuši sar khă bakri? Anda kodea sî meklino te kărdeol pe mišto ando des le Savatohko.”
13Atunčeara phendea le manušehkă kodolehkă: „Tinzosar teo vast!” O tinzosardea les, thai o vast kărdi lo sastevesto sar i o kolaver.
14Le Fariseia ankăste avri, thai dine pe duma sar te mudarăn le Isusos.#Cap. 27.1. Marko 3.6. Luka 6.11. Ioan 5.18; 10.39; 11.53.
O Isus o robo le Raiehko.
15Ta o Isus, sar iekh kai jeanelas e buti kadea, teleardea oçal. Pala Leste telearde but noroade. O sasteardea sa le nasfalen,#Cap. 10.23; 19.2. Marko 3.7.
16thai phendea lengă anda sea pehkodii te na kărăn Les prinjeando;#Cap. 9.30.
17kaste pherdeol so sas phendino anda o prooroko o Isaia, kai phenel:
18„Dikta o Robo Muŕo, kai alosardem Les, o But kamblino Muŕo, ande sao o sufleto Muŕo arakhăl o čeailimos. O Duxo Muŕo thoaua Les pa Leste, thai o vestila le Neamurengă e kris.#Cap. 3.17; 17.5. Is. 42.1.
19O či lela pe te xal pe, či va çîpila.Thai khonikh či ašunela Lehko mui pel uliçî.
20Či phagăla khă papura phadi, čina či mudarăla khă fitilo kai thuwearăl, ji kana kărăla te avel e kris.
21Thai le Neamuri pateana ando Anau Lehko.”
O bengailo muto thai koŕo. E bezex andoa Sfînto Duxo.
22Atunčeara andine Lehkă khă bengailo koŕo thai muto; thai o Isus sasteardea les, kadea kă o muto delas duma thai dikhălas.#Cap. 9.32. Marko 3.11. Luka 11.14.
23Sa le noroade, mirime, phenenas: „Na varesar kadoa sî o Šeau le Davidohko?”
24Kana ašundine le Fariseia e buti kadea, phendine: „O manuši koadoa ankalavel le beng dăsar le Beelzebulosa, o rai le bengăngo!”#Cap. 9.34. Marko 3.22. Luka 11.15.
25O Isus, kai prinjeanelas lendi godi, phendea lengă: „Orsavo thagarimos pharado ande leste, sî pustiime; thai orsavi četatea or khăr, pharado maškar leste, našti jeal angle.#Cap. 9.4. Ioan 2.25. Sîk. 2.23.
26Kana o Beng ankalavel avri le Bengăs, sî pharadimos; deči, sar dašti jeal angle lehko thagarimos?
27Thai kana Me ankalavau avri le beng le Beelzebulosa, le šeaven tumarăn sosa ankalavau le? Anda kodea on avena tumară krisînitorea.
28Ta kana Me ankalavau le bengăn le Duxosa le Devllehkărăsa, atunčeara o Thagarimos le Devllehko avilo pa tumende.#Dan. 2.44; 7.14. Luka 1.33; 11.20; 17.20, 21.
29Or, sar dašti šolpe varekon ando khăr kolehko le zuralehko, thai te čiorăl anda lehkă butea, kana či phanglea mai anglal koles le zurales? Atunčeara dašti čiorăla anda lehko khăr.#Is. 49.24. Luka 11.21-23.
30Kon nai Mança, nai anda Mande, thai kon či tidel Mança, xasarăl.
31Anda kodea phenau tumengă: Or savi bezex thai akušlimos avela iertime le manušengă; ta o prasaimos le Sfintone Duxohko či avela lengă ierto.#Marko 3.28. Luka 12.20. Evr. 6.4, etc; 10.26, 29. 1Ioan 5.16. Kărd. 7.51.
32Orkon dela duma le Šeavehkă le manušehkă, avela ierto; ta orkon dela duma dănasul anda o Sfinto Duxo, či avela ierto či ando veako kadoa, či ando kukoa kai avela.#Cap. 11.19; 13.55. Ioan 7.12, 52. 1Tim. 1.13.
33Or kărăn o kašt lašo thai lehko rodo lašo, or kărăn o kašt bilašo thai lehko rodo bilašo: kă o kašt prinjeanel pe pala o rodo lehko.#Cap. 7.17. Luka 6.43, 44.
34Pui sapengă, sar daština tume te phenen butea laše, kana tume san jungale? Kă andoa pherdimos le illehko del duma o mui.#Cap. 3.7; 23.33. Luka 6.45.
35O manuši o lašo ankalavel butea laše anda o mandimos o lašo pehkă illehko; ta o manuši o jungalo ankalavel butea jungale andoa mandimos o jungalo pehkă illehko.
36Phenau tumengă, kă ando des la krisako, le manuši dena dindimos anda orsao divano bikandimahko, kai mothodine les.
37Kă anda te divanuri avesa ankalado bi došako, thai anda le divanuri tiră avesa došalo.”
E minunea le proorokosa le Ioanosa.
38Atunčeara varekon anda le zakonarea thai anda le Farisea line o divano, thai phende Lehkă: „Sîkaitorona, kamas te dikhas khă sămno Tutar!”#Cap. 16.1. Marko 8.11. Luka 11.16, 29. Ioan 2.18. 1Kor. 1.22.
39Čeačio phendimos, O phendea lengă: „Khă neamo čiorikano thai butkurvari mangăl khă sămno; ta či dela pe lehkă aver sămno, sar o sămno le proorokohko le Ioanohko.#Cap. 16.4. Is. 57.3. Marko 8.38. Ioan 4.48.
40Kă, pala sar o Iona bešlo trin des thai trin reatea andel prašave le mašehkă, sa kadea i o Šeau le manušehko bešela trin des thai trin reatea ando illo la phuweako.#Ioan 1.17.
41Le rom anda le Ninive uštena paša o neamo kadoa, ando des la krisako, thai došarăna les, anda kă on kăisaile koa ašundimos le Ioanahko; thai dikta kă koče sî Iekh mai baro sar o Iona#Ier. 3.11. Ezec. 16.51, 52. Luka 11.32. Iona 3.5. Rom. 2.27.
42E Thagar katar perălodes uštela paša o neamo kadoa, ando des la krisako, thai došarăla les, anda kă oi avili kata o gor la phuweako, kaste ašunel o xaraimos le Solomonohko; thai dikta kă koče sî Iekh mai baro sar o Solomono.#1Thag. 10.1. 2Kron. 9.1. Luka 11.31.
43O duxo o biujo, kana ankăsto anda khă manuši, phirăl anda le thana bipaiehkă, rodindoi xodinimos, thai či arakhăles.#Iov 1.7. Luka 11.24. 1Pet. 5.8.
44Atunčeara phenel: „Amboldau ma ande muŕo khăr, katar ankăstem. Thai, kana avel ande leste, arakhăl les nango, šilado thai xureado.
45Atunčeara jeal thai lel pesa aver efta duxuri mai jungale sar leste: šon pe ando khăr, bešen oče, thai e firea le manušesti kodolesti arăsăl mai jungali dă sar sas anglal. Orta kadea avela i kadale neamostar čiorikano.”#Evr. 6.4; 10.26. 2Pet. 2.20-22.
E dei thai le phral le Isusohkă.
46Ta sa kana delas duma o Isus le noroadengă, dikta kă lesti dei thai lehkă phral bešenas avri thai rodenas te den duma Lesa.#Marko 3.31. Luka 8.19-21.
47Atunčeara varekon phendea Lehkă: „Dikta, Ti dei thai Te phral bešen avri, thai roden te den duma Tusa.”#Cap. 13.55. Marko 6.3. Ioan 2.12; 7.3, 5. Kărd. 1.14. 1Kor. 9.5. Gal. 1.19.
48Ta o Isus dea anglal kolehkă kai andesas Lehkă o divano kadoa: „Kon sî Mîŕî dei, thai kon sî Miŕă phral?”
49Pala kodea tinzosardea Pehko vast karing Pehkă jene, thai phendea: „Dikta Mîŕî dei thai Mîŕă phral!
50Kă or kon kărăl o kamblimos Mîŕă Daddehko kai sî ando čeri, kodoa sî Mangă phral, phei thai dei.”#Ioan 15.14. Gal. 5.5; 6.15. Kol. 3.11. Evr. 2.11.
Currently Selected:
Matei 12: KALD2020
Highlight
Share
Copy
Want to have your highlights saved across all your devices? Sign up or sign in
Bible translated into Kalderash Romani by Luminita Cioaba 2020, from the Cornilescu version of the Romanian Bible. Rights are held by the British and Foreign Bible Society and the Interconfessional Bible Society of Romania.
