Rute 1
1
Theruy Moab ka Kana Tnsapah Elimelek
1Pkelu ba dmpsgao ka qmlahang qnlhangan ciida, smterung krayan ka qnlangan daha. Niqan 1 seediq, ga meniq Betlexem dxeral Yehudah. Madis qedil ma 2 laqi na mquri dxeral Moab tnooda meniq hiya. 2Elimelek ka ngayan seediq nii. Ngayan qedil na we Naomiy. 2 ka laqi na rseno, Maxlon ka ngayan 1 ma, Kilyon ka ngayan na 1. Seediq Eprat alang Betlexem Yehudah kana daha. Dehuk dxeral Moab ma meniq hiya ka dheya. 3Bobo na de, wada mhuqil ka Elimelek seno Naomiy. Mtngari heya ma 2 laqi na rseno. 4Mnangal qedil weewa Moab ka 2 laqi rseno. 1 we Orpah ka ngayan na, 1 we Rute ka ngayan na. Wada so 10 knkawas nniqan daha hiya. 5Wada mhuqil uri ka Maxlon ma Kilyon di. Wano ba Naomiy nanak ka mtrangi. Uka seno ma uka ka lqlaqi na uri.
Mpbrinah Betlexem ka Naomiy ma Rute
6Mtutuy ma peeyah Moab mpbrinah ka Naomiy ma 2 ina na. Ado meniq Moab we, mnbahang Utux Tmninun ge, smbleyaq seediq na ma mege uqun dheya. 7Kiya de msuupu mlatac peeyah nniqan daha mosa elu quri Yehudah ka heya ma 2 ina na. 8Rmengo 2 ina na ka Naomiy: “Osa sapah bubu namu nanak da! Tai so smbleyaq yamu ka Utux Tmninun, mntena so snbleqan namu seediq wada ma yaku. 9Tai so mpniqan oosa txtaxa namu tbleyaq meniq bgurah seno ka Utux Tmninun!” Kiya de tmunguh dheya ka Naomiy ma asi lingis paru riyung ka dheya. 10Rmengo heya: “Uxe! Maha miyan mptqene mosa seediq su hiya.” 11Rmengo ka Naomiy: “Laqi mu mqedil! Osa da! Maanu ka ssnegul namu kenan ho? Mmaha ku tmlaqi laqi mprseno namu dungal peni? 12Laqi mu mqedil! Osa da! Rudan ku ka yaku di, uxe ku mpniqan seno. Ani ku kesun niqan brihan na ma, niqan seno mu keeman saya we, asi ka tmlaqi. 13Mptara namu betaq paru ka dheya peni? Uxe namu maha seno di peni? Laqi mu mqedil! Iya so kiya. Mgkala pnqraqil namu ka yaku. Ado gisu cmebu kenan ka baga na Utux Tmninun.” 14Asi lingis paru dungal ka 2 ina na. Tmunguh smwaye pai na ka Orpah. Kiya de ini alix smnegul Naomiy ka Rute.
15Rmengo ka Naomiy: “Qtai! Ata su we wada brinah seediq na ma utux na hiya da. Theyaq ata su brinah ka isu uri da!” 16Rmengo ka Rute:
“Iya ku ptkyexi malix sunan,
brinah ini snegul sunan.
Mquri su inu we,
mpquri ku hiya uri.
Meniq su inu we,
meeniq ku hiya uri.
Seediq mu ka seediq su.
Utux Baro mu ka Utux Baro su.
17Mhuqil su inu we,
mphuqil ku hiya ma, reesun ku hiya uri.
Wano ba hhuqil ka dehuk ptaalix isu ma yaku.
Nasi ku ini nduwa de, tai so paru pnshugan na kenan ka Utux Tmninun!”
18Naomiy we qmita so nii knkrayan lnglungan mpsnegul ka Rute de, ini na rngagi ani manu da.
19Kiya de tqene mosa ma betaq Betlexem. Dehuk Betlexem ka dheya. Ririh dheya gisu pprudu ka kana alang. Rmengo ka dmqedil: “Bale ba Naomiy ka nii ho?” 20Rmengo dheya ka Naomiy:
“Iya ku kesi Naomiy mlawa,
Mara kesi ku hiya mlawa.
Ado wada pqraqil kenan ka Utux Baro Mdoi Kana Beyax han.
21Mttuku riyung mlatac ku ma,
Utux Tmninun ka pkuuka ani maanu meeyah ku.
Utux Tmninun ka pqraqil kenan,
mege pnqraqil kenan ka Utux Baro Mdoi Kana Beyax.
Ma namu hiya mlawa Naomiy nana ha?”
22Brinah peeyah Moab ka Naomiy. Rute mqedil Moab ina na ka mtheyaq heya. Mndungus prading qbrungan mugi paru ciida ka nyahan daha Betlexem ciida.
Currently Selected:
Rute 1: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020