Dmpsgao 21
21
Migin Mpmuqedil Seediq Binyamin
1Mnoda psdehu Micpah hiya ka seediq Israel: “Iya ta ba pqdingi weewa ta ka Binyamin.” 2Seediq Israel we mosa Beytel tleung berah Utux Baro ma lmingis paru betaq gbiyan. 3Rmengo: “Utux Tmninun, Utux Baro Israel! Hmuwa, ma moda so nii ka ckceka Israel saya, maha uka 1 pnswayan rudan ka Israel di peni?” 4So kusun mgrebu bale mtutuy ka seediq. Smalu 1 spuhan ma mege snapuh psqmaan ma snapuh ptbale. 5Rmengo ka seediq Israel: “Txtaxa pnswayan rudan Israel we, ima ka ini theyaq ita mosa Utux Tmninun hiya ho?” Ado mnoda pseesu ba psdehu ka seediq Israel ma rmnengo: “Kana ini osa Micpah Utux Tmninun hiya we asi ka phqilun.” 6Gmaalu Binyamin mtswai daha ka seediq Israel de, rmengo: “Maha msetuq 1 pnswayan rudan ckceka ta Israel da. 7Wada ta psdehu quri Utux Tmninun ka ita de, asi ta ka ini pstrengi seediq Binyamin ka weewa ta. Huwa ta kesun saya, ya maha niqan mqedil ka seediq mntngari daha?”
8Rmengo dungal ka dheya: “Ckceka pnswayan rudan Israel we, ima ka ini osa Micpah Utux Tmninun hiya ho?” Qtai! Gilad ma Yabes we, uka ani 1 heyi mremux kobu daha betaq seediq ta hiya. 9Smepu kana seediq ciida. Qtai! Uka ani 1 seediq ka Gilad ma Yabes. 10Kiya de smkagul 1 mang 20'00 mkkere heyi ma, rmengo dheya: “Adis hlmadac ka yamu ma sai phuqil ka seediq, mqedil ma, lqlaqi Gilad ma Yabes. 11Asi namu ka daun ka nii. Asi namu ka phqilun ka kana rseno ma mqedil mntheyaq taqi rseno.” 12Dheya nii we gimi daha ka 4'00 weewa uxe tnheyaq rseno peeyah ckceka seediq Gilad ma Yabes. Kiya de desun daha Siylo dxeral Kenaan hiya ka dheya.
13Kana seediq we smkagul seediq mosa psbleyaq lhengo Rimon seediq Binyamin hiya. 14Ciida, meeyah ka seediq Binyamin. Kiya de dweewa mnuudus pneeyah Gilad ma Yabes we pstrengun na dheya. Kiya de we ida ini ptuku na. 15Gmaalu seediq Binyamin ka seediq Israel. Ado Utux Tmninun we, wada na ngalun 1 pnswayan rudan ka ckceka Israel.
16Rmengo ka rdrudan kana seediq: “Wada ta phqilun kana ka weewa seediq Binyamin de, huwa ta kesun psterung mqedil ka dseediq mtngari nii ho?” 17Rmengo dungal ka dheya: “Dseediq Binyamin qnduriq we, asi ka niqan dxeral daha. Kiya ka uxe pkngalun peeyah ckceka Israel ka 1 pnswayan rudan. 18Kiya de, asi ta ka ini pstrengi dheya ka weewa ta nanak.” Ado mnoda psdehu ka seediq Israel: “Ima ka mege weewa seediq Binyamin we, maha mangal snyusan.” 19Rmengo dungal ka dheya: “Qtai! Smseman Utux Tmninun mpexal knkingal knkawas we, gisu prading meniq Siylo hiya.” Gaga meniq tgtruma Lebonah ka Siylo. Tgbaro Beytel, gaga nklaan hido peeyah Beytel mosa Sekem. 20Rmengo seediq Binyamin ka dheya: “Osa ka yamu ma, tgleing qnpahan lipas. 21Sai rmaka qmita! Qtai! Nasi meyah kmeeki ka weewa Siylo de, asi peeyah qnpahan lipas ma, txtaxa namu we qerac 1 ka so mpmuqedil namu. Kiya de adis dxeral Binyamin. 22Nasi meyah mseang menan ka tama ma mtswai daha de, mprengo miyan dheya ka yami: ‘Qtai dqeras miyan glaani ka seediq nii! Ado mccebu miyan ciida we, ini nami rngii weewa mpqedil daha. Quri nii we uxe bnege namu ka nii. Nasi bnege namu de, maha niqan qnquwan noda kiya da.’” 23Kiya de wada moda so nii ka seediq Binyamin. Spooda kneegu seediq daha mosa gmeeluk weewa gaga kmeeki ma ngalun daha mqedil. Desun daha dxeral daha nanak ma psbgurah smalu alang ma meniq ckceka hiya. 24Ciida, seediq Israel we mlatac peeyay hiya, mbrinah pnswayan rudan ma tnsapah daha nanak. Pneeyah inu ka dheya de, txtaxa daha de mbrinah dxeral daha nanak da.
25Ciida, uka qbsuran paru ka Israel. Txtaxa daha we spooda daha lnglungan malu ma naqah daha moda ka dheya.
Currently Selected:
Dmpsgao 21: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
