Rute 2
2
Smterung Boaj Meniq Qnpahan ka Rute
1Naomiy we niqan 1 lutuc na, kiya ka Elimelek lutuc mtswai seno na. Boaj ka ngayan na, heya we mbleyaq egu ba dnoi na. 2Rmengo Naomiy ka Rute weewa Moab: “Posa ku plamu drami mugi snrhuqan daha qnpahan. Ima ka smbleyaq kenan de, kiya ka meeniq ku bukuy na.” Rmengo ka Naomiy: “Weewa mu! Osa wa.” 3Kiya de wada ka Rute. Dehuk qnpahan ka heya ma, smnegul bukuy dmqburung ma lmamu drami mugi snrhuqan daha. Pkelu ba meyah qnpahan Boaj dseediq Elimelek ka heya. 4Qtai! Gisu peeyah Betlexem meyah ka Boaj. Rmengo dseediq qmburung: “Tai so maha theyaq yamu ka Utux Tmninun!” Cmiyuk heya ka dheya: “Tai so maha smbleyaq sunan ka Utux Tmninun!” 5Rmengo tnqliyan na mdudul hiya ka Boaj: “Weewa ima ka gaga ho?” 6Cmiyuk rmengo ka mdudul qmeepah: “Weewa Moab ka heya, kiya ka smnegul Naomiy pneyah Moab. 7Rmnengo ka heya: ‘Srwai ku psnegul bukuy dmqburung ma, plmui ku snrhuqan drami mugi.’ Kiya ka meyah ka heya. Peeyah mgrebu betaq saya gaga nak meniq hiya, wano ba tnnais tleung tikuh truma sapah.”
8Rmengo Rute ka Boaj: “Weewa! Qbahang kenan. Iya osa lmamu mugi qnpahan taxa seediq ma, iya latac peeyah hini. Asi tqene smnegul tnqliyan mu da. 9Qtai bale gaga mosa qmburung qnpahan inu ka tnqliyan mu we, asi snegul tnqliyan mu ka isu. Wada mu rngagan iya llheelih sunan ka tnqliyan mu. Mhqeni su de, osa nanak mimah qsiya napa tnqliyan gaga liwas hiya.” 10Kiya de tgtemaq dxeral tmbqelic thmuku heya ka Rute ma, rmengo heya: “Mqedil ku pneeyah icil qnlhangan ka yaku, hmuwa su smbleyaq kenan ho?” 11Rmengo heya ka Boaj: “Bobo wada mhuqil ka seno su. Kana ndaan su quri pai su, uxe uri we mlatac su tama ma bubu su ma, dxeral pnttingan su. Betaq su meyah dseediq uxe su nklaan. So kana noda nii we rmnengo kenan ka seediq da. 12Tai so mpuyu qneepah su cmiyuk sunan ka Utux Tmninun. Tai so maha egu ba nangal su cniyuk na, meyah su smtama Utux Tmninun, Utux Baro nuIsrael.” 13Rmengo ka Rute: “Pusu tnsapah mu! Tai so niqan smbleqan su kenan meniq berah su. Ani ku ini pnlengu tnqliyan su we, knduwa su smbeyax kenan ma, rmengo su malu kari tnqliyan su.”
14Dehuk ka uuqan ido, rmengo Rute ka Boaj: “Eyah mekan pang hini. Rcuhi tgbasi nii ka pang su.” Kiya de tleung ssiyo dmqburung ka heya. Boaj we, mangal nuduh mugi ma sbege na Rute. Mtengi ka heya de, niqan ka msngari dungal. 15Mtutuy ka heya ma mosa lmamu snrhuqan drami mugi dungal. Kiya de rmengo tnqliyan na ka Boaj: “Gisu lmamu ckceka gntuwan hiya ka heya we iya psqai. 16Asi namu ka hgluqun ptuting peeyah ckceka bnkegan mugi ka duma drami ma plmui heya, iya kseengi ka heya.”
17So kiya de, Rute we gisu lmamu qnpahan hiya betaq keeman ka Rute. Psliun na ka mugi lnamu na we, ya ba 1 igipa ka mugi paru. 18Rute we desun na alang saun na pqita pai ka lnamu na. Kiya we ngalun na ka mnsngari pnuqan ma sbege na pai na. 19Smiling heya ka pai na: “Ali saya we nsaan su lmamu inu ka mugi nii? Qmneepah su inu ho? Tai so mangal nbleqan ka snbleyaq sunan.” Rmengo pai na qmneepah inu ka Rute: “Ali saya we, qmneepah ku ngayan na we kesun Boaj hiya.” 20Rmengo ina na ka Naomiy: “Tai so mangal snbleqan Utux Tmninun ka seediq kiya. Ado ini setuq gmaalu seediq muudus ma mnhuqil ka heya.” Rmengo heya dungal ka Naomiy: “Lutuc ta ka seediq kiya, kiya ka lutuc bale dehuk pririh mangal pusu dnoi ta.” 21Rmengo ka Rute weewa Moab: “Kesun ku na rmengo ka heya: ‘Isu we tqene smnegul tnqliyan mu lmamu mugi betaq mhedu qmburung kana ka dheya.’” 22Rmengo Rute ina na ka Naomiy: “Laqi mu mqedil! Osa tqene smnegul tnqliyan na ka isu. So su uxe daha trqilun seediq icil meniq qnpahan hiya.” 23Kiya de Rute we tqene smnegul mqedil tnqliyan Boaj lmamu mugi betaq wada qhdeun qmburung kana ka mugi paru ma biciq. Rute we gaga nak mtheyaq pai na hiya.
Currently Selected:
Rute 2: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020