Roma 9
9
Gnao Seediq Israel ka Utux Baro
1Yaku we rmengo ku bale ba kari meeniq ckceka Kiristo, uxe ku mprengo kari mberiq. Mooda Bgihur Utux pgkela kenan ka lhebun mu. 2Naqah bale kuxul mu ma mnarux bale ka lhebun mu. 3Ado mtswai mu lutuc bale ge wada ku daha syusan ma ani ku mswaye peeyah Kiristo de ida ku mpsruwa. 4Dheya we seediq Israel ma ngalan laqi, knledax, sbege gaya, gaya tthmuku ma sntangan we bege dheya kana. 5Drudan cbeyo we kika rudan daha, spquri ta heyi we pneyah klegan daha ka Kiristo uri. Tai so tndhuun betaq ani knuwan ka Utux Baro ga meeniq bobo kana ani maanu. Ameng!
6So nii we uxe ka ini pkheyi ka kari Utux Baro. Ado pneyah Israel we uxe seediq Israel kana. 7Pneyah Abraham ka seediq we uxe lqlaqi mslutuc na kana. Wano “mtuting peeyah Yijxaq kika kesun lqlaqi mslutuc su.” 8So kari nii we pneyah heyi mntuting ka laqi we uxe laqi Utux Baro. Wano mnoda sntangan ka laqi we kika ngalan lqlaqi mslutuc Utux Baro. 9Ado kari sntangan we so nii: “Kawas so saya meeyah ku dungal ma mdoi laqi rseno ka Sarah.” 10Uxe wano kiya. Ida so kiya ka Ribqah uri. Heya we mnoda Yijxaq rudan ta cbeyo mchedil. 11Ani ini ptuting ka tnrurul laqi na ma ani ini qeepah malu ma naqah nana we so pttuku bale lnglungan Utux Baro gmao na seediq, 12uxe pnooda ndaan seediq. Pnooda na Utux Baro gnao na seediq. Rmnengo Ribqah ka Utux Baro: “Bobo na tgqbsuran na we maha mpqeepah quri mtswai na.” 13Mntena so ga spatis Patis: “Yakobu ka sgaalu mu. Esaw we uxe mu kuxul.”
14Nasi so kiya de, maanu ka rrengo ta ho? Niqan qnquwan na ka Utux Baro ho? Ida uxe so kiya! 15Ado rngagan na ka Moseh:
“Ima ka sgalu mu we kiya ka sgalu mu,
ima ka bege mu huwe we kiya ka bege mu huwe.”
16So kiya de nii we uxe pnooda lnglungan seediq ma uxe pnooda beyax seediq uri. Wano pneyah gnhuwe Utux Baro nanak. 17Ado rmengo Paroh ka Utux Baro ckceka Patis: “Pttuyun misu ka isu we pptuura mu sunan ka beyax mu ma so maha mggarang kana bobo dxeral ka ngayan mu.” 18Maanu so kiya de Utux Baro we gnhuwe na ka seediq we khwayun na, kmptkrayun na ka lhebun seediq we ptkrayun na.
Seang Utux Baro ma Gnhuwe Na
19So kiya de mprengo su kenan: “Hmuwa, ma ida smeriq seediq ka heya ho? Ima ka mtduwa hmetur lnglungan na ho?” 20Ah! Isu nii! Ima su ka isu, tduwa su cmiyuk quwaq Utux Baro ho? So ka snmalu we tduwa rmengo smnalu heya: “Hmuwa, ma su mchaya smalu kenan ho?” 21Uka beyax na maangal 1 dxeral smleun na malu bale smlean ma maangal 1 dungal smleun nnaqah smlean ka mpsmalu na we ini tduwa ho? 22Nasi kmptuura seang na ka Utux Baro ma kmpgkeela beyax na ka heya we ini tduwa kmremun bale kika kkseengan ma psrmalan na pkuuka ka smlean peni? 23So kiya de ppgkeela na ka msngari knledax na meeniq ckceka khwayun na ma pnuglaan na psramal mpteme knledax ppsaan. 24Ppsaan na nii we kika ita pnlawa Utux Baro, kiya de uxe wano pneyah ckceka seediq Yudaya, peeyah ckceka seediq icil qnlhangan uri. 25Mntena so kari rnengo Utux Baro ga spatis patis Hosea:
“Nuuxe seediq mu we,
‘seediq mu’ kesun mu.
Nuuxe mu gnaalu we,
‘gnaalu mu’ kesun mu.
26Kiya de rnngagan mu meeniq ku ani inu ka dheya:
Uxe namu seediq mu,
kiya ka meeniq hiya mprengo dheya: ‘Laqi Utux Baro muudus ani knuwan ka yamu’”.
27Mdiras mlawa seediq Israel ka Isaya: “Ani mntena bnaquy rcilung knhbragan na ka laqi Israel we wano mnsngari ka pkdusun.” 28Ado Bukung we pndwaun na mooda bobo dxeral ka kari na ma pqhdeun na ma asi na kesi hiya. 29So mntena kari Isaya dungal:
“Nasi uxe Bukung Mdoi Kana Supi ka psngari laqi we
naka ta mntena Sedom ma Amorah da.”
Israel ma Malu Kari
30So kiya de maanu rrengo ta ho? Uxe mnugiing msderux ooda ka seediq icil qnlhangan we wada maangal msderux ooda. Msderux ooda nii we mnoda snhiyan. 31Kiya de ani mgiing msderux ooda ckceka gaya ka seediq Israel we ini daha dheki ka msderux ooda gaya. 32Hmuwa ka so nii ho? Ado ini ooda snhiyan ma mnoda malu qneepah. Dheya we wada skripuc btunux skrbutan. 33Mntena so ga spatis Patis:
“Nii mu psaun Sion ka btunux skrbutan ma tasil ktkuran.
Kiya de snhii heya we uxe mpqsiqa.”
Currently Selected:
Roma 9: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
