Roma 8

Kndesan Ckceka Bgihur Utux

1Maanu so saya de, so ka ga meeniq ckceka Kiristo Yesu ka seediq we ini ngali niqan qnquwan noda di. 2Ado mbege knuudus ka elu Bgihur Utux. Meeniq ckceka Kiristo Yesu we wada su na lhlahan peeyah elu qnquwan noda ma phuqil. 3Gaya we uka beyax na meeniq knuuwic heyi seediq. So kiya de smkagul laqi na nanak wada mhnyegan mntena qnquwan noda. Speeyah na we ssapuh qnquwan noda. Wada na ngalan niqan qnquwan noda ka heyi da. 4Spquri na uka qnquwan noda ka gaya ma ppqhdeun na quri ita ini puyu heyi ma mquri Bgihur Utux mooda ka dheyi seediq. 5Ado mquri heyi we quri heyi ka lhebun daha. Mquri Bgihur Utux we quri Bgihur Utux ka lhebun daha. 6Mquri heyi ka lhebun we mhuqil. Mquri Bgihur Utux ka lhebun we muudus ma mtbale lhebun. 7Ado mquri heyi ka lhebun we kmpais Utux Baro. Ini thei gaya Utux Baro ma ida ini tduwa thei uri. 8Kiya de mquri heyi ka seediq we ini tduwa pqaras Utux Baro.

9Nasi ga meeniq ckceka namu ka Bgihur Utux Baro de uxe namu mquri heyi ma mquri namu Bgihur Utux. Nasi uka Bgihur Kiristo ka seediq we ida uxe nKiristo. 10Nasi meeniq ckceka yamu ka Kiristo, ado qnquwan noda de mphuqil ka heyi namu, ado uka qnquwan noda mpkuudus ka Bgihur Utux. 11Ani so kiya, nasi ga meeniq ckceka namu ka Bgihur Utux Baro pnkuudus Yesu peeyah hnqilan ge, wada pkuudus Yesu Kiristo peeyah hnqilan we mooda Bgihur ga meeniq ckceka namu pkdusun na ka heyi namu mphuqil uri.

12Mtswai, maanu so kiya de uka kusa ta quri heyi ma mquri ta heyi muudus. 13Nasi namu mquri heyi muudus we mphuqil namu. Nasi namu mooda Bgihur Utux phuqil qpahun heyi namu de mpkuudus namu. 14Ado kana ga ddudul Bgihur Utux Baro we kika laqi Utux Baro. 15Wada namu ngalun we uxe Bgihur tnqliyan yamu kkiicu namu dungal. Wada namu ngalun ka Bgihur ngayan laqi. So kiya de tduwa ta mlawa: “Aba! Tama!” 16Bgihur Utux ma utux ta we msuupu pgkela ita we laqi ta Utux Baro. 17Nasi tana laqi de kika lqlaqi na ma lqlaqi Utux Baro mpsuupu ta Kiristo mlqlaqi na. Nasi ta msuupu Kiristo mooda mpqraqil we kika msuupu ta heya ka ita ma maangal ledax.

Knledax Mmeyah

18Lnglungan mu we mqraqil ta saya we nasi ta pntnaun knledax mptuura na ita beyo de knbiciq kiya. 19Kana snmalu we psmeyah bale ptuura lqlaqi Utux Baro. 20Ado snmalu we wada pthyiun quri ggqeya. So nii we uxe pneyah lnglungan na nanak. Nii we lnglungan pntheyi heya. Ani so kiya de wada na pniqan sntangan. 21Ado ani snmalu uri we rraguh peeyah msburo maangal tnqliyan heya ma maha mtraguh meeniq knledax mntena lqlaqi Utux Baro. 22Klaun mu, kana snmalu we msuupu smdaring ma msuupu hlidun mqraqil betaq saya. 23Uxe wano kiya. Ita ka nii ta niqan pnugheyi pnlaale Bgihur Utux we ga smdaring ka lhebun ta nanak uri ma tmara ta ngayan laqi. Kiya de pkuudus heyi ta. 24Ado pnkuudus tana peeyah sntangan. Kiya de nasi taan doriq ka sntangan de uxe kesun sntangan kiya di. Ima ka msatang sntangan qntaan na ho? 25Kiya de nasi ini qtai ka stangan ta we asi ta ka knrmenun psmeyah.

26Mntena so nii uri dmayo knuuwic ta ka Bgihur Utux. Ini ta klai hmuwa ta mesa dmurun. Kiya de Bgihur Utux we mooda sndaring na uka klaan rmirih ita dmurun. 27Kiya de kmuuro lhebun seediq we mkela lnglungan Bgihur Utux. Ado Bgihur Utux spooda na lnglungan Utux Baro rmirih tnugsaan dmurun. 28Ida ta klaun. Quri kana ani maanu we niqan ririh na kana, so maha niqan brihan na ka seediq gmaalu Utux Baro. Kiya ka dseediq pnlawa mnoda lnglungan na. 29Ado pnuglaan na mkela ka seediq we kika pnuglaan na smeung ppntnaun na hnyegan laqi na. So kiya de ppqbsranun na ckceka hbaro mtswai ka laqi na. 30Seediq pnuglaan na we kika pnlawa na uri. Pnlawa na we kika wada na ngalan uka qnquwan noda. Wada na ngalan uka qnquwan noda we kika wada na biqan knledax.

Uka Hteran ka Gnaalu

31So kiya de maanu ka rrengo ta quri so nii da ho? Nasi dmayo ita ka Utux Baro we ima ka mpdehuk hmetur ita ho? 32Utux Baro ge, laqi na we ini na krwahi. Ado ita wada na sbege. So kiya de uxe spuun na heya uri ka kana ani maanu smlean sbege na ita peni? 33Ima ka mtduwa mege qnquwan seediq gneegan Utux Baro ho? Niqan Utux Baro maangal uka qnquwan noda dheya da. 34Ima ka mbege niqan qnquwan noda dheya ho? Wada mhuqil ka Kiristo Yesu duma wada pkdusun peeyah hnqilan da. Saya we gisu tleung narac Utux Baro ma ga rmirih ita dmurun ka heya uri. 35Ima ka tduwa hmetur gnaalu Kiristo peeyah ita ho? Mqraqil ho? Naqah kuxul ho? Tnraqil daha ho? Knuure ho? Mbberas ho? So smiicu ho? Hlmadac ho? 36Mntena so nii ka ga spatis Patis:

“Ririh isu ka sphuqil daha menan klaali,

ngalan miyan daha so miric gdraun.”

37Maanu so kiya we smtama ta Bukung wada gmaalu ita, wada ta rmabang mbeyax ka kana ani maanu nii. 38Ado snhiyun mu bale, ani hhuqil, muudus, dsnkgulan baro, mdoi beyax qmlahang, dmoi paru beyax, ooda saya, ooda nexal, 39ga baro, ga rebuq truma ma duma snmalu, kana nii we ini tduwa hmetur gnaalu Utux Baro peeyah ita. Gnaalu nii we ga meeniq ckceka Kiristo Yesu Bukung ta.

Currently Selected:

Roma 8: Stgdaya

Highlight

Copy