Roma 7

Beyax Pndakar Gaya

1Mtswai, yamu mkela gaya ka rrngagun mu. Gaya we qmlahang seediq wano meeniq muudus han we ini namu klai ho? 2Mntena so nii ka mqedil niqan rseno. Muudus ka rseno nana na we ga sbekuy gaya quri rseno na. Nasi mhuqil ka rseno na de wada tlghelah peeyah gaya quri rseno na. 3Maanu so kiya de muudus ka rseno nana ciida ma mosa 1 rseno dungal we kika kesun mmhemuc msuupu. Nasi wada mhuqil ka rseno na de wada mtlhelah peeyah gaya nii ma mosa 1 rseno dungal we uxe kesun mmhemuc msuupu.

4Mtswai mu, so kiya de yamu we mnoda namu heyi Kiristo wada namu mhuqil quri gaya maha namu ntaxa. Kiya ka pnkuudus peeyah hnqilan. So kiya de qqeepah ta bbege ta Utux Baro. 5Muudus ta quri heyi ciida han ge, pneyah gaya kkraguh qnquwan we qmeepah ckceka cida heyi ta ma ppgheyi quri hhuqil. 6Kiya de saya we ado wada ta mhuqil quri gaya mnekuy ita ma wada ta mtlhelah quri gaya. So kiya de mooda ta bgurah kndesan peeyah Bgihur Utux qmeepah ta quri Kiristo ma ini ta ooda cmucac spatis gaya qmeepah.

Pnluban Gaya ma Qnquwan Noda

7So kiya de maanu ka rrengo ta ho? Qnquwan noda ka gaya ho? Ida uxe so kiya! Kiya de nasi uxe pnooda gaya we kani mu klai ka qnquwan noda. Nasi ini kesa “Iya sqquru lmngelung” ka gaya we kani mu klai ka kesun lhebun sqquru. 8Kiya de qnquwan noda we mnoda gaya ma yahan na brebur qmeepah ka lhebun mu ma ppeyah lmlamu lhebun sqquru. Ado nasi uka gaya we na mhuqil ka qnquwan noda. 9Yaku we uka gaya han we muudus ku han. Meyah ka gaya de muudus ka qnquwan noda, 10mhuqil ku ka yaku da. Bale ba ppkuudus seediq ka gaya we kela su ha phuqil kenan. 11Ado qnquwan noda we mnoda gaya meyah mberiq kenan ma mnoda gaya phuqil kenan. 12Maanu so kiya de mrtaso ba ka gaya ma mrtaso, uka qnquwan ma malu ka gaya pndakar. 13So kiya we malu ka gaga phuqil kenan ho? Ida uxe so kiya! Mnoda malu phuqil kenan ka qnquwan noda. Kiya de qnquwan noda we spooda na gaya pndakar ptuura bale ba qnquwan noda di.

Mkeekan ka Utux ma Heyi

14NBgihur Utux ka gaya we ida ta klaun. Kiya de yaku we nheyi seediq ka yaku we wada ku brigun qnquwan da. 15Nii mu daan qmeepah we ini mu klai. Qnqpahun mu we ini mu dai meepah. Pqnqihun mu sa rnahun mu mooda meepah. 16Nasi mu daan ka ini mu qngqpahi de ririh mu kesun malu ka gaya. 17Bale ba qmneepah so nii we uxe yaku. Qnquwan noda gaga ckceka mu ka qmneepah. 18Klaun mu uri, ga meeniq ckceka mu, kiya ka ga ckceka heyi mu we uka ka malu na. Ado kmqmeepah malu ka lnglungan mu. Kiya de qqeepah de ini puyu kenan. 19Ado qnqpahun mu ka malu we ini mu dai meepah. Ini mu qngqpahi ka naqah sa daan mu. 20Maanu so kiya de nasi ku qmeepah quri ini mu qngqpahi we qmeepah so nii we uxe yaku kiya. Qmeepah so nii we qnquwan noda nii meeniq ckceka mu. 21Klaun mu niqan elu, kiya ka kmqeepah ku malu ciida we niqan ka naqah meyah ptheyaq kenan. 22Ado pneyah seediq ckceka mu we mqaras ku ba gaya Utux Baro. 23Kiya de taan mu meeniq ckceka heyi mu ka taxa elu gaga mkeekan lhebun mu. Wada ku na sbekuy ma muyu ku elu qnquwan noda ka heyi mu. 24Ah! Mqraqil ku bale. Ima ka tduwa pqduriq heyi mphuqil mu nii ho? 25Mqaras ku Utux Baro, mnoda Bukung ta Yesu Kiristo de tduwa! So kiya de yaku we muyu ku gaya Utux Baro ka lhebun mu ma heyi mu ge muyu elu qnquwan noda ka heyi mu.

Currently Selected:

Roma 7: Stgdaya

Highlight

Copy