Roma 6

Mhuqil Qnquwan Noda, Muudus Ceka Kiristo

1So kiya de maanu ka rrengo ta ho? Tduwa ta meeniq ckceka qnquwan noda prana ta huwe ho? 2Uxe ba puso kiya! Wada ta mhuqil quri qnquwan noda we huwa ta kesun muudus ckceka qnquwan noda nana ho? 3Ini namu klai peni? Mnoda ta ptgaya psino mremux ta Kiristo Yesu ka ita ge, kiya ka mnoda ta ptgaya psino mremux ta hnqilan na peni? 4Maanu so kiya de mnoda ta ptgaya psino mremux ta hnqilan na ma, theyaq ta heya reesan. So noda ta we maha psbgurah muudus ka ita uri. Mntena Kiristo mnoda knledax Tama muudus peeyah hnqilan. 5Nasi ta pskingal msuupu heya, mooda ta mntena hnqilan Kiristo ka ita we mooda ta mntena pnkuudus peeyah hnqilan ka ita uri. 6Klaun ta, wada msuupu heya spteetu jyujika ka seediq ta cmucac. Kkuuka beyax heyi qnquwan noda ma uxe ta pptqliyan qnquwan noda dungal. 7Ado wada mhuqil ka seediq we wada mtlhelah peeyah qnquwan noda. 8Nasi ta wada msuupu Kiristo mhuqil de mpsuupu ta heya muudus uri ka snhiyan ta. 9Ado klaun ta wada pkdusan peeyah hnqilan ka Kiristo ma uxe mphuqil dungal ka heya. Qqhuqil we uxe mpbukung heya dungal. 10Mhuqil ka Kiristo we wada texal mhuqil quri qnquwan noda. Muudus ka heya we muudus quri Utux Baro kiya. 11Maanu so kiya, yamu uri mphuqil namu meniq ta ckceka qnquwan noda uri ma, pkdusun ta Utux Baro meniq ta ckceka Kiristo Yesu.

12Maanu so kiya de, so uxe mpbukung heyi namu mphuqil ka qnquwan noda ma, ppuyu namu naqah kkraguh heyi. 13Iya bqani qnquwan noda meepah naqah noda ka heyi namu uri. Pntena so seediq mnuudus peeyah hnqilan ma wada na sbege Utux Baro ka heya na. Sbege Utux Baro meepah uka qnquwan noda ka heyi namu. 14Uxe mpbukung yamu ka qnquwan noda, ado uxe namu ga truma gaya ka yamu, ga namu meniq truma huwe Utux Baro da.

Tnqliyan Knsderux Noda

15So nii de mhuwa ta ho? Meniq ta toma huwe Utux Baro ma uxe ta nii toma gaya de, tduwa ta qmeepah naqah noda denu? Uxe ba puso kiya! 16Ini namu klai peni? Nasi namu sbege mptnqliyan ka yamu nanak we, ima ka thiun namu de mptnqliyan namu heya. Uxe uri we, mptnqliyan qnquwan noda betaq wada mhuqil. Uxe uri we muyu mptnqliyan na mthei betaq wada dehuk mpknsderux noda. 17Qrasun bale ka Utux Baro! Ado ani namu nak pntqliyan qnquwan cuuxal we, saya de, peeyah lhebun namu muyu bale ba kari wada sgarang yamu. 18Kiya uri ma, wada namu na lhlahun peeyah qnquwan noda mtnqliyan namu knsdrexan noda di. 19Ado muuwic ka heyi namu ma so rrengo seediq ka rengo mu. Yamu cuuxal we wada namu huwa mesa sbege ptqliyan qnquwan noda ma, naqah qneepah muumal naqah ka ciida heyi namu han. Saya we, mntena so nii uri, bqani ptqliyan knsderux noda ma so namu maha mrtaso. 20Ado tnqliyan namu qnquwan noda ciida han we ini namu bkei quri uka qnquwan noda han. 21So kiya de ga namu ngalan so smsiqa saya we, niqan maanu gnhiyan na ciida ho? Qnhdean kana nii we hhuqil! 22Kiya de, saya we wada namu na lhlahun peeyah qnquwan noda du mtnqliyan namu Utux Baro. Pnugheyi ma mrtaso. Qnhdean nii we uka psteqan knuudus. 23Ado snadu qnquwan noda we hhuqil. Wano bnege huwe Utux Baro, meniq ta Kiristo Yesu Bukung we kiya ka niqan uka psteqan knuudus.

Currently Selected:

Roma 6: Stgdaya

Highlight

Copy