Roma 5

Sbleqan Ado Snhii niqan Knsderux Noda

1So kiya de ado mnoda snhiyan ta ngalan ta na uka qnquwan noda ka ita we mnoda ta Bukung ta Yesu Kiristo dehuk ta msbleyaq quri Utux Baro. 2Spooda ta heya duri ma pneeyah snhiyan we, wada tana pstmaun huwe nii ta hyegan saya. Kiya uri ma qrasun ta bale sntangan ta knledax Utux Baro! 3Uxe wano kiya, qrasun ta bale ka mooda ta mqraqil uri. Ado klaun ta, mqraqil we ppeyah knremun. 4Knremun we ppeyah knkere pntlaman. Knkere pntlaman we ppeyah sntangan. 5Kiya de sntangan we ini ppeyah mpkpehing lnglungan. Ado mnoda Bgihur Utux bnege na ita ma wada sheruy lhebun ta ka gnaalu Utux Baro. 6Muuwic ta ciida nana ciida we, moda ali seengan na pririh mhuqil naqah seediq ka Kiristo. 7Pririh seediq uka qnquwan noda mhuqil we ini khbaro. Pririh malu seediq mhuqil we yaa maha niqan pahung daha moda. 8Wano Kiristo ga ta mseediq niqan qnquwan noda ciida we wada pririh ita mhuqil. So nii we gisu pgkela gnaalu Utux Baro ita ka nii. 9Saya, ado ka mnoda ta dara na wada ta na ngalan uka qnquwan noda ma, mnoda ta pdoi baga Kiristo de uxe ta maangal seang Utux Baro. 10Ado ka kmpais ta ciida nana we mnoda ta hnqilan laqi Utux Baro wada ta msbleyaq Utux Baro. So kiya de wada ta msbleyaq Utux Baro de knuudus Kiristo ka rnahun ta na pkuudus. 11Uxe wano kiya, ado mnoda Bukung ta Yesu Kiristo wada ta msbleyaq Utux Baro de mooda ta heya mqaras Utux Baro uri.

Adam ma Kiristo

12Sun so nii, mnoda 1 seediq mremux bobo dxeral ka qnquwan noda. Kiya de hhuqil we mnoda qnquwan noda uri. Ado niqan qnquwan noda kana ka seediq. 13Tgberah uka gaya han we tena gaga meniq bobo dxeral ka qnquwan noda. Kiya de, ado ka uka gaya, ini kesi qnquwan noda ka qnquwan noda. 14Ani so kiya, peeyah Adam betaq Moseh mangal beyax ka hhuqil. Ani ini pntena qnquwan noda Adam ka seediq we, gaga meniq toma beyax hhuqil duri. Adam nii we pnskraya na seediq mmeyah mghiti ka heya.

15Ani si ini pgkala gnaalu Utux Baro ka naqah noda. Netun naqah noda 1 seediq ma wada mhuqil ka hbaro seediq. Kiya de huwe Utux Baro pnooda na 1 seediq Yesu Kiristo bnege na we naka wada msngari bale mccuwaq quri hbaro seediq da ho? 16Ado ini pntena huwe bnege ka pndungus qneepah 1 seediq naqah noda. Ado pneyah 1 seediq naqah noda ka psgao. Bnege we wada kesun uka qnquwan noda ka egu naqah noda. 17Netun ado mnoda naqah noda ka 1 seediq we, mooda 1 heya mdoi beyax ka hhuqil. Maanu so kiya de maangal mccuwaq huwe na ma pndungus uka qnquwan noda de naka moda 1 seediq Yesu Kiristo mdoi beyax knuudus daha peni?

18Maanu so kiya de ado mn1 ba moda naqah noda de, ngalan niqan qnquwan noda kana ka seediq. Ado mn1 ba uka qnquwan noda de wada kesun uka qnquwan noda ma, mangal knuudus ka kana seediq da. 19Ado ini thei ka 1 seediq de wada kesun seediq niqan qnquwan noda ka kana hbaro seediq. Mntena so nii uri, moda muyu bale ka 1 seediq de wada kesun uka qnquwan noda ka hbaro seediq duri di. 20Pprana ta gaya we mrana ka naqah noda uri. Gaga mrana hiya ka qnquwan noda. Bale krinah mrana hiya ka huwe uri. 21So kiya de mntena ba mnoda hhuqil mdoi beyax ka qnquwan noda. Mntena so nii duri moda uka qnquwan noda mpbukung ka huwe uri. Kiya de mooda Yesu Kiristo Bukung mdoi beyax ta mpaangal uka psteqan knuudus ka kana seediq.

Currently Selected:

Roma 5: Stgdaya

Highlight

Copy