Roma 4

Abraham Ppyugun

1Maanu ka rrengo ta quri rnrihan na heyi ka Abraham rudan ta cbeyo. 2Nasi mnoda qneepah na wada ngalan uka qnquwan noda ka Abraham we niqan ttndahu na. Kiya de berah Utux Baro we uka ttndahu na. 3Maanu srengo na ka kari Utux Baro ho? “Snhii Utux Baro ka Abraham de wada ngalan msderux noda ka heya.” 4Qmneepah ka sduwan we ini kesi huwe kiya. Ngalun ta ka kiya. 5Kiya de ini qeepah, wano snhii Utux Baro maangal uka qnquwan noda seediq uxe tnhmuku heya we snhiyan na ka wada saangal uka qnquwan noda ka heya. 6Mntena rnengo Dawid, uka malu qneepah ma ngalan uka qnquwan noda ka seediq we mbleyaq:

7“Wada srwaan ka qnquwan noda, wada bungun qnquwan noda ka seediq we mbleyaq ba!

8Ini kesi niqan qnquwan noda Bukung we, mbleyaq ba ka seediq nii!”

9Qtaun ta de, mbleyaq nii we sprana mege seediq wano mnoda ptgaya psalak ho? Mprengo nami, ado snhiyan, wada ngalan msderux noda ka Abraham 10So kiya de, wada huwa kesun smepu? Ya meniq ptgaya psalak ciida ho? Uxe uri we ya meniq ini oda ptgaya psalak ciida ho? Uxe bobo mnoda psalak, berah na ini oda ptgaya psalak ciida. 11Wada maangal pnskraya ptgaya psalak ka heya. Kiya ka pnskraya ado snhii wada kesun uka qnquwan noda na meeniq ini ptgaya psalak ciida. So kiya de heya we maha ma tama na kana seediq ini ooda ptgaya psalak, so wada kesun uka qnquwan noda ka dheya. 12So kiya uri we heya we maha ma tama seediq ptgaya psalak ka heya uri. Uxe ka wano mnoda ptgaya psalak. Asi ka muyu snhiyan rudan ta Abraham ini ooda ptgaya psalak ma ida snhii ka seediq.

Ado Snhiyan Ma Bale ka Sntangan

13Sntangan Utux Baro bbege na Abraham ma Mslutuc lqlaqi mslutuc na ka kari quri aangal daha bobo dxeral we uxe mnoda pnyugan na gaya. Mnoda snhiyan betaq maangal uka qnquwan noda. 14Nasi dmpdoi gaya ka kesun na mplutuc na we maha skbrhuwan ka snhiyan ma mpuuka rrihan ka sntangan. 15Ado ppeyah seang Utux Baro ka gaya. Nasi uka gaya we uka ka kesun smeeliq gaya uri.

16-17Kiya de seediq mplutuc na we mnoda snhiyan. So kiya de maha pusu huwe Utux Baro ka nii. Kiya we ppgdhegun na sntangan ka kana lqlaqi ltlutuc na. Uxe wano dmpdoi gaya, kiya uri we seediq muyu snhiyan Abraham duri. Utux Baro snhiyun Abraham ge pkuudus seediq wada mhuqil ma, ani uka we pniqan na. Berah Utux Baro nii, Abraham we tama ta ita seediq snhii. Mntena ga spatis Patis kari Utux Baro: “Wada misu phyegun pgtama egu qnlhangan.” 18Uka sntangan na ka Abraham ciida we, snhiyan na krinah smatang. Kiya de maha mgtama na egu qnlhangan. Mntena so kari rnengo prading: “Maha so nii ka lqlaqi ltlutuc su.” 19Ya maha 1'00 knkawas ka heya ciida, ani na lnglungun mntena ga mhuqil ka heyi na ma, uxe mptlaqi ka Sarah we ini kuuwic ka snhiyan na. 20Uxe ka kniini na snhii ma pspruun na lmngelung ka sntangan kari Utux Baro. Kiya de mnoda snhiyan wada mbeyax ma tndhuun na ka Utux Baro. 21Kiya uri we ida snhii bale maha so kiya ka sntangan kari Utux Baro. 22Kiya de wada ngalan msderux noda ka heya. 23Kari kesun “wada ngalan uka qnquwan noda” nii we uxe wano heya ka ga spatis. 24Kiya ka ita ka snhii Utux Baro wada pkuudus Yesu Bukung peeyah hnqilan ma maangal uka qnquwan noda ka gaga na spatis uri. 25Ririh qnquwan ta wada daha sbaruy ka Yesu. Ririh kesun tena uka qnquwan noda wada muudus peeyah hnqilan ka heya.

Currently Selected:

Roma 4: Stgdaya

Highlight

Copy