Roma 3

1So kiya de maanu ka mgkala daha seediq icil ka seediq Yudaya ho? Maanu rrihan na ka ptgaya psalak ho? 2Egu ba rrihan na quri ani maanu. Plaale na we pstmaan rnengo Utux Baro ka seediq Yudaya. 3Ani ini snhii ka duma daha we hmuwa ho? Ini snhii ka dheya we ya mmaha pkuuka stmaan Utux Baro ho? 4Ida uxe so kiya! So nii ka kari, bale ba ka Utux Baro ma mberiq ka kana seediq. Mntena pnatis Patis kari Utux Baro:

“Mseang su rmengo kari ciida we ptuura su msderux ooda.

Psgeegun su daha ciida we maha su mbeyax rmengo.”

5Spuyu mu lnglungan seediq rmengo we, nasi ptuura msderux noda Utux Baro ka ini ksderux noda ta we maanu ka rrengo ta ho? Tsseang pkdira ka Utux Baro we ya uka knsderux noda na? 6Ida uxe so kiya. Nasi so kiya de, mphuwa mesa psgao bobo dxeral ka Utux Baro da ho? 7Kiya de nasi mnoda pnqberiq mu krinah pgkela knbale na betaq ptuura knledax na de hmuwa? Ma ku ngalan mntena seediq niqan qnquwan noda psgao ka yaku nana ho? 8Ma namu ini kesa rmengo, “Tduwa ta malu spooda ta naqah noda.” Nasi mege qnquwan ta ka seediq, rmnengo wada ta rmengo kari so nii. Bale ba we naka ngalan niqan qnquwan noda ka seediq so nii.

Uka ka Seediq Msderux Noda

9Kiya de hmuwa ho? Mnkala dheya knmalu ka ita ho? Uxe so kiya! Ado wada ta pgkela: Seediq Yudaya ma seediq Hellenis we gaga meeniq qnquwan noda kana. 10Mntena so pnatis Patis kari Utux Baro:

“Uka ka seediq uka qnquwan, ani 1 uka.

11Uka ka mkela na,

uka ka migin Utux Baro.

12Kana seediq wada elu mridil, kana daha we mquri pkuuka.

Uka ka qmeepah malu. Ani 1 uka.

13Gelu daha we mntena habung mtraguh.

Hema daha we qqberiq daha.

Quwaq daha we hrulas mphalus quyu mlehe.

14Ga stenge cmiyus ma tgbasi kari ka quwaq daha.

15Msliko papak daha oosa daha phuqil seediq ma pqluli dara.

16Elu daha we ga hmiti sseelaq ma ppqraqil.

17Elu mtbale we ini daha klai,

18Ckceka doriq daha we uka kniicu daha Utux Baro.”

19Klaun ta. Ani maanu srengo na ka gaya we ga rmengo seediq niqan gaya. Kiya we gmemuk kana quwaq seediq ma ppsgao Utux Baro ka kana bobo dxeral. 20Maanu so kiya de kana muudus niqan heyi ma dara we uka ani 1 ka ga ngalan msderux noda ado noda na gaya meeniq berah Utux Baro. Ado mooda gaya klaun ka qnquwan noda.

Ado Snhii Niqan Knsderux Noda

21Kiya de saya ge, wada sptuura nganguc gaya uka qnquwan noda Utux Baro. Pgkela na we gaya Moseh ma dmpgeela kari: 22Ado snhii Yesu Kiristo uka qnquwan Utux Baro we sbege na kana seediq snhii. Nii we ini na psnaki 23Ado wada moda qnquwan noda ka kana seediq, ini pttuuku knledax Utux Baro. 24Kiya de saya we wada mangal huwa Utux Baro. Spooda na ckceka pkuudus Kiristo Yesu ma ngalan na uka qnquwan noda. 25-26Utux Baro we pheyu Yesu Kiristo smalu snapuh psruwa qnquwan noda. Nii we mnoda dara Yesu ma snhiyan ptraun na ka uka qnquwan noda Utux Baro. Ado maangal knremun ma knuglahang lhebun na smruwa qnquwan noda daha tgberah. So maha ptuura uka qnquwan na. Kiya we klaun seediq Utux Baro we uka qnquwan na ma wada na kesun uka qnquwan noda ka seediq snhii Yesu uri.

27So kiya de ga inu ka ttndahu ta da ho? Ida uka ka ttndahu ta! Spooda ta maanu ho? Mnoda malu qneepah ta ho? Uxe so kiya, mnoda snhiyan ta. 28Maanu so kiya klaun ta, ado snhiyan wada kesun uka qnquwan noda ka seediq, uxe noda ta gaya. 29Uxe uri we Utux Baro ge, yaa Utux Baro seediq Yudaya nanak ho? Uxe Utux Baro seediq icil qnlhangan ka heya uri peni? Un, ida Utux Baro seediq icil qnlhangan uri. 30Ado Utux Baro we 1 bale. Heya we sprading na peeyah snhii wada na kesun uka qnquwan noda ka seediq ptgaya psalak. Maanu so kiya Utux Baro we spooda na snhii kesun na uka qnquwan noda ka seediq ini ooda ptgaya psalak uri. 31Kiya de, spooda snhiyan de qada ta ka gaya Moseh da ho? Ida uxe so kiya, krinah pgdehu smalu gaya.

Currently Selected:

Roma 3: Stgdaya

Highlight

Copy